ສະຫະພັນເທຄວັນໂດໂລກ ປະກາດຍຶດສາຍດຳກິດຕິມະສັກຈາກ ປູຕິນ

ສະຫະພັນເທຄວັນໂດໂລກ ໄດ້ຍຶດຄືນລາງວັນສາຍດຳກິດຕິມະສັກຈາກ ວະລາດີເມຍ ປູຕິນ ປະທານາທິບໍດີຣັສເຊຍ ເຊັ່ນດຽວກັບສະຫະພັນບານຢູໂດໂລກ ທີ່ຖອດຜູ້ນຳຣັສເຊຍຈາກຕຳແຫນ່ງປະທານກິດຕິມະສັກເຊັ່ນດຽວກັນ.

ສະຫະພັນເທຄວັນໂດໂລກ ປະກາດຮຽກຄືນລາງວັນສາຍດຳກິດຕິມະສັກ ເຊິ່ງເປັນລາງວັນກຽດຕິຍົດທີ່ເຄີຍມອບໃຫ້ທ່ານ ວະລາດີເມຍ ປູຕິນ ປະທານາທິບໍດີຣັສເຊຍ ເປັນທີ່ຮຽບຮ້ອຍແລ້ວໃນວັນຈັນທີ່ຜ່ານມາ ເພື່ອເປັນການຕອບໂຕ້ກັບການທີ່ກອງທັບຣັສເຊຍ ເປີດສາກບຸກໂຈມຕີຢູເຄຣນ ຕັ້ງແຕ່ຕົ້ນອາທິດທີ່ຜ່ານມາ.

ກ່ອນຫນ້ານີ້ ສະຫະພັນເທຄວັນໂດໂລກ ເຄີຍມອບລາງວັນກຽດຕິຍົດສາຍດຳກິດຕິມະສັກ ຂັ້ນທີ 9 ໃຫ້ກັບຜູ້ນຳຣັສເຊຍເມື່ອເດືອນພະຈິກ 2013 ແນວໃດກໍຕາມ ຫລັງກອງທັບຣັສເຊຍບຸກລຸກຢູເຄຣນສະຫະພັນເທຄວັນໂດໂລກ ຈຶ່ງປະກາດຮຽກຄືນລາງວັນດັ່ງກ່າວ ເພື່ອເປັນການຍຶດຖືຕາມຄະຕິພົດຂອງສະຫະພັນທີ່ບອກວ່າ : ‘‘ ສັນຕິພາບມີຄ່າຍິ່ງກວ່າໄຊຊະນະ ’’ ພ້ອມປະນາມກອງທັບຣັສເຊຍ ທີ່ໂຈມຕີຜູ້ບໍລິສຸດຢ່າງໂຫດຫ້ຽມ ເຊິ່ງຖືເປັນການຂັດຕໍ່ຄຸນຄ່າຂອງເກມກິລາໃນການໃຫ້ຄວາມເຄົາລົບ ແລະ ອົດທົນອົດກັ້ນ.

ຂະນະທີ່ກ່ອນຫນ້ານີ້ ສະຫະພັນຢູໂດນາໆຊາດ ເພ່ິງອອກມາລະບຸວ່າຈະຖອດຊື່ຜູ້ນຳຣັສເຊຍ ອອກຈາກຕຳແຫນ່ງປະທານກິດຕິມະສັກ ແລະ ທູດຂອງສະຫະພັນນຳອີກ.