ລີດ ຢູໄນເຕັດ ຕັ້ງ ມາດ ຄຸມທີມເຖິງປີ 2025
ລີດ ຢູໄນເຕັດ ໄດ້ຜູ້ຈັດການທີມໃຫມ່ແບບວ່ອງໄວທັນໃຈ ຫລັງປະກາດແຕ່ງຕັ້ງ ເຈສຊີ ມາດ ຜູ້ຈັດການທີມຊາວອາເມລິກາ ຂຶ້ນຄຸມທີມຈົນເຖິງປີ 2025 ແລ້ວ.
ລີດ ຢູໄນເຕັດ ທີມດັງແຫ່ງພຣີເມຍລີກ ອັງກິດ ປະກາດແຕ່ງຕັ້ງ ເຈສຊີ ມາດ ຜູ້ຈັດການທີມຊາວອາເມລິກາ ຂຶ້ນເປັນຜູ້ຈັດການທີມຄົນໃຫມ່ແທນ ມາເຊໂລ ບິເອລຊາ ຜູ້ຈັດການທີມປະສົບການຫລາຍຊາວອາເຈນຕີນາ ທີ່ຖືກປົດອອກຈາກຕຳແຫນ່ງໄປເມື່ອວັນອາທິດທີ່ຜ່ານມາແລ້ວ.
ມາດ ອາຍຸ 48 ປີ ເຊິ່ງຫວ່າງງານມາຕະຫລອດນັບຕັ້ງແຕ່ແຍກທາງກັບ ແອເບ ໄລຊິກ ເມື່ອເດືອນທັນວາປີກ່ອນນັ້ນ ຈັບປາກກາເຊັນສັນຍາໃນຖິ່ນ ເອລແລນ ໂຣດ ເປັນເວລາ 3 ປີເຄິ່ງ ຫລື ຈົນເຖິງປີ 2025 ແລະ ຈະພາ ລີດ ຢູໄນເຕັດ ລົງຄຸມທີມເປັນນັດທຳອິດໃນເກມພຣີເມຍລີກ ນັດບຸກໄປຢາມ ເລສເຕີ ຊິຕີ ວັນເສົານີ້.
ມາດ ເຊິ່ງໄດ້ໂອກາດຄຸມ ໄລຊິກ ພຽງ 21 ເກມໃນລະດູການນີ້ ກ່ອນຕັດສິນໃຈແຍກທາງກັນດ້ວຍຄວາມຍິນຍອມຂອງທັງ 2 ຝ່າຍ ກ່າວວ່າ : ‘‘ ຂ້ອຍຍັງມີຫລາຍຢ່າງທີ່ຕ້ອງພິສູດໃຫ້ແຟນບານເຫັນວ່າ ຂ້ອຍຄືຄົນທີ່ເຫມາະສົມທີ່ຈະຍ່າງຕາມຮອຍ ມາເຊໂລ ບິເອລຊາ ’’.
