ມິດຕະພາບທີ່ຍິ່ງໃຫຍ່ ຂອງສອງຊາດ ລາວ-ຫວຽດນາມ ແມ່ນມໍລະດົກອັນລໍ້າຄ່າ

ການຊ່ວຍເຫລືອເຊິ່ງກັນ ແລະ ກັນ ນັບຫລາຍພັນປີຂອງສອງຊາດລາວ-ຫວຽດນາມ ແລະ ສິ່ງທີ່ພິເສດຄືໃນໄລຍະຕໍ່ສູ້ກູ້ຊາດພາຍໃຕ້ການນໍາພາຂອງພັກກອມມູນິດອິນດູຈີນລວມທັງໃນໄລຍະການປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການນຳພາຂອງພັກປະຊາຊົນປະຕິວັດລາວ ແລະ ພັກກອມ ມູນິດຫວຽດນາມ, ຄວາມຜູກພັນ, ຄວາມສາມັກຄີ ໄດ້ກາຍເປັນມູນເຊື້ອອັນດີງາມ ແລະ ນັບມື້ເພີ່ມຄວາມ ແໜ້ນແຟ້ນ ແລະ ເຕີບໃຫຍ່ ທັງໄດ້ຮັບການຍົກລະດັບເປັນຄວາມສາມັກຄີພິເສດ ແລະ ການພົວພັນຮ່ວມມືຮອບດ້ານ ເປັນການພົວພັນ ສາມັກຄີອັນບໍລິສຸດຜຸດຜ່ອງ ທີ່ຫາຍາກໃນການພົວພັນສາກົນ ແລະ ກາຍ ເປັນມໍລະດົກອັນລໍ້າຄ່າຂອງສອງຊາດ.

ດັ່ງຮູ້ແລ້ວວ່າ: ປີນີ້ເປັນປີພິເສດທີ່ສອງປະເທດຈະໄດ້ຮ່ວມກັນຈັດຕັ້ງການສະເຫລີມສະຫລອງປີສາມັກຄີມິດຕະພາບ ເຊິ່ງເປັນເຫດການພົ້ນເດັ່ນຄືວັນສ້າງຕັ້ງສາຍພົວພັນການທູດລາວ-ຫວຽດນາມຄົບຮອບ 60 ປີ ແລະ ວັນເຊັນສົນທິສັນຍາ ມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີເພື່ອເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານໃຫ້ຈະ ເລີນງອກງາມຍິ່ງຂຶ້ນທັງເພື່ອເຮັດໃຫ້ຄົນຮຸ່ນຫລັງຮັບຮູ້ ແລະ ເຂົ້າໃຈສາຍພົວພັນພິເສດ ເຖິງວ່າ ສະພາບການແພ່ລະບາດຂອງພະຍາດໂຄວິດ-19 ຈະເປັນອຸປະສັກໃຫ້ແກ່ການໄປມາຫາສູ່ກັນຂອງປະຊາຊົນສອງຊາດ ລາວ-ຫວຽດນາມ, ແຕ່ກໍສາມາດສ່ອງແສງໃຫ້ເຫັນເຖິງຄວາມຮັກແພງ ສາມັກຄີ ແລະ ມູນເຊື້ອອັນດີງາມນັ້ນບໍ່ມີວັນຈືດຈາງ. ປັດຈຸບັນ, ທັງສອງປະເທດພວມຮ່ວມກັນຊຸກຍູ້ການຈັດຕັ້ງປະຕິບັດສັນຍາ ແລະ ຂໍ້ຕົກລົງຕ່າງໆໃຫ້ປາກົດຜົນເປັນຈິງໂດຍສະເພາະການຜັນຂະຫຍາຍຜົນກອງປະຊຸມຂອງສອງກົມການ ເມືອງ ແລະ ກອງປະຊຸມຄະນະກໍາມະການຮ່ວມມືສອງຝ່າຍ. ສິ່ງພົ້ນເດັ່ນເຖິງວ່າເກີດການແພ່ລະບາດຂອງພະຍາດໂຄວິດ-19, ທັງສອງຝ່າຍໄດ້ສຸມໃສ່ອຳນວຍຄວາມສະດວກໃຫ້ແກ່ການລົງທຶນ, ການຄ້າ, ການຂົນສົ່ງ ແລະ ການໄປມາຫາສູ່ກັນ.

ສິ່ງທີ່ພູມໃຈ ແລະ ສັນລະເສີນຍ້ອງຍໍເປັນຢ່າງຍິ່ງຄືພັກ, ລັດຖະບານ ແລະ ປະຊາຊົນ ຫວຽດນາມອ້າຍນ້ອງ ໄດ້ຊ່ວຍເຫລືອອັນລໍ້າຄ່າ, ທັນການ ບໍ່ວ່າຈະເປັນການຊ່ວຍເຫລືອປົກກະຕິປະຈໍາປີ,ການຊ່ວຍເຫລືອໃນຍາມເກີດໄພພິບັດຕ່າງໆ ພິເສດແມ່ນການປ້ອງກັນ, ສະກັດກັ້ນ ແລະ ແກ້ໄຂການລະບາດພະຍາດໂຄວິດ-19 ນັ້ນ, ສສ ຫວຽດນາມ ເປັນປະເທດທໍາອິດທີ່ເຂົ້າຊ່ວຍເຫລືອ ສປປລາວ, ຫໍສະພາແຫ່ງຊາດລາວ ຫລັງໃໝ່ສຳເລັດ ແລະ ເປີດຮັບໃຊ້ກອງປະຊຸມຄັ້ງປະຖົມມະລືກຂອງສະພາແຫ່ງຊາດຊຸດທີ IX ແລະໂຄງ ການອື່ນໆ ເຊິ່ງເປັນການປະກອບສ່ວນສຳຄັນຕໍ່ການພັດທະນາເສດຖະກິດ-ສັງຄົມຂອງສປປ ລາວ ໃຫ້ນັບມື້ຂະຫຍາຍຕົວ ກ້າວໜ້າ ສີວິໄລຂຶ້ນຢ່າງບໍ່ຢຸດຢັ້ງ.