ຜູ້ຕິດເຊື້ອຫລຸດລົງ ແຕ່ພົບສາຍພັນ ໂອມິຄຣອນ 27 ຄົນ ໃນນີ້ 1 ຄົນ ຕິດເຊື້ອໃນຊຸມຊົນບໍ່ຮູ້ແຫລ່ງທີ່ມາ
ທ່ານ ດຣ ຣັດຕະນະໄຊ ເພັດສຸວັນ ຫົວໜ້າກົມພະຍາດຕິດຕໍ່ ລາຍງານໃນວັນທີ 25 ກຸມພາ 2022 ວ່າ: ມື້ນີ້ເປັນອີກມື້ໜຶ່ງທີ່ ສປປ ລາວ ພົບຜູ້ຕິດເຊື້ອປະຈຳວັນຫລຸດລົງເລື້ອຍໆຕ່ຳກວ່າ 500 ຄົນ/ວັນ, ແຕ່ເຖິງຢ່າງໃດກໍຕາມ ພວກເຮົາກວດພົບສາຍພັນໂອມິຄຣອນ 27 ຄົນສ່ວນຫລາຍແມ່ນຜູ້ເດີນທາງມາຈາກຕ່າງ ປະເທດ ເຊິ່ງໃນນີ້ມີ 1 ຄົນພົບເປັນການຕິດເຊື້ອໃນຊຸມຊົນ.
ເຖິງວ່າພວກເຮົາຈະພົບການຕິດເຊື້ອສາຍພັນໂອມິຄຣອນໃນຊຸມຊົນທີ່ຍັງບໍ່ຮູ້ແຫລ່ງທີ່ມາກໍຕາມ, ແຕ່ສັງ ເກດເຫັນວ່າຫລາຍແຂວງບໍ່ມີຜູ້ຕິດເຊື້ອເພີ່ມຂຶ້ນ ເຊິ່ງທ່າອ່ຽງດັ່ງກ່າວອາດຈະສືບເນື່ອງມາຈາກການສັກວັກຊີນປ້ອງກັນໂຄວິດ-19 ຢູ່ໃນລະດັບສູງເຮັດໃຫ້ເຊື້ອບໍ່ສາມາດແພ່ໄດ້ງ່າຍຖ້າທຽບໃສ່ກຸ່ມຄົນທີ່ບໍ່ທັນໄດ້ສັກວັກຊີນ.
ດັ່ງນັ້ນ, ຕ້ອງໄດ້ສືບຕໍ່ເຝົ້າລະວັງຢ່າງໃກ້ຊິດຕໍ່ທ່າອ່ຽງດັ່ງກ່າວ ໂດຍສະເພາະການເຝົ້າລະວັງ ຢູ່ຈຸດຜ່ານແດນຕ່າງໆ, ຕິດຕາມການເກີດລະບາດເປັນຈຸ້ມຄົນເຈັບທີ່ມີອາການທາງລະບົບຫາຍໃຈໃນຊຸມຊົນ, ເຂັ້ມງວດການຈໍາກັດບໍລິເວນຕົນເອງຂອງຜູ້ສຳພັດໃກ້ຊິດ ແລະ ບຸກຄົນທີ່ເດີນທາງມາຈາກຕ່າງປະເທດ ພ້ອມທັງຮຽກຮ້ອງອົງການປົກຄອງບ້ານ, ສື່ມວນຊົນ ໃຫ້ເນັ້ນໂຄສະນາເຜີຍແຜ່ ແຕ່ລະວັນຜ່ານໂທລະໂຄ່ງ, ສື່ສັງຄົມທຸກຮູບແບບ ກ່ຽວກັບທ່າອ່ຽງການລະບາດໃນການແພ່ກະຈາຍເຊື້ອຂອງພະຍາດໂຄວິດ ສາຍພັນ ໂອມິຄຣອນ ເພື່ອບໍ່ໃຫ້ປະຊາຊົນຖືເບົາໃນການປ້ອງກັນຕົນເອງ.
