ຫົວໜ້າ ຫສນຍ ເນັ້ນໃຫ້ພະນັກງານເອົາໃຈໃສ່ 4 ບັນຫາສຳຄັນ

ໃນໂອກາດພົບປະໂອ້ລົມພະນັກງານກົມຄົ້ນຄວ້າ-ສັງລວມ ແລະ ກົມເລຂາ ຫ້ອງວ່າການສຳນັກງານນາ ຍົກລັດຖະມົນຕີ (ຫສນຍ) ໃນວັນທີ 23 ກຸມພານີ້, ທ່ານ ອາລຸນໄຊ ສູນນະລາດ ລັດຖະມົນຕີ, ຫົວໜ້າ ຫສນຍ ໄດ້ເນັ້ນໃຫ້ພະນັກງານທັງ 2 ກົມດັ່ງກ່າວຕ້ອງພ້ອມກັນບຸກທະລຸສ້າງບາດກ້າວຫັນປ່ຽນໃໝ່ ແລະ ເອົາໃຈໃສ່ຕື່ມບາງດ້ານ ເປັນຕົ້ນ

1.ເພີ່ມຄວາມເປັນເຈົ້າການຂອງຕົນ ເພື່ອສ້າງການຫັນປ່ຽນໃໝ່ທີ່ແຂງແຮງ, ປັບປຸງສະພາບແວດລ້ອມ ພາຍໃນອົງການ ໃຫ້ມີບັນຍາກາດທີ່ດີຢ່າງຕໍ່ເນື່ອງ;

2.ຄົ້ນຄວ້າປັບປຸງກົງຈັກການຈັດຕັ້ງ ແລະ ໂຄງປະກອບບຸກຄະລາກອນໃຫ້ແທດກັບຕຳແໜ່ງງານ ແລະ ຄວາມຮູ້ຄວາມສາມາດຄຽງຄູ່ກັບການກໍ່ສ້າງພະນັກງານກັບທີ່, ຊອກໃຫ້ເຫັນໄດ້ວຽກດີ-ຄົນເກັ່ງ, ວຽກຈິງ-ຄົນແທ້. ການສ້າງຄວາມເປັນແບບຢ່າງນຳໜ້າ ແລະ ບຸກທະລຸການຫັນປ່ຽນໃໝ່ ຕ້ອງເລີ່ມຈາກການນຳແຕ່ລະຂັ້ນພ້ອມກັນເດັດດ່ຽວບຸກທະລຸແຕ່ລະດ້ານຢ່າງຈິງຈັງ, ວຽກງານທີ່ຕິດພັນກັບຄວາມຮັບຜິດຊອບຂອງໃຜ ຜູ້ນັ້ນຕ້ອງເປັນເຈົ້າການແທ້ ບໍ່ໃຫ້ມີແນວຄິດລໍຖ້າແຕ່ຄໍາສັ່ງ ຈຶ່ງເຮັດ;

3.ພະນັກງານທຸກຄົນ ຕ້ອງເຂັ້ມງວດປະຕິບັດລະບຽບວິໄນ ລວມທັງລະບຽບການ, ກົນໄກການເຮັດວຽກ ຂອງຫ້ອງວ່າການສຳນັກງານນາຍົກລັດຖະມົນຕີສະບັບເລກທີ 546/ຫສນຍ, ລົງວັນທີ 11 ພະຈິກ 2021; ທຸກການຈັດຕັ້ງປະຕິບັດວຽກງານຕ້ອງມີການຕິດຕາມ, ກວດກາ, ຊຸກຍູ້, ສະຫລຸບຕີລາຄາ, ປະເມີນຜົນ,ຖອດຖອນບົດຮຽນ ແລະ ລາຍງານ ເປັນປົກກະຕິ;

4.ສືບຕໍ່ຮັດແໜ້ນຄວາມສາມັກຄີພາຍໃນໃຫ້ເປັນປຶກແຜ່ນແໜ້ນໜາ, ຈິງໃຈຕຳໜິຊ່ວຍເຫລືອເຊິ່ງກັນ ແລະ ກັນ ໂດຍການເປັນເອກະພາບດ້ານແຜນການ, ການວາງໂຄງປະກອບການຈັດຕັ້ງ ແລະ ບຸກຄະລາກອນ; ການແກ້ໄຂບັນຫາທີ່ລະອຽດອ່ອນດ້ານຕ່າງໆ; ເມື່ອເປັນເອກະພາບກັນແລ້ວ ຕ້ອງຮັບຜິດຊອບຕໍ່ຜົນໄດ້, ຜົນເສຍໃນການປະຕິບັດໜ້າທີ່ການເມືອງຂອງຕົນ.

ທັງໝົດນັ້ນເພື່ອສ້າງບາດລ້ຽວໃໝ່ ໃຫ້ຫັນປ່ຽນຢ່າງແຂງແຮງ, ເລິກເຊິ່ງ, ຮອບດ້ານບົນຈິດໃຈຮັບປະກັນ ຫ້ອງວ່າການສຳນັກງານນາຍົກລັດຖະມົນຕີເຮັດສຳເລັດໜ້າທີ່ ຕາມຄຳຂວັນ 3 ດີຂອງຕົນ (ເສນາທິການທີ່ດີ, ປະສານງານທີ່ດີ ແລະ ບໍລິການຮັບໃຊ້ທີ່ດີ) ທັງເປັນອົງການທີ່ມີຄວາມທັນສະໄໝ, ວ່ອງໄວ, ທັນການສົມກັບເປັນໃຈກາງການປະສານງານ, ເປັນຜູ້ບໍລິການຮັບໃຊ້ຂັ້ນເທິງ ແລະ ປະຊາຊົນຢ່າງແທ້ຈິງ.