ຍິງອາຍຸ 50 ປີ ພ້ອມພັກພວກ 2 ຄົນທີ່ຂາຍຢາບ້າ ຖືກຈັບມາດຳເນີນຄະດີ

ແຫລ່ງຂ່າວ ປ້ອງກັນຄວາມສະຫງົບ ນະຄອນຫລວງວຽງຈັນລາຍງານວ່າ: ວັນທີ 21 ກຸມພານີ້, ເຈົ້າໜ້າທີ່ ປກສ ເມືອງໄຊທານີ ໄດ້ສົມທົບກັບ ປກສ ກຸ່ມບ້ານໄຊ ເມືອງດັ່ງກ່າວ ເຂົ້າກັກຕົວເປົ້າໝາຍຢາເສບຕິດຢູ່ບ້ານດອນໜູນ 3 ຄົນ ໄດ້ແກ່ນາງ ນາງ ອາຍຸ 50 ປີ ມີຢາບ້າ 1.053 ເມັດ, ທ້າວ ຕາບູ່ ອາຍຸ 19 ປີ ມີຢາບ້າ 19 ເມັດ ແລະ ທ້າວ ແຫລມ ອາຍຸ 18 ປີ ພວກກ່ຽວພັກເຊົາຢູ່ບ້ານດອນໜູນ ເມືອງໄຊທານີ ນວ.

ຜ່ານການສອບສວນ, ພວກກ່ຽວສາລະພາບ ວ່າ: ເລີ່ມພົວພັນເສບຢາບ້າແຕ່ປີ 2019 ແລະ ມາຮອດຕົ້ນ ປີ 2022 ກໍເລີ່ມຂາຍຢາບ້າ ໂດຍຮັບເອົານໍາຊາຍຄົນໜື່ງບໍ່ຮູ້ທີ່ຢູ່ 3 ເທື່ອໆລະ 1.000 ເມັດແລ້ວມາຂາຍໃຫ້ໄວໜຸ່ມມົ້ວສຸມຢູ່ບ້ານດອນໜູນ ໂດຍເທື່ອຫລ້າສຸດຮັບເອົາ 1.053 ເມັດຈົນຖືກຈັບມາດຳເນີນຄະດີຕາມ ກົດໝາຍໃນວັນທີ 21 ກຸມພາ 2022.

ປັດຈຸບັນ, ເຈົ້າໜ້າທີ່ ປກສ ເມືອງໄຊທານີ ພວມສອບສວນຂະຫຍາຍຜົນ ຕິດຕາມຈັບຜູ້ຖືກຊັດທອດມາດໍາເນີນຄະດີຕາມກົດໝາຍຕື່ມອີກ.