ຄອນເຕ ບອກເອງ, ຖ້າສະເປີເສຍອີກພ້ອມໂບກມືລາ

ຄອນເຕ ພ້ອມໂບກມືລາ ສະເປີ ຫລັງຜົນງານຕົກຕຳ່ຕິດຕໍ່ກັນ ເສຍ 4 ຈາກ 5 ນັດ ທັງທີ່ທຸກມື້ນີ້ເຮັດວຽກໄດ້ນອນພຽງມື້ລະ 4 ຊົ່ວໂມງ.

ອັນໂຕນີໂອ ຄອນເຕ ຜູ້ຈັດການທີມ ທັອດແນມ ຮັອດສະເປີ ຕັ້ງຄຳຖາມເຖິງອະນາຄົດຕົນເອງ ກ່າວອອກມາເອງ ພ້ອມເດີນຫນ້າອອກຈາກສະໂມສອນ ຫລັງຈາກທີມສ້າງຜົນງານຢ່າງຫນ້າຜິດຫວັງ ບຸກໄປເສຍໃຫ້ ເບີນລີ 1-0 ໃນເກມພຣີເມຍລີກ ເມື່ອວັນພຸດທີ່ຜ່ານມາ ເຊິ່ງເປັນຄວາມປະລາໄຊໃນລີກ 4 ຈາກ 5 ນັດຫລັງສຸດ.

ສະເປີ ຫາກໍພິກຊະນະແມນຊິຕີ ນັດກ່ອນ ແຕ່ພັດມາເສຍໃຫ້ທີມທີ່ພວມຫນີຕົກຊັ້ນ ຫລັງເກມ ຄອນເຕ ເປີດເຜີຍຢ່າງຜິດຫວັງວ່າ : ‘‘ ຂ້ອຍມາຢູ່ນີ້ເພື່ອຊ່ວຍສະໂມສອນ ແຕ່ຫາກບັນຫາຄືຜູ້ຈັດການທີມ ຂ້ອຍກໍພ້ອມຈະໄປ ບໍ່ມີບັນຫາເລີຍ ຂ້ອຍບໍ່ຄຸ້ນກັບສະຖານະການແບບນີ້ ຂ້ອຍພວມພະຍາຍາມທຸກຢ່າງ ແຕ່ສະຖານະການບໍ່ໄດ້ປ່ຽນແປງ ຂ້ອຍພ້ອມ ແລະ ເປີດກວ້າງກັບສະໂມສອນເພື່ອເຮັດໃນສິ່ງທີ່ພວກເຂົາຕ້ອງການ ’’.

‘‘ ຂ້ອຍຕ້ອງການຊ່ວຍສະໂມສອນ ຂ້ອຍເຮັດວຽກຫນັກຫລາຍ ຂ້ອຍໃຫ້ເວລາມື້ລະ 20 ຊົ່ວໂມງກັບທັອດແນມ ຮັອດສະເປີ ແລະ ນອນພຽງ 4 ຊົ່ວໂມງ ແຕ່ມັນບໍ່ພຽງພໍ ຜົນງານສາມາດທີ່ຈະອອກມາດີ ແລະ ຄວາມມຸ່ງຫມັ້ນກໍດີ ແຕ່ເຮົາເສຍ ສຳລັບຂ້ອຍແລ້ວສະຖານະການນີ້ຍອມຮັບບໍ່ໄດ້ ’’.

‘‘ ບາງເທື່ອຕອນນີ້ຂ້ອຍອາດຈະບໍ່ດີໃນການປ່ຽນແປງສິ່ງຕ່າງໆ ແຕ່ຂ້ອຍຊື່ສັດເກີນໄປທີ່ຈະປິດຕາ ແລະ ປ່ອຍໃຫ້ມັນເປັນແບບນີ້ ອາດມີບາງຢ່າງຜິດພາດ ຂ້ອຍຕ້ອງການຮັບຜິດຊອບ ຂ້ອຍພ້ອມສຳລັບທຸກການຕັດສິນໃຈ ໃນ 5 ເກມຫລັງສຸດ ເຮົາພວມຫລິ້ນຄືກັບທີມຕົກຊັ້ນ ນີ້ຄືຄວາວມຈິງ ’’.