ຜູ້ນຳຮົງກົງສັ່ງກວດໂຄວິດ ປະຊາຊົນ 7,5 ລ້ານຄົນ ຫລັງຜູ້ຕິດເຊື້ອຍັງເພີ່ມສູງ
ຜູ້ບໍລິຫານເຂດປົກຄອງພິເສດຮົງກົງ ຖະແຫລງຄຳສັ່ງໃຫ້ປະຊາຊົນທຸກຄົນ ຈຳນວນ 7,5 ລ້ານຄົນ ຕ້ອງກວດຫາເຊື້ອໂຄວິດ-19 ຈຳນວນ 3 ຄັ້ງ ໃນເດືອນມີນານີ້, ຂະນະທີ່ຮົງກົງກຳລັງຜະເຊີນການແພ່ລະບາດຢ່າງຮຸນແຮງ.
ວັນທີ 22 ກຸມພາ 2022, ນາງ ແຄຣີ ຫລ່ຳ ຜູ້ບໍລິຫານເຂດປົກຄອງພິເສດຮົງກົງ ຖະແຫລງຄຳສັ່ງໃຫ້ປະຊາຊົນທຸກຄົນ ຈຳນວນ 7,5 ລ້ານຄົນ ຕ້ອງກວດຫາເຊື້ອໂຄວິດ-19 ຈຳນວນ 3 ຄັ້ງ ໃນເດືອນມີນານີ້ ພ້ອມຢືນຢັນວ່າ: ຮົງກົງຈະເພີ່ມປະສິດທິພາບການກວດໃຫ້ໄດ້ເຖິງ 1 ລ້ານຄົນຕໍ່ວັນ ຫລື ຫລາຍກວ່ານັ້ນ.
ນອກຈາກນີ້, ຜູ້ນຳຮົງກົງຍັງປະກາດຂະຫຍາຍມາດຕະການຮັກສາໄລຍະຫ່າງທາງສັງຄົມໄປຈົນຮອດວັນທີ 20 ເມສານີ້. ພ້ອມລະບຸວ່າ: ຈະເພີ່ມອັດຕາການຮັບວັກຊີນໃຫ້ໄດ້ເຖິງ 90% ພາຍໃນຕົ້ນເດືອນມີນາ. ຂະນະດຽວກັນ ທາງການກຳລັງເລັ່ງສ້າງສູນກັກຕົວເພີ່ມ ເນື່ອງຈາກທີ່ມີຢູ່ໃນຕອນນີ້ບໍ່ພຽງພໍ.
ການຖະແຫລງຄັ້ງນີ້ມີຂຶ້ນໃນຂະນະທີ່ຮົງກົງກຳລັງຜະເຊີນການແພ່ລະບາດຢ່າງຮຸນແຮງ ນັບແຕ່ວັນທີ 15 ກຸມພາຜ່ານມາ ມີຈຳນວນຜູ້ຕິດເຊື້ອໃໝ່ປະມານ 5.000 ຄົນຕໍ່ວັນ ສົ່ງຜົນກະທົບຢ່າງໜັກຕໍ່ລະບົບສາທາລະນະສຸກ. ຂະນະທີ່ອາທິດຜ່ານມາ ຄະນະຜູ້ຊ່ຽວຊານຈາກຈີນ ໄດ້ເດີນທາງໄປຮົງກົງ ພ້ອມອຸປະກອນທາງການແພດເພື່ອຊ່ວຍຮົງກົງຄວບຄຸມການລະບາດ.
