ເດືອນມີນາ ລັດຖະບານຈະສືບຕໍ່ຊຸກຍູ້ ແລະ ຕິດຕາມການຈັດຕັ້ງປະຕິບັດ2 ວາລະແຫ່ງຊາດໃຫ້ເປັນຮູບປະທໍາຫລາຍຂຶ້ນ
ກອງປະຊຸມລັດຖະບານສະໄໝສາມັນປະຈຳເດືອນກຸມພາ 2022 ທີ່ຈັດຂຶ້ນໃນວັນທີ 21-22 ກຸມພານີ້ ໄດ້ເປັນເອກະພາບກັນໃຫ້ສືບຕໍ່ຊຸກຍູ້ ແລະ ຕິດຕາມການປະຕິບັດ 2 ວາລະແຫ່ງຊາດໃຫ້ເປັນຮູບປະທຳຫລາຍຂຶ້ນໂດຍສະເພາະການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ, ການນຳໃຊ້ລົດລັດ, ການແກ້ໄຂລົດທີ່ນຳໃຊ້ບໍ່ຖືກຕ້ອງຕາມກົດໝາຍ, ການແກ້ໄຂຄວາມຫຍຸ້ງຍາກໃນການດຳເນີນທຸລະກິດ, ການຂຸດຄົ້ນແຮ່ທາດ, ການສົ່ງອອກສິນຄ້າຢູ່ດ່ານຊາຍແດນ ແລະ ບັນຫາທີ່ດິນ ຄຽງຄູ່ກັບການດຳເນີນມາດຕະການປ້ອງກັນ, ຄວບຄຸມ ແລະ ແກ້ໄຂການແພ່ລະບາດຂອງພະຍາດໂຄວິດ-19.
ທ່ານນາງ ທິບພະກອນ ຈັນທະວົງສາ ຮອງລັດຖະມົນຕີ ຮອງຫົວໜ້າຫ້ອງວ່າການສຳນັກ ງານນາຍົກລັດຖະມົນຕີ, ຜູ້ປະຕິບັດວຽກງານໂຄສົກລັດຖະບານ ໄດ້ຖະແຫລງຂ່າວຜົນສຳເລັດກອງປະຊຸມລັດຖະບານສະໄໝສາມັນປະຈໍາເດືອນກຸມພາ ໃນວັນທີ 22 ກຸມພານີ້ວ່າ:
ຂົງເຂດປ້ອງກັນຊາດ-ປ້ອງກັນຄວາມສະຫງົບ ໃຫ້ສືບຕໍ່ປະຕິບັດແນວທາງປກຊ-ປກສ ທົ່ວປວງຊົນຮອບດ້ານຢ່າງຕັ້ງໜ້າໂດຍສົມທົບແໜ້ນການເຄື່ອນໄຫວຂອງກຳລັງທຸກຂັ້ນກັບການມີສ່ວນຮ່ວມຂອງປະຊາຊົນຢ່າງເປັນປົກກະຕິ ແລະ ຕໍ່ເນື່ອງລວມທັງການປ້ອງກັນສະຖານ ທີ່ສຳຄັນຕ່າງໆທັງເພີ່ມຄວາມເອົາໃຈໃສ່ຜັນຂະຫຍາຍ ແລະ ຈັດຕັ້ງປະຕິບັດວາລະແຫ່ງ ຊາດວ່າດ້ວຍການແກ້ໄຂບັນຫາຢາເສບຕິດໃຫ້ເຂົ້າສູ່ລວງເລິກ ແລະ ເປັນຮູບປະທໍາຫລາຍຂຶ້ນ.
ຂົງເຂດເສດຖະກິດ ສືບຕໍ່ສຸມໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ປີ 2022 ແລະ ວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນຢ່າງແຂງແຮງ ແລະ ໄດ້ຮັບຜົນດີກວ່າເກົ່າໂດຍເລັ່ງທວງໃຫ້ຫັນເປັນວຽກ ລະອຽດຂອງແຕ່ລະຂະແໜງການຢ່າງຈະແຈ້ງ, ມີຄາດໝາຍເວລາເພື່ອກຽມສະຫລຸບໃນເດືອນມີນາ 2022. ເອົາໃຈໃສ່ແກ້ໄຂສິ່ງກີດຂວາງການລົງທຶນພາຍໃນ ແລະ ຕ່າງປະເທດ ໃຫ້ຫັນປ່ຽນຢ່າງຈະແຈ້ງ ແລະ ມີປະສິດທິຜົນສູງຂຶ້ນ, ເລັ່ງຈັດຕັ້ງປະຕິບັດບັນດາໂຄງການແຮ່ທາດ, ການເຮັດທົດລອງທຸລະກິດ ດີຈີຕອນ ແລະ ບັນດາໂຄງການທີ່ລັດຖະບານໄດ້ອະນຸຍາດໃຫ້ເຮັດທົດລອງແລ້ວນັ້ນ ໃຫ້ຄືບໜ້າ ແລະ ມີປະສິດທິຜົນ; ສືບຕໍ່ປະຕິບັດມາດຕະການຄຸ້ມຄອງການຈັດເກັບລາຍຮັບພາສີ, ອາກອນ ແລະ ຄ່າບໍລິການຕ່າງໆຕາມທິດຫັນເປັນທັນສະໄໝ. ສືບຕໍ່ປະຕິບັດຄຳສັ່ງຂອງນາຍົກລັດຖະມົນຕີ ວ່າດ້ວຍການກວດກາ ແລະ ປະຕິບັດມາດຕະການຕໍ່ຜູ້ທີ່ນໍາເຂົ້າ ແລະ ນໍາໃຊ້ຍານພາຫະນະທຸກປະເພດແບບບໍ່ຖືກຕ້ອງໃຫ້ສໍາເລັດລວມທັງເລັ່ງຜັນຂະຫຍາຍນິຕິກຳວ່າດ້ວຍການນຳໃຊ້ລົດລັດໃນຂອບເຂດທົ່ວປະ ເທດໃຫ້ເປັນຮູບປະທຳ ແລະ ສົ່ງເສີມການນໍາໃຊ້ລົດໄຟຟ້າ. ເອົາໃຈໃສ່ສົ່ງເສີມການຜະລິດ, ການປຸງແຕ່ງ, ການຄ້າ, ການບໍລິການ ແລະ ການທ່ອງທ່ຽວປິ່ນອ້ອມແລວທາງເສດຖະ ກິດລົດໄຟລາວ-ຈີນ ໃຫ້ຮັບປະກັນປະລິມານ ແລະ ຄຸນນະພາບ; ສືບຕໍ່ພົວພັນ ແລະ ປຶກ ສາຫາລືກັບປະເທດໃກ້ຄຽງເພື່ອສ້າງສະພາບແວດລ້ອມທີ່ສະດວກໃຫ້ແກ່ການນຳເຂົ້າ-ສົ່ງອອກສິນຄ້າ. ເພີ່ມຄວາມເອົາໃຈໃສ່ຄຸ້ມຄອງ ແລະ ຮັກສາສະຖຽນລະພາບເງິນຕາ ໃຫ້ໝັ້ນທ່ຽງ ແລະ ອັດຕາແລກປ່ຽນໃຫ້ເໜັງຕີງໃນລະດັບທີ່ກໍານົດໄວ້ ຕິດພັນກັບການເອົາໃຈໃສ່ຄຸ້ມຄອງການເຄື່ອນໄຫວຂອງທະນາຄານທຸລະກິດ, ສະຖາບັນການເງິນໃຫ້ປະຕິບັດມາດຕະ ການຕາມກົດໝາຍ, ລະບຽບການ ແລະ ຕາມແຜນທີ່ກຳນົດ. ສືບຕໍ່ເອົາໃຈໃສ່ຄຸ້ມຄອງລາ ຄາສິນຄ້າອຸປະໂພກ-ບໍລິໂພກ ແລະ ລາຄານໍ້າມັນຢ່າງເຂັ້ມງວດ ທັງຊຸກຍູ້, ສົ່ງເສີມການຜະລິດ ແລະ ສົ່ງເສີມການຊົມໃຊ້ສິນຄ້າພາຍໃນໃຫ້ຫລາຍຂຶ້ນ; ສືບຕໍ່ປັບປຸງແກ້ໄຂກົນໄກການຂຶ້ນທະບຽນ ແລະ ອອກໃບຕາດິນໃນຂອບເຂດທົ່ວປະເທດໃຫ້ສະດວກວ່ອງໄວແລະ ຮັບປະກັນຄວາມຖືກຕ້ອງ. ສືບຕໍ່ປັບປຸງ ແລະ ຍົກສູງຄຸນນະພາບການບໍລິການຜູ້ໂດຍສານທາງລົດໄຟ ແລະ ການບໍລິການຂົນສົ່ງສິນຄ້າໃຫ້ສະດວກ, ວ່ອງໄວ ແລະ ມີປະສິດທິຜົນສູງຂຶ້ນ.
ຂົງເຂດວັດທະນະທຳ-ສັງຄົມ ສືບຕໍ່ເປີດການຮຽນ-ການສອນໃນສະຖານການສຶກສາ ແລະ ປຸກລະດົມນັກຮຽນ-ນັກສຶກສາຕາມເກນອາຍຸທີ່ກະຊວງສາທາລະນະສຸກກຳນົດໄປສັກວັກຊິນໃຫ້ຫລາຍຂຶ້ນ ທັງປັບປຸງວັດຈະນານຸກົມພາສາລາວໃຫ້ສຳເລັດ. ສືບຕໍ່ຕິດຕາມ ແລະ ຊຸກຍູ້ການຈັດຕັ້ງປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແພ່ລະບາດພະຍາດໂຄວິດ-19 ແລະ ປັບປຸງແກ້ໄຂຂອດການຂໍອະນຸມັດເຂົ້າ-ອອກປະ ເທດຂອງນັກລົງທຶນ, ນັກວິຊາການ, ນັກທ່ອງທ່ຽວ ແລະ ເປົ້າໝາຍ ອື່ນໆຢູ່ປະເທດເຮົາໃຫ້ດີຂຶ້ນ ເພື່ອຟື້ນຟູເສດຖະກິດ. ຕະລຸມບອນການສັກວັກຊິນຕາມແຈ້ງການເລກທີ 221/ຫສນຍ ລົງວັນທີ 18 ກຸມພາ 2022 ໃຫ້ສຳເລັດດີ, ຜະລິດຢາປົວພະຍາດໂຄວິດ-19 ໃຫ້ພຽງພໍ. ເອົາ ໃຈໃສ່ຊຸກຍູ້ການປະຕິບັດພາລະບົດບາດຂອງຂະແໜງການຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຕິດພັນກັບການສືບຕໍ່ກຽມຄວາມພ້ອມຮອບດ້ານເພື່ອຕ້ອນຮັບນັກທ່ອງທ່ຽວເຂົ້າປະເທດໃຫ້ບັນລຸແຜນການ ແລະ ໄດ້ຮັບຜົນດີ. ສືບຕໍ່ຕິດຕາມການລະບາດພະຍາດລະ ດູການເພື່ອສະໜອງຂໍ້ມູນຂ່າວສານ ແລະ ກຽມຄວາມພ້ອມດ້ານຕ່າງໆເພື່ອຮັບມືໃຫ້ທັນສະ ພາບການ.
ຂົງເຂດການປົກຄອງ ແລະ ຍຸຕິທໍາ ກຽມຄວາມພ້ອມບັນດາຮ່າງກົດໝາຍສ້າງໃໝ່ ແລະ ຮ່າງກົດໝາຍສະບັບປັບປຸງທີ່ຂະແໜງການຕົນຮັບຜິດຊອບຕາມແຜນການສ້າງ ແລະ ປັບປຸງກົດໝາຍປະຈໍາປີ 2022 ເພື່ອໃຫ້ທັນສະເໜີກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ພິຈາລະນາຕາມແຜນວາງໄວ້. ສຸມໃສ່ແກ້ໄຂບັນຫາຕ່າງໆ ທີ່ພົວພັນເຖິງຂໍ້ຂັດແຍ່ງໃນສັງຄົມ ລວມທັງການຈັດຕັ້ງປະຕິບັດຄໍາຕັດສິນຂອງສານ ແລະ ອື່ນໆໃຫ້ໄດ້ຮັບຜົນດີກວ່າເກົ່າ. ສຸມໃສ່ກຽມ ແລະ ດຳເນີນກອງປະຊຸມທົ່ວປະເທດເພື່ອສະ ຫລຸບຕີລາຄາການຈັດຕັ້ງປະຕິບັດຂະບວນການແຂ່ງຂັນຮັກຊາດ ແລະ ພັດທະນາຕິດພັນກັບການຜັນຂະຫຍາຍວຽກງານ 3 ສ້າງເຂົ້າສູ່ລວງເລິກ ໄລຍະປີ 2016-2020 ແລະ ວາງທິດທາງ 2021-2025.ປັບປຸງແບບແຜນລົງເຄື່ອນໄຫວວຽກງານຢູ່ທ້ອງຖິ່ນຂອງນາຍົກ-ຮອງນາຍົກລັດຖະມົນຕີ ແລະ ລັດຖະມົນຕີບັນດາກະຊວງໂດຍການລົງເຜີຍແຜ່ບັນດານິຕິກຳຂອງລັດຖະບານໃຫ້ເຂົ້າໃຈ ແລະ ການແກ້ໄຂວຽກຕົວຈິງຢູ່ທ້ອງຖິ່ນ.
ວຽກງານການຕ່າງ ປະເທດ ສືບຕໍ່ຕິດຕາມສະພາບການພາກພື້ນ ແລະ ສາກົນໂດຍວິເຄາະວິໄຈຢ່າງເລິກເຊິ່ງຄວາມສ່ຽງ ແລະ ທ່າອ່ຽງຂອງຜົນກະທົບດ້ານການເມືອງ, ເສດຖະກິດ ແລະ ສັງຄົມຕໍ່ປະ ເທດເຮົາທັງມີມາດຕະການຮັບມືເປັນລະບົບຮັດກຸມ ແລະ ທັນການ. ສືບຕໍ່ຜັນຂະຫຍາຍຜົນສໍາເລັດການເຄື່ອນໄຫວຢ້ຽມຢາມ ສສ ຫວຽດນາມ ແລະ ກອງປະຊຸມຄະນະກໍາມາທິການຮ່ວມມືທະວີພາຄີລະຫວ່າງລັດຖະບານ ສປປ ລາວ ແລະ ສສ ຫວຽດນາມຄັ້ງທີ 44 ແລະ ຈັດຕັ້ງປະຕິບັດຜົນຂອງການພົບປະລະຫວ່າງການນໍາພັກ-ລັດເຮົາກັບບັນດາປະເທດເພື່ອນມິດໃຫ້ຖືກຕ້ອງ-ທັນການ ແລະ ໄດ້ຮັບຜົນດີ.
