ລີດ ຢູໄນເຕັດ ກຽມລົງໂທດແຟນບານຕະຫລອດຊີວິດ ຫລັງກໍ່ດຶກຫລຽນໃສ່ນັກເຕະແມນຢູ

ຄວາມເຄື່ອນໄຫວຫລ້າສຸດ ຫລັງເກມພຣີເມຍລີກ ອັງກິດ ທີ່ສະຫນາມ ເອລແລນ ໂຣດ ເຊິ່ງເປັນການພົບກັນລະຫວ່າງ ລີດ ຢູໄນເຕັດ ກັບ ແມນເຊສເຕີ ຢູໄນເຕັດ ກ່ອນທີ່ຜົນຈະຈົບລົງດ້ວຍໄຊຊະນະຂອງທີມຢາມທີ່ບຸກມາເອົາຊະນະໄປໄດ້ຢ່າງສຸດມ່ວນ 4-2,

ເຊິ່ງເຫດການສຳຄັນໃນເກມນີ້ ແມ່ນການທີ່ແຟນບານບາງສ່ວນໄດ້ດຶກສິ່ງຂອງລົງໄປໃນສະຫນາມ ຈົນເຮັດໃຫ້ ແອນໂທນີ ອີແລງກາ ປີກດາວຮຸ່ງຂອງແມນຢູ ໄດ້ຮັບບາດເຈັບຢູ່ຫົ ເຮັດໃຫ້ ຣາຟ ຣັງນິກ  ຜູ້ຈັດການ ແມນເຊສເຕີ ຢູໄນເຕັດ ສະແດງຄວາມບໍ່ພໍໃຈເປັນຢ່າງຫລາຍ.

ຈົນຫລ້າສຸດ ໂຄສົກຂອງສະໂມສອນ ລີດ ຢູໄນເຕັດ ໄດ້ອອກມາຖະແຫລງການຢືນຢັນວ່າ ຈະມີການສັ່ງລົງໂທດແຟນບານຕະຫລອດຊີວິດໃນທັນທີ ຫາກສາມາດລະບຸຜູ້ກະທຳຜິດໃນສະຫນາມ ໂດຍຂະນະນີ້ໄດ້ມີການໃຫ້ຄວາມຮ່ວມມືກັບເຈົ້າຫນ້າທີ່ຕຳຫລວດຢ່າງເຕັມທີ່ເພື່ອຂະຫຍາຍຜົນຫາຜູ້ກະທຳຜິດມາລົງໂທດ.

ນອກຈາກນີ້ ຍັງມີລາຍງານອີກວ່າເກມດັ່ງກ່າວ ມີການນຳກຳລັງຕຳຫລວດເຂົ້າມາໃນພື້ນທີ່ສະຫນາມເຖິງ 900 ຄົນ ເພື່ອຄຸ້ມກັນເຫດວຸ້ນວາຍຂອງແຟນບານກ່ອນເກມການແຂ່ງຂັນ ເຊິ່ງຖືວ່າສູງທີ່ສຸດໃນປະຫວັດສາດຂອງວົງການບານເຕະອັງກິດນຳອີກ.