ອາກາດຍັງຈະສືບຕໍ່ໜາວຮອດ 25 ກຸມພາ ໂດຍສະເພາະຢູ່ພາກເໜືອ
ກົມອຸຕຸນິຍົມ ແລະ ອຸທົກກະສາດ ຄາດຄະເນສະພາບອາກາດແຕ່ວັນທີ 21 ຫາ 27 ກຸມພາ 2022 ທັງມີຄຳເຕືອນເພື່ອເຝົ້າລະວັງສະພາບອາກາດໜາວແຕ່ວັນທີ 21 ຫາ 25 ກຸມພານີ້ ເນື່ອງມວນອາກາດໜາວເຢັນຈາກປະເທດຈີນຈະເພີ່ມກໍາລັງແຮງຂຶ້ນແພ່ລົງມາປົກຄຸມທຸກພາກຂອງປະເທດລາວດ້ວຍກຳລັງປານກາງ ຫາ ແຮງ ສົມທົບກັບກະແສລົມຕາເວັນອອກສ່ຽງເໜືອພັດປົກຄຸມເປັນສ່ວນໃຫຍ່ ເຊິ່ງຈະເຮັດໃຫ້ອາກາດເຢັນ ຫາ ໜາວເຢັນລົງ 2 ຫາ 4 ອົງສາ ພ້ອມມີໝອກບາງປົກຫຸ້ມໃນຕອນກາງຄືນ ຫາ ຕອນເຊົ້າ ຢູ່ແຕ່ລະພາກ ແລະ ອາກາດຈະໜາວເຢັນຫລາຍ ໂດຍສະເພາະຢູ່ແຂວງທາງພາກເໜືອ, ແຂວງໄຊສົມບູນ ແລະ ເຂດພູພຽງບໍລະເວນ ພ້ອມມີໝອກໜາປົກຫຸ້ມໃນຕອນເຊົ້າ ແລະ ຈະມີຝົນຕົກລະດັບຄ່ອຍພ້ອມມີລົມພັດແຮງຢູ່ບາງທ້ອງຖິ່ນແຕ່ລະພາກ.
ດັ່ງນັ້ນຈຶ່ງແຈ້ງເຕືອນປະຊາຊົນບັນດາເຜົ່າ, ອົງການປົກຄອງ ແລະ ອົງການຈັດຕັ້ງທຸກພາກສ່ວນ ຈົ່ງມີສະຕິກຽມພ້ອມຮັບມືກັບສະພາບການປ່ຽນແປງໄວຂອງອຸນຫະພູມອາກາດໜາວເຢັນຫລາຍ ເຊິ່ງອາດຈະມີຜົນກະທົບຕໍ່ສຸຂະພາບໂດຍສະເພາະເດັກນ້ອຍ ແລະ ຜູ້ເຖົ້າ ຂໍໃຫ້ນຸ່ງຫົ່ມໃຫ້ຮ່າງກາຍອົບອຸ່ນຢູ່ສະເໝີ.
ສ່ວນໃນໄລຍະທ້າຍອາທິດແຕ່ວັນທີ 26 ຫາ 27 ກຸມພາ 2022 ຄວາມກົດດັນສູງຂອງອາກາດເຢັນຈະອ່ອນກຳລັງລົງປົກຄຸມຢູ່ທຸກພາກຂອງປະເທດລາວ ສົມທົບກັບລົມຕາເວັນອອກ-ຕາເວັນອອກສ່ຽງໃຕ້ພັດປົກຄຸມ ເຊິ່ງຈະເຮັດໃຫ້ອາກາດໂດຍທົ່ວໄປຄ່ອຍອຸ່ນຂຶ້ນຢູ່ແຕ່ລະພາກ ແລະ ຈະມີຝົນຕົກລະດັບຄ່ອຍພ້ອມມີລົມພັດແຮງຢູ່ບາງທ້ອງຖິ່ນ.
