ໂຄວິດລະບາດໜັກໃນຮົງກົງ ຕິດເຊື້ອໃໝ່ເພີ່ມສູງ ລົ້ນໂຮງໝໍ
ວັນທີ 20 ກຸມພາ 2022, ເຈົ້າໜ້າທີ່ທາງການຮົງກົງເຜີຍ ປັດຈຸບັນຮົງກົງກຳລັງຢູ່ໃນສະພາບສົງຄາມຕໍ່ສູ້ກັບພະຍາດລະບາດ ຫລັງເຊື້ອໄວຣັສໂຄໂຣນາ ອັນເປັນສາເຫດຂອງພະຍາດໂຄວິດແພ່ລະບາດຢ່າງໜັກໃນຮົງກົງ ເປັນເຫດໃຫ້ມີຜູ້ຕິດເຊື້ອໃໝ່ເພີ່ມນັບໝື່ນຄົນໃນຊ່ວງບໍ່ເທົ່າໃດວັນຜ່ານມາ ກະທົບປະຊາກອນປະມານ 7,5 ລ້ານຄົນ ທີ່ອາດຕ້ອງຜະເຊີນມາດຕະການຮັບມືໂຄວິດທີ່ເຂັ້ມງວດຂຶ້ນ, ສູນປິ່ນປົວຫລາຍແຫ່ງບໍ່ສາມາດຮອງຮັບຜູ້ຕິດເຊື້ອໄດ້ພຽງພໍ.
ທາງການຮົງກົງໄດ້ຈັດປະຊຸມດ່ວນກັບທາງການຈີນ ຢູ່ເມືອງເຊິນເຈີ້ນຂອງຈີນ ໃນວັນທີ 20 ກຸມພາ ເພື່ອຫາທາງຮັບມືສະຖານະການການແພ່ລະບາດຂອງເຊື້ອໄວຣັສ, ເດີນໜ້າສະກັດໂຄວິດເປັນສູນໃນຮົງກົງ ເຊິ່ງວັນທີ 20 ກຸມພາ ມີຜູ້ຕິດເຊື້ອເພີ່ມ 6.067 ຄົນພາຍໃນວັນດຽວ ໂດຍຜູ້ຕິດເຊື້ອສ່ວນຫລາຍຕິດຈາກການແພ່ລະບາດໃນພື້ນທີ່ ມີພຽງປະມານຫລັກສິບຄົນເທົ່ານັ້ນທີ່ຕິດເຊື້ອມາຈາກຕ່າງປະເທດ.
ທາງການກຽມສ້າງພື້ນທີ່ຮອງຮັບຜູ້ຕິດເຊື້ອເພີ່ມອີກປະມານ 1 ໝື່ນຕຽງ ຫລັງມີຜູ້ຕິດເຊື້ອຈຳນວນຫລາຍຍັງບໍ່ໄດ້ເຂົ້າຮັບການປິ່ນປົວ ແລະ ລໍຄິວຢູ່ບໍລິເວນພາຍນອກສູນປິ່ນປົວປັນຈຳນວນຫລາຍ. ການແພ່ລະບາດຂອງເຊື້ອໂອມິຄຣອນໃນຄັ້ງນີ້ສ້າງຄວາມທ້າທາຍໃຫ້ລະບົບສາທາລະນະສຸກຂອງຮົງກົງຫລາຍ.
ຮົງກົງເປັນໜຶ່ງໃນພື້ນທີ່ທີ່ມີຜູ້ຕິດເຊື້ອໃໝ່ເພີ່ມສູງ ຈາກຜູ້ຕິດເຊື້ອສະສົມປະມານ 1,4 ໝື່ນຄົນ ເມື່ອຕົ້ນເດືອນກຸມພາຜ່ານມາ ໂດຍ Worldmeters ລາຍງານວ່າ: ຮົງກົງມີຜູ້ຕິດເຊື້ອສະສົມທັງໝົດ 52.830 ຄົນ, ເສຍຊີວິດແລ້ວ 288 ຄົນ ເດີນໜ້າສັກວັກຊີນປ້ອງກັນໂຄວິດໄປແລ້ວ 12,44 ລ້ານໂດສ ພົນລະເມືອງປະມານ 75% ເຂົ້າຮັບວັກຊີນຄົບໂດສ ແລ້ວປະມານ 1,4 ລ້ານຄົນເຂົ້າຮັບວັກຊີນເຂັມກະຕຸ້ນແລ້ວ.
ອ້າງອີງ:
- https://www.theguardian.com/world/2022/feb/19/hong-kong-covid-surge-is-overwhelming-hospitals-says-leader
- https://www.covidvaccine.gov.hk/en/dashboard
- https://chp-dashboard.geodata.gov.hk/covid-19/en.html
- https://www.scmp.com/news/hong-kong/health-environment/article/3167718/hong-kong-health-minister-says-social-distancing
- https://www.channelnewsasia.com/asia/hong-kong-zero-covid-19-success-worsens-strains-omicron-spike-2508181
