ລາວ ໄດ້ຮັບວັກຊີນ ແອັດສະຕາເຊເນກາ ອີກ 594.000 ໂດສ ຈາກ COVAX

ວັນທີ 18 ກຸມພານີ້, ລາວ ໄດ້ຮັບວັກຊີນປ້ອງກັນໂຄວິດ-19 ແອດສະຕາເຊເນກາອີກ 594.000 ໂດສ ຈາກໂຄງການ COVAX Facility ເຊິ່ງເປັນການຮ່ວມມືລະຫວ່າງອົງການພັນທະມິດຮ່ວມມືດ້ານນະວັດ ຕະກໍາ ເພື່ອຮັບມືກັບພະຍາດລະບາດ (CEPI), ອົງການກາວີ (Gavi) ແລະ ອົງການອະນາໄມໂລ(WHO) ໂດຍ ອົງການອຸຍນີເຊບ ເປັນຄູ່ຮ່ວມງານສຳຄັນຈັດສົ່ງ ແລະ ນີ້ເປັນຊຸດທີ 10 ທີ່ COVAX ສະໜອງໃຫ້ແກ່ ສປປ ລາວ. ຂະນະທີ່ບໍ່ດົນມານີ້ ກໍໄດ້ບໍລິຈາກວັກຊີນ Pfizer BioNTech 1,7 ລ້ານໂດສເຊັ່ນດຽວກັນ ສົ່ງຜົນເຮັດໃຫ້ປັດຈຸບັນ, ສປປ ລາວ ມີວັກຊິນພຽງພໍ ທີ່ຈະສັກຄົບໂດສ ໃຫ້ແກ່ປະຊາຊົນຫລາຍກວ່າ 4,1 ລ້ານຄົນ ຫລື 56% ຕາມຄຳແນະນຳ.

ຕາມແຜນການສັກວັກຊິນກັນ ໂຄວິດ-19 ແຫ່ງຊາດ, ວັກຊິນ AstraZeneca ຊຸດນີ້ຈະໄດ້ນໍາໃຊ້ປ້ອງກັນໃຫ້ແກ່ກຸ່ມບູລິມະສິດ ເຊັ່ນ: ຜູ້ມີອາຍຸ 60 ປີຂຶ້ນໄປ, ຜູ້ມີພະຍາດປະຈຳຕົວ, ແມ່ຍິງຖືພາ ແລະ ພະ ນັກງານສາທາລະນະສຸກ. ແນວໃດກໍດີ, ວັກຊີນເຫລົ່ານີ້ ຍັງຈະໄດ້ນຳໃຊ້ນໍາປະຊາກອນກຸ່ມເປົ້າໝາຍອື່ນໆລວມທັງປະຊາກອນທີ່ອາໄສຢູ່ເຂດຫ່າງໄກສອກຫລີກ, ເຂດທີ່ເຂົ້າເຖິງຍາກ ທັງຍັງຈະໄດ້ນໍາໃຊ້ເພື່ອປ້ອງກັນເພີ່ມ (ໂດສທີ 3) ໃຫ້ແກ່ບຸກຄົນທີ່ມີຄວາມສ່ຽງສູງເປັນພິເສດ.

ວັກຊິນ AstraZeneca ຊຸດນີ້ຈະຊ່ວຍໃຫ້ ສປປ ລາວ ກ້າວສູ່ປົ້າໝາຍການສັກວັກຊິນ 87,25% ຂອງປະຊາກອນໃນທ້າຍປີ 2022 ແລະ ມາຮອດວັນທີ 16 ກຸມພາ 2022 ປະຊາກອນລາວ 65,83% ໄດ້ສັກວັກຊີນປ້ອງກັນພະຍາດໂຄວິດ-19 ຢ່າງໜ້ອຍ 1 ເຂັມ ແລະ 58% ໄດ້ສັກຄົບໂດສຕາມຄໍາແນະນໍາແລ້ວ.