ທ່າມກາງຄວາມຫຍຸ້ງຍາກ, ການພົວພັນຮ່ວມມື ລາວ-ຫວຽດນາມ ຍິ່ງແໜ້ນແຟ້ນ
ປີ 2021 ຫລາຍປະເທດທົ່ວໂລກລ້ວນແຕ່ໄດ້ຮັບຜົນກະທົບຈາກພະຍາດໂຄວິດ-19 ລະບາດ ຊຶ່ງລາວ ແລະ ຫວຽດນາມ ກໍໄດ້ຮັບຜົນກະທົບ ເຮັດໃຫ້ການພົວພັນຮ່ວມມືລະຫວ່າງສອງປະເທດໃນຫລາຍຂົງເຂດ ຫຍຸ້ງຍາກ. ແຕ່ສອງພັກ, ສອງລັດ ແລະ ປະຊາຊົນສອງປະເທດ ກໍໄດ້ຊ່ວຍເຫລືອກັນຢ່າງທັນການ ແລະ ມີປະສິດທິຜົນ ພ້ອມກັນຜ່ານຜ່າຄວາມຫຍຸ້ງຍາກລຳບາກສືບຕໍ່ພັດທະນາການພົວພັນຮ່ວມມືໄມຕິຈິດມິດຕະ ພາບອັນດີງາມໃຫ້ແໜ້ນແຟ້ນກວ່າເກົ່າ. ການລະບາດພະຍາດໂຄວິດ-19 ທີ່ສົ່ງຜົນກະທົບໜັກໜ່ວງຕໍ່ການ ພັດທະນາເສດຖະກິດ-ສັງຄົມ ແລະ ຊີວິດການເປັນຢູ່ຂອງປະຊາຊົນລາວ, ທັນໃດນັ້ນ ຫວຽດນາມ ກໍໄດ້ຈັດສົ່ງຜູ້ຊ່ຽວຊານພ້ອມອຸປະກອນການແພດມາຊ່ວຍລາວ, ກະຊວງ, ຂະແໜງການ, ທ້ອງຖິ່ນຕ່າງໆຂອງຫວຽດນາມ ໄດ້ຕັ້ງໜ້າສະໜັບສະໜູນຊ່ວຍເຫລືອບໍ່ວ່າຈະເປັນເງິນ ແລະ ອຸປະກອນການແພດ ທີ່ມີມູນຄ່ານັບລ້ານໂດລາ. ສ່ວນລາວເຖິງວ່າປະສົບກັບຄວາມຫຍຸ້ງຍາກຫລາຍກວ່າ, ແຕ່ກໍໄດ້ຊ່ວຍຫວຽດນາມ ຮັບມືກັບການແພ່ລະບາດຂອງພະຍາດໂຄວິດ-19 ເຊັ່ນດຽວກັນ.
ການພົວພັນການເມືອງ ຍັງສືບຕໍ່ຮັດແໜ້ນ, ການນຳສອງປະເທດ ຍັງດຳເນີນການພົບປະຂັ້ນສູງຕາມຮູບແບບທີ່ເໝາະສົມເປັນປະຈຳ. ຂົງເຂດປ້ອງກັນຊາດປ້ອງກັນຄວາມສະຫງົບ, ຂົງເຂດການສຶກສາ ນັບມື້ຍົກສູງຄຸນນະພາບ. ການຮ່ວມມືດ້ານເສດຖະກິດ, ປັດຈຸບັນ ຫວຽດນາມ ແມ່ນໜຶ່ງໃນ 3 ປະເທດລົງທຶນໃຫຍ່ທີ່ສຸດຢູ່ລາວ ຊຶ່ງມີເຖິງ 209 ໂຄງການດ້ວຍທຶນຈົດທະ ບຽນ 5,18 ຕື້ໂດລາ. ປີ 2021 ມີໂຄງການໃໝ່ຕື່ມອີກ 3 ໂຄງການ, 2 ໂຄງການດັດປັບເພີ່ມເງິນລົງທຶນດ້ວຍທຶນຈົດທະບຽນ 47,84 ລ້ານໂດລາ. ເພື່ອເພີ່ມທະວີການສະໜັບສະໜູນພ້ອມກັນພັດທະນາ, ສອງປະເທດພວມຊຸກຍູ້ໂຄງການເຊື່ອມຕໍ່ເສດຖະ ກິດ ແລະ ຄົມມະນາຄົມຄືການກໍ່ສ້າງເສັ້ນທາງດ່ວນວຽງຈັນ-ຮ່າໂນ້ຍ, ເສັ້ນທາງລົດໄຟຄຳມ່ວນ-ຫວູງອາງ. ສິ່ງທີ່ໜ້າສົນໃຈນັ້ນ, ໃນສະພາບການລະບາດໂຄວິດ-19 ວົງເງິນການຄ້າ 10 ເດືອນຕົ້ນປີ 2021 ບັນລຸເຖິງ1.062 ຕື້ໂດລາ ເພີ່ມຂຶ້ນ 30,1% ເມື່ອທຽບໃສ່ໄລຍະດຽວກັນຂອງປີ 2020.
ບໍ່ພຽງແຕ່ຜະເຊີນການລະບາດຂອງພະຍາດໂຄວິດ-19, ສອງປະເທດຍັງຜະເຊີນສິ່ງທ້າທາຍຫລາຍຢ່າງຍ້ອນການຜັນແປຢ່າງສັບສົນ ແລະ ຍາກທີ່ຈະຄາດຄະເນລ່ວງໜ້າສະພາບການໃນໂລກ ແລະ ພາກພື້ນໄດ້, ການແກ້ງແຍ້ງກັນລະຫວ່າງບັນດາປະເທດມະຫາອຳນາດໃນໂລກ ໂດຍຮັບຮູ້ໄດ້ສິ່ງທ້າທາຍນັ້ນ, 2 ພັກ ແລະ ລັດ ໄດ້ຊີ້ນຳບັນດາອົງການກ່ຽວຂ້ອງຂອງສອງປະເທດເປັນເຈົ້າການສົມທົບກັນ, ຕັ້ງໜ້າຈັດຕັ້ງຜັນຂະຫຍາຍບັນດາສັນຍາ, ຂໍ້ຕົກລົງ, ແຜນການຮ່ວມມື ແລະ ບັນລຸໝາກຜົນຫລາຍຢ່າງທີ່ເປັນໜ້າຊື່ນຊົມໃນທຸກຂົງເຂດ.
ທັງໝົດນີ້ສະແດງໃຫ້ເຫັນຜ່ານການຢ້ຽມຢາມຂອງການນຳຂັ້ນສູງສອງປະເທດ, ການຮ່ວມມື ແລະ ຜົນ ງານຕ່າງໆ ຊຶ່ງສອງປະເທດບັນລຸໄດ້ໃນຫລາຍຂົງເຂດນັ້ນໄດ້ເປັນພະຍານຫລັກຖານໃຫ້ແກ່ການພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ ລາວ-ຫວຽດ ນາມ ນັບມື້ໝັ້ນຄົງຂະໜົງແກ່ນຕະຫລອດໄປ.
