ອົງການໄອຍະການປະຊາຊົນສູງສຸດ ກວດພົບ 7 ເປົ້າໝາຍ ພ້ອມລົງວິໄນຜູ້ລະເມີດກົດໝາຍ

ທ່ານນາງ ພອນທິບ ສາວະລີ ຫົວໜ້າກົມກວດກາ ອົງການໄອຍະການປະຊາຊົນສູງສຸດ ລາຍງານໃນກອງປະຊຸມເຜີຍວຽກງານກວດກາທົ່ວປະເທດ ປະຈຳປີ 2020 ທີ່ຈັດຂຶ້ນວັນທີ 17 ກຸມພານີ້ວ່າ:

5 ປີຜ່ານມາ ໄດ້ຕິດຕາມກວດກາຕາມຄຳສັ່ງ 7 ເປົ້າໝາຍທີ່ພົວພັນເຖິງການປະຕິບັດໜ້າທີ່ຂອງພະນັກງານອົງການໄອ ຍະການປະຊາຊົນສູງສຸດ, ອົງການໄອຍະການປະຊາຊົນພາກກາງ, ອົງການໄອຍະການປະຊາຊົນແຂວງບໍ່ແກ້ວ, ແຂວງວຽງຈັນ, ແຂວງຜົ້ງສາລີ, ແຂວງອຸດົມໄຊ ແລະແຂວງຊຽງຂວາງທີ່ລະເມີດລະບຽບກົດໝາຍ.

ພາຍຫລັງກວດກາໄດ້
– ປະຕິບັດວິໄນຂັ້ນຕິຕຽນ 1 ຄົນ
– ໂຈະການເລື່ອນຂັ້ນເງິນເດືອນ ແລະ ການຍ້ອງຍໍ 1 ຄົນ
– ລໍຖ້າການຈັດຕັ້ງປະຕິບັດຜົນການຕົກລົງ 1 ຄົນ
– ຖືກສໍາຫລວດກວດກາ (ກ່າວເຕືອນ) 4 ຄົນ; ຖືກຍົກຍ້າຍບ່ອນປະຈໍາການ 4 ຄົນ
– ພວມດໍາເນີນການກວດກາ 2 ຄົນ

ຂະນະດຽວກັນໄດ້ຕິດ ຕາມກວດກາໂຄງການກໍ່ສ້າງລົງທຶນຂອງລັດແຕ່ຫົວທີ 4 ໂຄງການຄືໂຄງການກໍ່ສ້າງສຳນັກງານຫ້ອງການ ໄອຍະການເຂດ III ແຂວງຫລວງພະບາງ, ໂຄງການຖົມດິນຂອງສະຖາບັນຝຶກອົບຮົມ ແລະ ວຽກງານໄອຍະການ, ໂຄງການກໍ່ສ້າງສຳນັກງານອົງການໄອຍະການປະຊາຊົນເຂດ IV ນະຄອນຫລວງວຽງຈັນ ແລະ ໂຄງການກໍ່ສ້າງສຳນັກງານອົງການໄອຍະການປະຊາຊົນແຂວງໄຊສົມບູນ.

ຜ່ານການຕິດຕາມ, ກວດກາເຫັນວ່າ: ທັງ 3 ໂຄງການຈັດຕັ້ງປະຕິບັດສໍາເລັດ ເຊິ່ງບໍລິສັດຮັບເໝົາກໍ່ສ້າງປະຕິບັດຖືກຕ້ອງຕາມລະບຽບ ກົດໝາຍ ແລະ ຕາມສັນຍາທີ່ຕົກລົງກັນໄວ້.

ສ່ວນໂຄງການກໍ່ສ້າງສຳນັກງານອົງການໄອຍະການປະຊາ ຊົນແຂວງ ໄຊສົມບູນ ກວດກາສໍາເລັດ ແລະ ມອບຮັບແລ້ວ. ນອກນີ້ໄດ້ຕິດຕາມກວດກາໂຄງການລົງທຶນຂອງລັດທີ່ມີມູນຄ່າ 10 ຕື້ກີບລົງມາໃນທົ່ວປະເທດ 14 ໂຄງການ ໂດຍປັດຈຸບັນຢູ່ໃນຂັ້ນຕອນສະຫລຸບລາຍງານ.