ການວິໄຈອາເມລິກາຊີ້ ການສັກວັກຊີນປ້ອງກັນໂຄວິດ ໃຫ້ແມ່ຍິງຖືພາອາດຊ່ວຍປ້ອງກັນລູກບໍ່ໃຫ້ປ່ວຍໜັກ ຈາກໂຄວິດຈົນຕ້ອງເຂົ້າໂຮງໝໍຫລັງຈາກເກີດ
ທີມນັກວິໄຈຈາກໂຮງໝໍເດັກຫລາຍແຫ່ງ ພ້ອມສູນຄວບຄຸມ ແລະ ປ້ອງກັນພະຍາດລະບາດຂອງອາເມລິກາ (CDC) ເປີດເຜີຍຜົນການວິໄຈຫລ້າສຸດພົບວ່າ: ການສັກວັກຊີນໃຫ້ແມ່ຍິງຖືພາອາດຊ່ວຍປ້ອງກັນເດັກບໍ່ໃຫ້ມີອາການປ່ວຍໜັກຈາກໂຄວິດຈົນຕ້ອງເຂົ້າໂຮງໝໍພາຍຫລັງການເກີດ ເຊິ່ງວັກຊີນຈະຍິ່ງໃຫ້ປະສິດທິພາບດີໃນການປົກປ້ອງເດັກຈາກໂຄວິດ ຖ້າສັກໃຫ້ແມ່ຍິງຖືພາໃນໄລຍະໃກ້ເກີດ.
ໂດຍທີມວິໄຈໄດ້ວິເຄາະຂໍ້ມູນຈາກກຸ່ມເດັກອາຍຸຕໍ່າກວ່າ 6 ເດືອນ ນັບແຕ່ໄລຍະເດືອນກໍລະກົດ 2021 ຈົນເຖິງເດືອນມັງກອນ 2022 ເຊິ່ງລວມທັງເດັກທີ່ເຂົ້າປິ່ນປົວອາການປ່ວຍໃນໂຮງໝໍຈຳນວນ 379 ຄົນ ໃນຈຳນວນນີ້ 176 ຄົນເຂົ້າປິ່ນປົວອາການປ່ວຍຈາກໂຄວິດ, ສ່ວນອີກ 203 ຄົນເຂົ້າປິ່ນປົວດ້ວຍອາການອື່ນໆ.
ຜົນວິໄຈພົບວ່າ: ວັກຊີນປ້ອງກັນໂຄວິດໃຫ້ປະສິດທິພາບສູງເຖິງ 61% ໃນການປ້ອງກັນອາການປ່ວຍຈົນຕ້ອງເຂົ້າໂຮງໝໍ ສຳລັບເດັກທີ່ມານດາໄດ້ຮັບການສັກວັກຊີນໃນລະຫວ່າງຖືພາ.
ໂດຍປະສິດທິພາບຂອງວັກຊີນນັ້ນຈະເພີ່ມສູງເຖິງ 80% ຖ້າມານດາຂອງເດັກໄດ້ຮັບການສັກວັກຊີນໃນໄລຍະ 21 ອາທິດ ຈົນເຖິງ 14 ວັນກ່ອນເກີດ, ສ່ວນເດັກທີ່ມານດາສັກວັກຊີນນັບແຕ່ໄລຍະທຳອິດຂອງການຖືພາພົບວ່າວັກຊີນອາດໃຫ້ປະສິດທິພາບຫລຸດລົງເຖິງ 32%.
ທັງນີ້ ການວິໄຈດັ່ງກ່າວຍັງຊີ້ໃຫ້ເຫັນຊັດເຈນວ່າ: ປະໂຫຍດຂອງການສັກວັກຊີນໃນລະຫວ່າງຖືພານັ້ນຈະມີຜົນຕໍ່ເດັກທີ່ຍັງນ້ອຍເກີນໄປຈະໄດ້ຮັບວັກຊີນ ຫລື ບໍ່.
ເຖິງຢ່າງໃດກໍຕາມ, ຜູ້ຂຽນລາຍງານວິໄຈສະບັບນີ້ເຕືອນວ່າ: ການປະເມີນປະສິດທິພາບຂອງວັກຊີນປ້ອງກັນໂຄວິດທີ່ສັກໃຫ້ແມ່ຍິງຖືພາໃນໄລຍະທຳອິດ ຄວນໃຊ້ຄວາມລະມັດລະວັງໃນການຕີຄວາມ ເນື່ອງຈາກກຸ່ມຕົວຢ່າງທີ່ວິເຄາະຂໍ້ມູນນັ້ນມີຈຳນວນໜ້ອຍ.
ຈາກຂໍ້ມູນຂອງ CDC ພົບວ່າ: ແມ່ຍິງຖືພາມີຄວາມສ່ຽງຈະເກີດອາການປ່ວຍໜັກຈາກໂຄວິດເພີ່ມຂຶ້ນ ແລະ ການຕິດເຊື້ອໂຄວິດລະຫວ່າງຖືພາສາມາດເພີ່ມຄວາມສ່ຽງຂອງການເກີດກ່ອນກຳນົດ, ການເກີດລູກທີ່ຕາຍໃນທ້ອງ ແລະ ອາດເກີດພາວະແຊກຊ້ອນຈາກການຖືພາອື່ນໆໄດ້.
ຂະນະທີ່ ດຣ. ດານາ ມີນີ-ເດລແມນ ຂອງ CDC ຕ້ອງການໃຫ້ແນ່ໃຈວ່າວັກຊີນປ້ອງກັນໂຄວິດສາມາດຊ່ວຍປ້ອງກັນໄດ້ທັງແມ່ ແລະ ລູກ ແລະ ສະໜັບສະໜູນໃຫ້ແມ່ຍິງຖືພາທີ່ມີຄວາມພ້ອມເຂົ້າຮັບການສັກວັກຊີນໄດ້ທັນທີທີ່ຕ້ອງການ.
ອ້າງອີງ:
