ທ່ານ ສີຈິ້ນຜິງ ສັ່ງໃຫ້ຮົງກົງ ໃຊ້ທຸກມາດຕະການທີ່ຈຳເປັນ ເພື່ອຢຸດການລະບາດຂອງໂຄວິດ-19
ຜູ້ນຳຈີນ ອອກຄຳສັ່ງໃຫ້ຮົງກົງເລັ່ງຢຸດການລະບາດໂດຍໄວ ເປັນພາລະກິດຫລັກທີ່ຢູ່ເໜືອທຸກສິ່ງ.
ວັນທີ 16 ກຸມພາ 2022, ສຳນັກຂ່າວບລູມເບິກ (Bloomberg) ລາຍງານໂດຍອ້າງອີງຈາກສື່ທ້ອງຖິ່ນວ່າ: ປະທານປະເທດ ສີ ຈິ້ນຜິງ ຂອງຈີນ ໄດ້ອອກຄຳສັ່ງໃຫ້ທາງການຮົງກົງໃຊ້ມາດຕະການທຸກຢ່າງທີ່ຈຳເປັນເພື່ອຄວບຄຸມການລະບາດຂອງພະຍາດໂຄວິດ-19. ຂະນະທີ່ຮົງກົງກຳລັງຜະເຊີນຈຳນວນຜູ້ຕິດເຊື້ອທີ່ເພີ່ມຂຶ້ນສູງສຸດນັບແຕ່ຈຸດເລີ່ມຕົ້ນຂອງການລະບາດ.
ຕາມລາຍງານລະບຸວ່າ: ການທີ່ທ່ານ ສີຈິ້ນຜິງ ອອກຄຳສັ່ງຕໍ່ຮົງກົງໂດຍກົງນັ້ນ ບໍ່ຄ່ອຍເກີດຂຶ້ນ ໂດຍຄຳສັ່ງນີ້ອາດນຳໄປສູ່ການອອກມາດຕະການທີ່ເຂັ້ມງວດ ພ້ອມການລັອກດາວເປັນວົງກວ້າງ ແບບຈີນໃຊ້ເພື່ອກົດຈຳນວນຜູ້ຕິດເຊື້ອໃຫ້ເປັນສູນ.
ນາງ ແຄຣີ ແລມ ຜູ້ບໍລິຫານສູງສຸດເຂດບໍລິຫານພິເສດຮົງກົງ ໄດ້ອອກມາຢືນຢັນກ່ອນໜ້ານີ້ວ່າ: ຮົງກົງບໍ່ມີແຜນຈະລັອກດາວທົ່ວເມືອງ, ແຕ່ນັ້ນຄືຊ່ວງກ່ອນທ່ານ ສີຈິ້ນຜິງ ຈະອອກມາກະຕຸ້ນໃຫ້ຮົງກົງເລັ່ງແກ້ໄຂການລະບາດໂດຍດ່ວນ.
ສື່ຂອງລັດຄື Wen Wei Po ເປີດເຜີຍຄຳເວົ້າຂອງຜູ້ນຳຈີນວ່າ: ລັດຖະບານຮົງກົງຈະຕ້ອງຮັບຜິດຊອບໃນການຮັກສາສະຖຽນລະພາບ ແລະ ຄວບຄຸມການລະບາດໂດຍໄວທີ່ສຸດເທົ່າທີ່ຈະເປັນໄປໄດ້ ເຊິ່ງເປັນພາລະກິດທີ່ຢູ່ເໜືອທຸກສິ່ງ, ໃຫ້ໃຊ້ກຳລັງເຈົ້າໜ້າທີ່ ແລະ ຊັບພະຍາກອນທັງໝົດທີ່ມີ ເພື່ອອອກມາດຕະການທີ່ຈຳເປັນໃນການຮັກສາຄວາມປອດໄພ ແລະ ສຸຂະພາບຂອງຊາວຮົງກົງ.
ຈາກນັ້ນໄດ້ມີຖະແຫລງການຈາກນາງ ແຄຣີ ແລມ ວ່າ: ລັດຖະບານຂອງນາງຈະປະຕິບັດຕາມຄຳແນະນຳຂອງທ່ານ ສີຈິ້ນຜິງ ດ້ວຍການສະໜັບສະໜູນຈາກລັດຖະບານກາງຂອງຈີນ ແລະ ຈະຮັບຜິດຊອບໃນການຄວບຄຸມການລະບາດພາຍໃນເມືອງໃຫ້ໄດ້.
ປົກກະຕິແລ້ວ, ທ່ານ ສີຈິ້ນຜິງ ຈະບໍ່ອອກມາສັ່ງການອອກສື່ ມີພຽງຕອນທີ່ທ່ານອອກຄຳສັ່ງໃຫ້ເຈົ້າໜ້າທີ່ລັດທຸກລະດັບຄວບຄຸມການລະບາດຄັ້ງທຳອິດໃນເມືອງອູ່ຮັ່ນເທົ່ານັ້ນ ກ່ອນຈະມີການລັອກດາວເມືອງອູ່ຮັ່ນຢ່າງເຕັມຮູບແບບ ແລະ ມີຄຳສັ່ງປົດຜູ້ບໍລິຫານທ້ອງຖິ່ນອອກຈາກຕຳແໜ່ງ.
ສະຖານະການດັ່ງກ່າວເຮັດໃຫ້ຜູ້ຊ່ຽວຊານເບິ່ງວ່າ: ອາດສົ່ງຜົນເຮັດໃຫ້ນາງ ແຄຣີ ແລມ ອາດໝົດໂອກາດໃນການໄດ້ຮັບເລືອກເປັນຜູ້ບໍລິຫານສູງສຸດເຂດບໍລິຫານພິເສດຮົງກົງສະໄໝໜ້າ ເຊິ່ງຈະມີການຄັດເລືອກໃນເດືອນມີນານີ້.
ອ້າງອີງ:
https://www.bloomberg.com/…/xi-says-hong-kong-should…
