ຫວຽດນາມເລັ່ງຟື້ນຟູການທ່ອງທ່ຽວ ເປີດໃຫ້ຊາວຕ່າງປະເທດເດີນທາງເຂົ້າ ເລີ່ມ 15 ມີນານີ້

ຫວຽດນາມກຽມເປີດຮັບຕ່າງປະເທດເຂົ້າປະເທດ ໂດຍກຳນົດໃຫ້ສັກວັກຊີນຄົບໂດສ ມີຜົນກວດເຊື້ອ ແລະ ມີປະກັນສຸຂະພາບ.

ວັນທີ 16 ກຸມພາ 2022, ສຳນັກຂ່າວເອເອຟພີ (AFP) ລາຍງານວ່າ: ຫວຽດນາມຈະກັບມາເປີດຮັບນັກທ່ອງທ່ຽວຕ່າງປະເທດອີກໃນວັນທີ 15 ມີນາຈະເຖິງນີ້ ຫລັງປິດຊາຍແດນເພື່ອຄວບຄຸມການລະບາດຂອງພະຍາດໂຄວິດ-19 ມາເປັນເວລາ 2 ປີ.

ຕາມລາຍງານລະບຸວ່າ: ໃນໄລຍະ 2 ປີຜ່ານມາ ອຸດສາຫະກຳທ່ອງທ່ຽວຂອງຫວຽດນາມທີ່ເຄີຍມີມູນຄ່າ 3,2 ໝື່ນລ້ານໂດລາສະຫະລັດ ຕ້ອງປະສົບບັນຫາຢ່າງໜັກ.

ທາງການຫວຽດນາມໄດ້ຖະແຫລງວ່າ: ຈະກັບມາອອກວີຊາ ແລະ ຮັບນັກເດີນທາງຈາກຕ່າງປະເທດນັບແຕ່ກາງເດືອນໜ້າເປັນຕົ້ນໄປ ໂດຍຜູ້ທີ່ເດີນທາງເຂົ້າມາຈະຕ້ອງໄດ້ຮັບວັກຊີນຄົບໂດສ, ມີຜົນກວດໂຄວິດເປັນລົບທັງກ່ອນເດີນທາງ ແລະ ຫລັງເດີນທາງມາເຖິງ ລວມທັງມີປະກັນສຸຂະພາບທີ່ມີວົງເງິນຄຸ້ມຄອງເຖິງ 10.000 ໂດລາສະຫະລັດ.

ເຖິງຢ່າງໃດກໍຕາມ, ຍັງບໍ່ມີຄວາມຊັດເຈນວ່າຜູ້ທີ່ເດີນທາງເຂົ້າມາຈະຕ້ອງເຂົ້າຮັບການກັກຕົວເປັນເວລາ 3 ວັນຕາມມາດຕະການທີ່ໃຊ້ຢູ່ ຫລື ບໍ່.

ປັດຈຸບັນ ຫວຽດນາມມີຜູ້ຕິດເຊື້ອເພີ່ມສູງຂຶ້ນເລື້ອຍໆ, ຫລ້າສຸດວັນທີ 16 ກຸມພາ ມີລາຍງານຜູ້ຕິດເຊື້ອ 34.000 ກວ່າຄົນ ແລະ ມີຄ່າສະເລ່ຍໃນຮອບ 7 ວັນມີ 30.000 ຄົນຕໍ່ວັນ.

ຂະນະທີ່ອັດຕາປະຊາກອນໄວຜູ້ໃຫຍ່ທີ່ໄດ້ຮັບວັກຊີນ 2 ໂດສນັ້ນສູງກວ່າ 90% ໂດຍລັດຖະບານກຳລັງພິຈາລະນາເລີ່ມສັກວັກຊີນໃນກຸ່ມເດັກໃຫຍ່ ພ້ອມສັກວັກຊີນເຂັມກະຕຸ້ນໃນກຸ່ມອື່ນໆຄຽງຄູ່ກັນໄປ.

ອ້າງອີງ:

https://www.france24.com/…/20220216-vietnam-to-re-open…