ຢໍໂຄວິດ ພ້ອມຖອນຕົວອອກ ເຟຣັນໂອເພັນ-ວິມເບິລດັນ ຫາກຍັງບັງຄັບໃຫ້ສີດວັກຊີນ

ໂນວັກ ຢໍໂຄວິດ ຢືນຢັນພ້ອມຖອນຕົວຈາກການແຂ່ງຂັນເທັນນິສ ເຟຣັນ ໂອເພັນ ແລະ ວິມເບິລດັນ 2 ລາຍການແກຣນສະແລມຕໍ່ຈາກນີ້ ຫາກມີການບງຄັບໃຫ້ນັກເທັນນິສຕ້ອງສີດວັກຊີນໂຄວິດ ເພື່ອຮ່ວມການແຂ່ງຂັນ ຢືນຢັນບໍ່ເຄີຍຕໍ່ຕ້ານວັກຊີນ ແຕ່ພຽງເຊື່ອວ່າທຸກຄົນມີອິດສະຫລະໃນການເລືອກເອົາສິ່ໃດເຂົ້າຮ່າງກາຍ.

ໂນວັກ ຢໍໂຄວິດ ນັກເທັນນິສມື 1 ຂອງໂລກຊາວເຊີເບຍ ອອກມາເປີດເຜີຍວ່າລາວພ້ອມທີ່ຈະຖອນຕົວອອກຈາກການແຂ່ງຂັນໃນເທັນນິສແກຣນສະແລມ 2 ລາຍການຕໍ່ໄປ ທັງເຟຣັນ ໂອເພັນ ແລະ ວິມເບິລດັນ ຫາກຍັງຖືກບັງຄັບໃຫ້ຕ້ອງຮັບການສີດວັກຊີນປ້ອງກັນໂຄວິດ-19 ຈຶ່ງຈະສາມາດລົງແຂ່ງຂັນໄດ້ ແນວໃດກໍຕາມ ຢໍໂຄວິດ ຢືນຢັນວ່າລາວບໍ່ແມ່ນຄົນທີ່ຕໍ່ຕ້ານການສີດວັກຊີນແຕ່ຢ່າງໃດ ພຽງແຕ່ເຊື່ອວ່າທຸກຄົນຄວນມີອິດສະຫລະໃນການເລືອກວ່າຈະຮັບສິ່ງໃດເຂົ້າສູ່ຮ່າງກາຍຕົນເອງເທົ່ານັ້ນ.

ກ່ອນຫນ້ານີ້ ຢໍໂຄວິດ ຫາກໍຕົກເປັນຂ່າວດັງ ຫລັງຖືກທາງການອອສເຕຣເລຍຍົກເລີກວີຊ່າ ຖືກກັກຕົວ ແລະ ສົ່ງຕົວອອກນອກປະເທດ ສົ່ງຜົນໃຫ້ບໍ່ມີິສິດລົງແຂ່ງຂັນໃນອອສເຕຣເລຍ ໂອເພັນ ແກຣນສະແລມທຳອິດຂອງປີເມື່ອເດືອນມັງກອນທີ່ຜ່ານມາ ແລະ ເຮັດໃຫ້ລາວພາດໂອກາດຄວ້າແຊ໊ມແກຣນສະແລມເປັນລາຍການທີ 21 ຂອງຕົນເອງ ເຊິ່ງເປັນສະຖິຕິສູງສຸດໃນປະຫວັດສາດ ເຖິງວ່າລາວຈະຍື່ນເລື່ອງຂໍຍົກເວັ້ນການສີດວັກຊີນແລ້ວກໍຕາມ ຂະນະທີ່ລາຍການແກຣນສະແລມ 2 ລາຍການຕໍ່ຈາກນີ້ ທັງ ເຟຣັນ ໂອເພັນ ແລະ ວິມເບິລດັນ ກໍມີຂ່າວວ່າອາດຈະບໍ່ອະນຸຍາດໃຫ້ນັກເທັນນິສທີ່ຍັງບໍ່ໄດ້ການສີດວັກຊີນເຂົ້າຮ່ວມແຂ່ງຂັນເຊ່ັນດຽວກັນ.

ແນວໃດກໍຕາມລາວຢືນຢັນວ່າ ລາວພ້ອມຖອນຕົວຈາກທັງ 2 ລາຍການດັ່ງກ່າວ ຫາກຍັງຖືກບັງຄັບໃຫ້ສີດວັກຊີນເພື່ອລົງແຂ່ງຂັນແທ້.