ໂຄວິດ-19 ຫລຸດລົງ ຂໍໃຫ້ການງານ-ການເງິນດີຂຶ້ນເລື້ອຍໆ
ໂດຍ: ທິດກໍ່າ
ນັບແຕ່ຕົ້ນເດືອນກຸມພາ 2022 ເປັນຕົ້ນມາ ເຫັນວ່າທ່າອ່ຽງຄົນຕິດເຊື້ອໂຄວິດ-19 ນັບມື້ຫລຸດລົງ. ໃນຊ່ວງຕົ້ນເດືອນນີ້ ຖືວ່າຈາກສະຖິຕິຄົນຕິດເຊື້ອມື້ໜຶ່ງ 4 ຫາ 5 ຮ້ອຍຄົນ ມາຮອດວັນທີ 28 ກຸມພາ 2022 ຫລຸດລົງມາຢູ່ໃນລະດັບ 134 ຄົນ ແລະ ຄາດວ່າໃນໄລຍະຕໍ່ໆໄປ ຖ້າທຸກຄົນຮູ້ວິທີຫລີກລ່ຽງ ແລະ ປ້ອງກັນຕົນເອງກໍຈະສາມາດຢູ່ລອດປອດໄພ ແລະ ຢູ່ກັບມັນໄດ້ດ້ວຍວິທີການດຳລົງຊີວິດແບບໃໝ່. ສຸດທ້າຍມາມັນກໍຈະມະຫັບມະຫາຍໄປຈາກປະເທດລາວ ແລະ ສັງຄົມລາວຢ່າງແນ່ນອນ.
ແຕ່ແນວໃດກໍຕາມ, ສິ່ງທີ່ພວກເຮົາເປັນຫ່ວງ ແລະ ຄວນມີສະຕິນຳກັນນັ້ນ ຢ້ານວ່າເຊື້ອພະຍາດໂຄວິດ-19 ສາຍພັນໂອມິຄຣອນຈະມາລະບາດເປັນວົງກວ້າງ ເພາະມາຮອດວັນທີ 28 ກຸມພາ 2022 ໄດ້ມີຄົນຕິດເຊື້ອໄປແລ້ວເກືອບ 30 ກວ່າຄົນ. ກໍດັ່ງພວກເຮົາຮູ້ນຳກັນມາແລ້ວວ່າ ນັບແຕ່ເຊື້ອພະຍາດສາຍພັນໃໝ່ໂຄວິດ-19 ໄດ້ເລີ່ມແພ່ລະບາດຢູ່ປະເທດເຮົາເປັນເວລາ 2 ປີກວ່າ ໄດ້ເຮັດໃຫ້ເສດຖະກິດ-ສັງຄົມຂອງປະເທດປະສົບບັນຫາວິກິດຢ່າງໜັກໜ່ວງ.
ບັນດາຂະແໜງການທີ່ໄດ້ຮັບຜົນກະທົບໜັກແມ່ນການທ່ອງທ່ຽວ, ໂຮງແຮມ, ຮ້ານອາຫານ, ຮ້ານກິນດື່ມ ແລະ ບັນດາຂະແໜງການຜະລິດຈຳນວນບໍ່ໜ້ອຍ.
ຈາກສະຖິຕິທີ່ລັດເຮົາເຄີຍໄດ້ລາຍຮັບຈາກການທ່ອງທ່ຽວໃນປີໜຶ່ງໆຫລາຍພັນຕື້ກີບ ຫລຸດລົງມາຈົນບໍ່ມີລາຍຮັບຈາກດ້ານນີ້ເລີຍ ຍ້ອນສາເຫດທີ່ວ່ານີ້ ໃນຊ່ວງການແພ່ລະບາດຂອງພະຍາດໂຄວິດ-19 ແມ່ນມີການປິດປະເທດ, ປິດດ່ານເຂົ້າ-ອອກ, ຄົນໃນບໍ່ໃຫ້ອອກ ຄົນນອກບໍ່ໃຫ້ເຂົ້າ ນັບທັງນັກທ່ອງທ່ຽວກໍບໍ່ສາມາດເຂົ້າມາທ່ຽວເມືອງລາວໄດ້ ຈຶ່ງເຮັດໃຫ້ລາຍຮັບດ້ານນີ້ປະສົບບັນຫາຂາດເຂີນລາຍຮັບຢ່າງຫລວງຫລາຍ.
ເຖິງຢ່າງໃດກໍດີ, ມາຮອດໄລຍະນີ້ ເຮົາກໍເຫັນໄດ້ຢ່າງຈະແຈ້ງແລ້ວວ່າ ຈຳນວນຄົນຕິດເຊື້ອໂຄວິດ-19 ນັບມື້ຫລຸດລົງ ບັນຍາກາດໃນການທ່ອງທ່ຽວໄປມາກໍປາກົດວ່າຄຶກຄັກ ໂດຍສະເພາະນັບແຕ່ເປີດເສັ້ນທາງລົດໄຟຄວມໄວສູງ ລາວ-ຈີນ ເປັນຕົ້ນມາ ເຫັນວ່າການທ່ອງທ່ຽວພາຍໃນປະເທດເລີ່ມມີບັນຍາກາດໃໝ່.
ນອກຈາກນັ້ນ ໃນເງື່ອນໄຂທີ່ລັດຖະບານເຮົາໄດ້ເລີ່ມທົດລອງເປີດການທ່ອງທ່ຽວສີຂຽວກໍໄດ້ມີນັກທ່ອງທ່ຽວຈາກຕ່າງປະເທດຈຳນວນໜຶ່ງໄດ້ເລີ່ມເຂົ້າມາທ່ຽວລາວ ແລະ ໄປພ້ອມໆກັນນັ້ນ ບັນດາຂະແໜງການຜະລິດອື່ນໆກໍເລີ່ມຫວນກັບມາມີບັນຍາກາດອັນໃໝ່ ກໍຂໍໃຫ້ການງານ-ການເງິນໃນທຸກຂົງເຂດດີຂຶ້ນໄປເລື້ອຍໆ ແລະ ຂໍໃຫ້ເດືອນ 3 ປີ 2022 ເປັນປີເງິນປີທອງ.
