ຍີ່ປຸ່ນພ້ອມສະໜັບສະໜູນຢູເຄຣນ ໃຫ້ກູ້ເງິນສຸກເສີນໄດ້ 100 ລ້ານໂດລາ ອາດຂວ້ຳບາດຣັດເຊຍຖ້າບຸກລຸກ

ຜູ້ນຳຍີ່ປຸ່ນ ແລະ ຢູເຄຣນໂທລະສັບຫາກັນເພື່ອວາງແຜນຮັບມືຣັດເຊຍ ໂດຍຍີ່ປຸ່ນພ້ອມຈະສະໜັບສະໜູນວົງເງິນກູ້ໃຫ້ຢູເຄຣນ ແລະ ອອກມາດຕະການຂວ້ຳບາດຖ້າຣັດເຊຍບຸກລຸກ.
ວັນທີ 15 ກຸມພາ 2022, ສຳນັກຂ່າວຣອຍເຕີ (Reuters) ລາຍງານວ່າ: ນາຍົກລັດຖະມົນຕີ ຟູມິໂອະ ຄິຊິດະ ຂອງຍີ່ປຸ່ນ ໄດ້ບອກກັບປະທານາທິບໍດີ ໂວໂລດິມີ ເຊເລນສກີ ຂອງຢູເຄຣນ ລະຫວ່າງການຫາລືຜ່ານທາງໂທລະສັບວ່າ: ລັດຖະບານຍີ່ປຸ່ນພ້ອມຈະຂະຫຍາຍວົງເງິນກູ້ຢືມສຸກເສີນໃຫ້ຢູເຄຣນ ເປັນຈຳນວນ 100 ລ້ານໂດລາສະຫະລັດ ພ້ອມສະໜັບສະໜູນໃຫ້ຫາທາງອອກຜ່ານການເຈລະຈາທາງການທູດ.
ຂະນະທີ່ເວັບໄຊ Nikkei Asia ເຜີຍວ່າ: ນາຍົກລັດຖະມົນຕີຍີ່ປຸ່ນໄດ້ປະກາດສະໜັບສະໜູນການເປັນເອກະລາດ ແລະ ດິນແດນຂອງຢູເຄຣນ ທ່າມກາງວິກິດທີ່ເກີດຂຶ້ນຫລັງຣັດເຊຍມີການລະດົມກຳລັງທະຫານກວ່າແສນຄົນໃກ້ຊາຍແດນຢູເຄຣນ.
ນາຍົກລັດຖະມົນຕີ ຄິຊິດະ ຍັງຢືນຢັນວ່າ: ຍີ່ປຸ່ນມີແຜນຈະຕອບສະໜອງຢ່າງເໝາະສົມຕໍ່ຣັດເຊຍ ແລະ ມີຄວາມເປັນໄປໄດ້ທີ່ຈະອອກມາດຕະການຂວ້ຳບາດ ເພື່ອຕອບໂຕ້ໃນກໍລະນີທີ່ຣັດເຊຍບຸກຢູເຄຣນ.
ນັບແຕ່ສະຖານະການບໍລິເວນຊາຍແດນເລີ່ມເຄັ່ງຕຶງ ປະທານາທິບໍດີ ເຊເລນສກີ ໄດ້ມີການຫາລືກັບຜູ້ນຳຫລາຍປະເທດ ທັງອັງກິດ, ອາເມລິກາ, ຝຣັ່ງ, ເຢຍລະມັນ ແລະ ຫລ້າສຸດຄືຍີ່ປຸ່ນ ເຊິ່ງເປັນປະເທດມະຫາອຳນາດນອກອົງການສົນທິສັນຍາອັດລັງຕິກເໜືອ (NATO).
ອ້າງອີງ:
https://www.reuters.com/…/japan-offers-ukraine-100-mln…/
https://asia.nikkei.com/…/Japan-Ukraine-leaders-stress…