ປະທານບານເຕະອີຕາລີ ຂໍໃຫ້ເລື່ອນຕາຕະລາງລີກ ເພື່ອໃຫ້ອີຕາລີ ກຽມພ້ອມສູ້ເພລອອບບານໂລກ

ກຣາບຣິເອເລ ກຣາວີນາ ປະທານ ສະຫະພັນບານເຕະອີຕາລີ ຮຽກຮ້ອງໃຫ້ຕາຕະລາງການແຂ່ງຂັນບານເຕະລີກໃນໄລຍະທ້າຍອາທິດ ກ່ອນເຕະບານໂລກຮອບຄັດເລືອກ ຈະແຂ່ງຂັນເພລອອບ ເພື່ອໃຫ້ ໂຣແບໂຕ ມັນຊິນີ ຜູ້ຈັດການທີມຊາດມີເວລາກຽມທີມຊາດອີຕາລີ ສູ້ເສິກສຳຄັນຫລາຍກວ່າເກົ່າ.

ກາບຣິເອເລ ກຣາວີນາ ປະທານສະຫະພັນບານເຕະອີຕາລີ (FIGC)  ອອກມາລະບຸເມື່ອວັນຈັນທີ່ຜ່ານມາວ່າ ອົງການບານເຕະອີຕາລີ ຂໍຮຽກຮ້ອງໃຫ້ມີການເລື່ອນຕາຕະລາງແຂ່ງຂັນບານເຕະກັລໂຊ ເຊເຣຍ ອາ ໃນອາທິດທີ 30 ອອກໄປກ່ອນ ເພື່ອໃຫ້ເວລາກັບທີມຊາດອີຕາລີຫລາຍຂຶ້ນໃນການກຽມທີມເພື່ອເຮັດເສິກສຳຄັນໃນເຕະບານໂລກ 2022 ຮອບຄັດເລືອກ ໂຊນຢູໂຣບ ໃນຮອບເພລອອຟ.

ສຳລັບຕາຕະລາງແຂ່ງຂັນບານເຕະລີກ ກັລໂຊ ເຊເຣຍ ອາ ໃນອາທິດທີ 30 ນັ້ນຈະລົງຫລິ້ນໃນໄລຍະທ້າຍອາທິດວັນທີ 19-20 ມີນານີ້ ຂະນະທີ່ທີມຊາດອີຕາລີ ຈະລົງຫລິ້ນເກມເພລອອບ ຮອບຮອງຊະນະເລີດຂອງກຸ່ມ C  ດ້ວຍການເປີດບ້ານໃນເມືອງປາແລໂມ ຕ້ອນຮັບການມາຢາມຂອງ ມາຊີໂດເນຍ ໃນວັນທີ 24 ມີນາ ເຊິ່ງຖ້າເອົາຊະນະໄດ້ກໍຈະຜ່ານເຂົ້າໄປຫລິ້ນໃນຮອບຊີງຊະນະເລີດໃນວັນທີ 29 ມີນາ ເພື່ອຊີງໂຄຕ້າຮອບສຸດທ້າຍບານເຕະໂລກທີ່ປະເທດກາຕາ ໃນໄລຍະທ້າຍປີນີ້.

ດ້ວຍເຫດນີ້ ປະທານບານເຕະອີຕາລີ ຈຶ່ງອອກມາຮຽກຮ້ອງໃຫ້ມີການເລື່ອນເກມລີກໃນໄລຍະທ້າຍອາທິດກ່ອນຫນ້າເກມເພລອອບອອກໄປ ເພື່ອໃຫ້ເວລາ ໂຣແບໂຕ ມັນຊິນີ ຜູ້ຈັດການທີມຊາດອີຕາລີ ໃນການກຽມທີມສູ້ເສິກສຳຄັນຫລາຍຂຶ້ນ ໂດຍກ່າວວ່າ : ‘‘ ເຮົາໄດ້ຮ້ອງຂໍໃຫ້ມີການເລື່ອນເກມລີກອອກໄປ ແລະ ຫວັງວ່າລີກຈະໃຫ້ການອະນຸມັດ ເພື່ອໃຫ້ ໂຣແບໂຕ ມັນຊິນີ ຜູ້ຈັດການທີມຊາດອີຕາລີ ມີເວລາເພີ່ມຂຶ້ນອີກ 2-3 ມື້ ໃນການກຽມທີມ ເພາະມັນຄົງບໍ່ແມ່ນເລື່ອງດີແນ່ນອນ ຫາກອີຕາລີ ບໍ່ຜ່ານເຂົ້າຮອບສຸດທ້າຍໃນລາຍການທີ່ເປັນເຫມື່ອນສັນຍະລັກຂອງບານເຕະໃນປະເທດຂອງເຮົາ ’’.

‘‘  ເຮົາຈຳເປັນຕ້ອງຜ່ານເຂົ້າຮອບສຸດທ້າຍໃຫ້ໄດ້ ແລະ ເຮົາກໍມີສັກກະຍາພາບທີ່ຈະເຮັດໄດ້ ເຮົາເຮັດໃຫ້ຕົນເອງຕ້ອງພົບກັບວຽກຍາກ ຈາກການພາດຍິງລູກໂທດສຳຄັນເຖິງ 2 ຄັ້ງ (ໃນນັດທີ່ແຂ່ງກັບ ສະວິດເຊີແລນ ທັງເກມໃນບ້ານ ແລະ ນອກບ້ານ) ແຕ່ຫລາຍຄັ້ງທີ່ເຮົາຕ້ອງພົບກັບສະຖານະການຍາກລຳບາດ ອີຕາລີ ກໍມັກຈະຜ່ານໄປໄດ້ສະເຫມີ ’’ ກຣາວີນາ ກ່າວ.