ຕົ້ນເດືອນມີນາ ໜ້ານີ້ ສປປ ລາວ ຈະເລີ່ມສັກວັກຊີນໃນເດັກກຸ່ມອາຍຸ 6 ຫາ 11 ປີ
ວັນທີ 15 ກຸມພາ 2022 ນີ້, ທ່ານ ດຣ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ລາຍງານວ່າ: ພາຍຫລັງ ກະຊວງສາທາລະນະສຸກໄດ້ຮຽກຮ້ອງໃຫ້ຄະນະກຳມະການວັກຊີນແຫ່ງຊາດສຶກສາຜົນຂອງການທົດລອງສັກວັກຊີນປ້ອງກັນໂຄວິດ-19 ໃນເດັກ ຢູ່ແຂວງຜົ້ງສາລີເພື່ອຄົ້ນຄວ້າເປັນບ່ອນອີງໃຫ້ແກ່ການຂະຫຍາຍການສັກວັກຊີນຂອງເດັກໃນຂອບເຂດທົ່ວປະເທດ, ເຊິ່ງມາຮອດປັດຈຸບັນເລີ່ມຕົ້ນເດືອນມີນາໜ້ານີ້ຈະມີການຂະຫຍາຍການສັກວັກຊີນໃນກຸ່ມເດັກອາຍຸ 6 ຫາ 11 ປີ.
ທ່ານ ດຣ ຣັດຕະນະໄຊ ເພັດສຸວັນ ກ່າວອີກວ່າ: ການທີ່ພົນລະເມືອງໄດ້ສັກວັກຊີນໂຄວິດ-19 ຄົບທຸກເຂັມທີ່ແນະນໍາ ຄືການສ້າງພູມຄຸ້ມກັນໃຫ້ຮ່າງກາຍ ເພື່ອຫລຸດຜ່ອນຄວາມອັນຕະລາຍຈາກການຕິດເຊື້ອໂຄວິດ-19 ແລະ ມາຮອດປັດຈຸບັນ, ທົ່ວປະເທດ ສັກວັກຊີນເຂັມທີ 1 ສັກໄດ້ 4.823.889 ກວມ 65,74% ແລະ ທຸກເຂັມທີ່ແນະນໍາ 4.245.954 ກວມ 57,86%.
ສໍາລັບຈຸດບໍລິການສັກວັກຊິນຢູ່ນະຄອນຫລວງວຽງຈັນ ມີໂຮງໝໍມິດຕະພາບ, ມະໂຫສົດ, ເສດຖາທິລາດ, ໂຮງໝໍ 103, ໂຮງໝໍ 5 ເມສາ, ໂຮງໝໍເດັກ, ໂຮງໝໍແມ່ ແລະເດັກ ເກີດໃໝ່ ແລະ ໂຮງໝໍເມືອງ 9 ເມືອງ. ນອກນີ້ຍັງມີຢູ່ວັດຈີນດົງປ່າແຫລບບໍລິການແຕ່ວັນຈັນ-ສຸກ, ສ່ວນຈຸດບໍລິການຢູ່ບັນດາແຂວງ ມີໂຮງໝໍແຂວງ, ໂຮງໝໍເມືອງ ແລະ ຈຸດທີ່ຄະນະສະເພາະກິດກໍານົດໄວ້.
