ຫວຽດນາມກຽມຢຸດມາດຕະການເຂັ້ມງວດໂຄວິດ ສຳລັບຖ້ຽວບິນລະຫວ່າງປະເທດ ເລັ່ງຟື້ນຈຳນວນຖ້ຽວບິນກັບສູ່ລະດັບກ່ອນໂຄວິດ

ໜັງສືພິມ Tuoi Tre ຂອງຫວຽດນາມ ລາຍງານວ່າ: ຫວຽດນາມຈະຍົກເລີກມາດຕະການຈຳກັດເພື່ອປ້ອງກັນໂຄວິດ ສຳລັບຖ້ຽວບິນລະຫວ່າງປະເທດທັງໝົດ ເລີ່ມແຕ່ວັນທີ 15 ກຸມພາ ພ້ອມທັງຍົກເລີກການຈຳກັດຈຳນວນຖ້ຽວບິນ ແລະ ຟື້ນຈຳນວນຄວາມຖີ່ຂອງຖ້ຽວບິນໃຫ້ກັບສູ່ລະດັບກ່ອນໂຄວິດ.

“ຫວຽດນາມຈະຍົກເລີກຂໍ້ຈຳກັດຕ່າງໆ ໃນຖ້ຽວບິນລະຫວ່າງປະເທດນັບແຕ່ວັນທີ 15 ກຸມພາ ຄວາມຖີ່ຂອງຖ້ຽວບິນຈະກັບສູ່ລະດັບກ່ອນເກີດພະຍາດລະບາດ” ໜັງສືພິມ Tuoi Tre ລາຍງານ ໂດຍອ້າງຂໍ້ມູນຈາກ Dinh Viet Son ຮອງຜູ້ອຳນວຍການສຳນັກງານການບິນພົນລະເຮືອນຂອງຫວຽດນາມ.

ທັງນີ້, ຫວຽດນາມເປັນໜຶ່ງໃນປະເທດອາຊຽນທີ່ມີມາດຕະການຄວບຄຸມຊາຍແດນເຂັ້ມງວດນັບແຕ່ເກີດການລະບາດໃຫຍ່ທົ່ວໂລກຂອງໂຄວິດ ເຊິ່ງໃນໄລຍະທຳອິດນັ້ນ ຫວຽດນາມປະສົບຜົນສຳເລັດໃນການຢັບຢັ້ງສະຖານະການລະບາດ ໂດຍໃຊ້ມາດຕະການປ້ອງກັນທີ່ຮຸນແຮງ ແລະ ວ່ອງໄວເຊັ່ນ: ການລັອກດາວ ເຊິ່ງສົ່ງຜົນກະທົບຢ່າງໜັກຕໍ່ທຸລະກິດ ໂດຍສະເພາະຂະແໜງການທ່ອງທ່ຽວທີ່ສ້າງລາຍຮັບໄດ້ 10% ຂອງ GDP.

ຂະນະທີ່ລາຍງານລະບຸວ່າ: ຫວຽດນາມໄດ້ແຈ້ງຕໍ່ຫລາຍປະເທດກ່ຽວກັບການຍົກເລີກມາດຕະການໂຄວິດດັ່ງກ່າວ ເຊິ່ງຕອນນີ້ມີພຽງຈີນທີ່ຍັງບໍ່ຕອບຮັບຈະຟື້ນຖ້ຽວບິນການຄ້າກັບຫວຽດນາມ.

ກ່ອນໜ້ານີ້ ຫວຽດນາມໄດ້ເລີ່ມທະຍອຍກັບມາໃຫ້ບໍລິການຖ້ຽວບິນລະຫວ່າງປະເທດກັບ 15 ປະເທດນັບແຕ່ຕົ້ນປີຜ່ານມາ ໂດຍຫລຸດຜ່ອນມາດຕະການຈຳກັດຕ່າງໆເຊັ່ນ: ຫລຸດໄລຍະເວລາກັກຕົວສຳລັບຜູ້ໂດຍສານທີ່ສັກວັກຊີນແລ້ວເຫລືອພຽງ 3 ວັນ.

ການຕັດສິນໃຈຢຸດມາດຕະການຈຳກັດທີ່ເຂັ້ມງວດສຳລັບຖ້ຽວບິນລະຫວ່າງປະເທດຂອງຫວຽດນາມ ມີຂຶ້ນທ່າມກາງສະຖານະການແພ່ລະບາດຂອງໂຄວິດໃນປະເທດຍັງທະວີຄວາມຮຸນແຮງ.

ໂດຍໃນວັນທີ 13 ກຸມພາ ກະຊວງສາທາລະນະສຸກຫວຽດນາມລາຍງານວ່າ: ພົບຜູ້ຕິດເຊື້ອໃໝ່ເພີ່ມຂຶ້ນ 26.000 ກວ່າຄົນ ສົ່ງຜົນໃຫ້ຈຳນວນຜູ້ຕິດເຊື້ອສະສົມນັບແຕ່ເລີ່ມລະບາດສູງກວ່າ 2,5 ລ້ານຄົນ ແລະ ມີຜູ້ເສຍຊີວິດສະສົມແລ້ວເກືອບ 39.000 ຄົນ. ຂະນະທີ່ປະຊາຊົນຫວຽດນາມເກືອບ 98% ຈາກທັງໝົດປະມານ 98 ລ້ານຄົນໄດ້ຮັບການສັກວັກຊີນແລ້ວຢ່າງໜ້ອຍ 2 ໂດສ.

ອ້າງອີງ:

https://www.aljazeera.com/economy/2022/2/14/vietnam-to-end-covid-curbs-on-international-flights