6 ວຽກງານຈຸດສຸມືິ້ຮອງນາຍົກລັດຖະມົນຕີເນັ້ນໃຫ້ ຖວທ ສືບຕໍ່ພັດທະນາ
ໂອກາດນີ້ທີ່ ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ຜູ້ຊີ້ນໍາຂົງເຂດວຽກງານວັດທະນະທໍາ-ສັງຄົມ ເຂົ້າຮ່ວມພິທີປິດກອງປະຊຸມ ວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ທົ່ວປະເທດ ປະຈຳປີ 2021 ແລະ ທິດທາງແຜນການປີ 2022 ໃນວັນທີ 11 ກຸມພາ ນີ້ ທີ່ຫໍວັດທະນະທຳແຫ່ງຊາດ, ທ່ານໄດ້ເນັ້ນໃຫ້ ຖວທ ສືບຕໍ່ພັດທະນາ 6 ວຽກງານຈຸດສຸມໃນຕໍ່ໜ້າ.
ທ່ານ ກິແກ້ວ ໄຂຄຳພິທູນ ກ່າວວ່າ: ຄຽງຄູ່ກັບຜົນງານທີ່ ຖວທ ຍາດມາໄດ້ໃນ 1 ປີຜ່ານມານັ້ນ ກໍບໍ່ອາດປາສະຈາກໄດ້ຈຸດອ່ອນ ແລະ ຂໍ້ຄົງຄ້າງ ຈຳນວນໜຶ່ງ ທີ່ຕ້ອງພ້ອມກັນເອົາໃຈໃສ່ໃນການປັບປຸງ ແລະ ຊອກຫາວິທີທາງແກ້ໄຂ ສິ່ງເຫຼົ່ານັ້ນໃຫ້ຫຼຸດໜ້ອຍລົງເທື່ອລະ ກ້າວ, ສະນັ້ນ ການພັດທະນາວຽກງານ ຖວທ ຈຶ່ງຮຽກຮ້ອງໃຫ້ທົ່ວພະນັກງານ ຖວທ ເອົາໃຈໃສ່ພັດທະນາຕື່ມ 6 ວຽກງານຈຸດສຸມຕໍ່ໜ້າຄື:
1. ຄະນະພັກ-ຄະນະນຳທຸກຂັ້ນຕ້ອງຖືເອົາການນໍາພາ ການເມືອງແນວຄິດເປັນບັນຫາສໍາຄັນ, ຕິດພັນກັບການເອົາໃຈໃສ່ຄົ້ນຄວ້າ ແລະ ກຳແໜ້ນແນວທາງນະໂຍບາຍ, ມະຕິ, ຄໍາສັ່ງ ແລະ ລະບຽບການຂອງພັກ-ລັດວາງອອກໃຫ້ເລິກເຊິ່ງ, ມີຄວາມເປັນເອກະພາບທາງດ້ານແນວຄິດ ຕໍ່ກັບແນວທາງນະໂຍບາຍຂອງພັກ-ລັດ ເພື່ອພ້ອມກັນຊີ້ນໍາ-ນໍາພາ ຈັດຕັ້ງຜັນຂະຫຍາຍ ເຂົ້າສູ່ການບໍລິຫານຄຸ້ມຄອງລັດ ສອດຄ່ອງກັບການຈັດຕັ້ງປະຕິບັດແຜນດຳເນີນງານຕ່າງໆ ຜ່ານປະຕູດຽວໃຫ້ເປັນລະບົບແຕ່ສູນກາງລົງຮອດທ້ອງຖິ່ນ ຕາມແຜນການທີ່ວາງໄວ້.
2. ເອົາໃຈໃສ່ປັບປຸງດ້ານກົງຈັກການຈັດຕັ້ງ ແລະ ການກໍ່ສ້າງບຸກຄາລະກອນ, ໃຫ້ຄົ້ນຄວ້າໂຄງປະກອບການຈັດຕັ້ງໃຫ້ຈະແຈ້ງ, ຮັດກຸມ ແລະ ສອດຄ່ອງກັບໜ້າວຽກຕົວຈິງ, ຍົກລະດັບຄວາມຮູ້ ຄວາມສາມາດຂອງພະນັກງານ-ລັດຖະກອນ ທາງດ້ານທິດສະດີ ແລະ ວິຊາເພື່ອຮັບໃຊ້ໜ້າທີ່ການເມືອງ ໄປຕາມທິດພະນັກງານສືບທອດປ່ຽນແທນແຕ່ລະໄລຍະ, ກວດກາເບິ່ງຄືນບ່ອນໃດພະນັກງານເຫຼືອບໍ່ພໍ,ພະນັກງານບໍ່ມີຄຸນນະພາບກໍຕ້ອງແກ້ໄຂໃຫ້ໄວ, ຄຽງຄູ່ກັບການສັບຊ້ອນຈັດວາງ, ຍົກຍ້າຍພະນັກງານ ຕາມຄວາມຮຽກຮ້ອງຕ້ອງການຂອງວຽກງານຕົວຈິງ ແລະ ແທດເໝາະກັບຄວາມຮູ້, ຄວາມສາມາດ ວິຊາສະເພາະ, ຜູ້ໜຶ່ງຕ້ອງເຮັດໄດ້ຫຼາຍວຽກ ຍ້ອນປັດຈຸບັນໂກຕ້າພະນັກງານ-ລັດຖະກອນ ມີຈໍາກັດ.
3. ໃຫ້ເອົາໃຈໃສ່ຄົ້ນຄວ້າການສ້າງກົດໝາຍ ແລະ ປັບປຸງນິຕິກາໃຕ້ກົດໝາຍເພື່ອເປັນເຄື່ອງມື ຄຸ້ມລັດ-ຄຸ້ມຄອງສັງຄົມ ຖືວ່າເປັນວຽກງານຈຸດສຸມອັນໜຶ່ງທີ່ ກະຊວງ ຖວທ ຕ້ອງໄດ້ຄົ້ນຄວ້າເບິ່ງຄືນວ່າມາຮອດປັດຈຸບັນມີກົດໝາຍຈັກສະບັບ ແລະ ລະບຽບການອັນໃດແດ່ແລ້ວ ທີ່ນໍາໃຊ້ເຂົ້າໃນວຽກງານຕົວຈິງ ແລະ ມີຄວາມເໝາະສົມແລ້ວບໍ ຫຼື ມີຄວາມຈໍາເປັນຕ້ອງໄດ້ປັບປຸງ ແລະ ອັນໃດບໍ່ທັນມີຈະຕ້ອງໄດ້ສ້າງຂຶ້ນໃໝ່ ເພື່ອນໍາສະເໜີລັດຖະບານພິຈາລະນາ.
4. ໃຫ້ເອົາໃຈໃສ່ ປັບປຸງຍົກລະກັບວຽກງານສື່ມວນຊົນໃຫ້ເປັນທັນສະໄໝ ດ້ວຍການຫັນປ່ຽນ ຈາກລະບົບອະນາລັອກ ໄປສູ່ລະບົບດີຈີຕອນ, ການຂະຫຍາຍຕາໜ່າງໂທລະໂຄ່ງໄປສູ່ຊຸມຊົນທ້ອງຖິ່ນ ເຂດຫ່າງໄກສອກຫຼີກໃຫ້ໄດ້ເຂົ້າເຖິງຂໍ້ມູນຂ່າວສານ, ນໍາໃຊ້ສື່ແບບໃໝ່ໃຫ້ຫຼາຍຂຶ້ນ ເພື່ອໂຄສະນາເຜີຍແຜ່ແນວທາງນະໂຍບາຍຂອງພັກ ແລະ ກົດໝາຍຂອງລັດ, ຕອບໂຕ້ຈາກການໂຄສະນາສິ່ງທີ່ບິດເບືອນຂໍ້ມູນຕົວຈິງ ຕໍ່ແນວທາງນະໂຍບາຍຂອງພັກ-ລັດ, ປັບປຸງເນື້ອຫາສາລະຂອງບົດ-ຂ່າວ, ບົດຄວາມ, ບົດສາລະຄະດີ ແລະ ລາຍການບັນເທີງຕ່າໆໆໃຫ້ມີເນື້ອໃນໂນມນ້າວ ເພື່ອດຶງດູດ, ຈູງໃຈຜູ້ອ່ານ, ຜູ້ຊົມ ແລະ ຜູ້ຟັງ, ຄົ້ນຄວ້າປະຕິບັດນະໂຍບາຍຍ້ອງຍໍສັນລະເສີນບຸກຄົນ, ສັງຄົມ ແລະ ໜ່ວຍງານທີ່ມີຜົນງານດີເດັ່ນຕາມຄວາມເປັນຈິງ，ບຳລຸງສ້າງພະນັກງານໃນຖັນແຖວສື່ມວນຊົນ ທາງດ້ານເຕັກນິກວິຊາການ ແລະ ຈັນຍາບັນຂອງສື່ໃຫ້ມີຄວາມໜັກແໜ້ນເຂັ້ມແຂງ ພ້ອມທັງຍາດແຍ່ງເອົາການຮ່ວມມື, ການຊ່ວຍເຫຼືອຈາກພາຍໃນ ແລະ ຕ່າງປະເທດ.
5. ໃຫ້ເອົາໃຈໃສ່ຊຸກຍູ້ສົ່ງເສີມຂະບວນການສ້າງຄອບຄົວ ແລະ ບ້ານວັດທະນະທຳ ຕ້ອງມີຄຸນນະພາບຢ່າງແທ້ຈິງ, ການສ້າງແບບແຜນດຳລົງຊີວິດຕິດພັນກັບການຈັດຕັ້ງຜັນຂະຫຍາຍ ມະຕິເລກທີ 25 ຂອງກົມການເມືອງ ວ່າດ້້ວຍການເພີ່ມທະວີການນໍາພາຂອງພັກ ຕໍ່ວຽກງານວັດທະນະທໍາໄລຍະ ໃໝ່, ເສີມຂະຫຍາຍຄຸນຄ່າວັດທະນະທໍາ ທີ່ເປັນເອກະລັກຂອງຊາດ ແລະ ພັດທະນາຄວາມສີວິໄລ ດ້ານຈິດໃຈຂອງສັງຄົມ ບົນພື້ນຖານການອະນຸລັກຟື້ນຟູວັດທະນະທໍາ, ຮີດຄອງປະເພນີອັນດີງາມຂອງຊາດ ແລະ ຂອງຊົນເຜົ່າ ໄປພ້ອມກັບການແກ້ໄຂຕີຖອຍສິ່ງຫຼ້າຫຼັງງົມງວາຍ, ສົ່ງເສີມເອກະລັກດ້ານສິລະປະວັນນະຄະດີ, ພູມປັນຍາບົ່ມຊ້ອນເຂົ້າໃນການສ້າງຜະລິດຕະພັນວັດທະນະທໍາໃຫ້ມີຫຼາກຫຼາຍສີສັນຫຼາຍຮູບແບບ; ເສີມຂະຫຍາຍ, ປົກປັກຮັກສາ, ຄຸ້ມຄອງມໍລະດົກວັດທະນະທໍາຂອງຊາດ ໂດຍສະເພາະແມ່ນສຸມໃສ່ການນໍາສະເໜີເອົາພູຫີນໜາມໜໍ່, ຟ້ອນລຳວົງລາວ ແລະ ສິ້ນລາຍມາກລາວ ເຂົ້າເປັນມໍລະດົກໂລກ; ສ້າງພື້ນຖານໂຄງລ່າງທາງດ້ານວັດທະນະທໍາ ເປັນຕົ້ນຫໍສະໝຸດ, ຫໍພິພິທະພັນ, ຫໍມູນເຊື້ອ, ອານຸສາວະລີ, ສະໂມສອນວັດທະນະທໍາ ໃຫ້ຄົບຖ້ວນ ແລະ ກວ້າງຂວາງ. ນອກຈາກນີ້, ຕ້ອງໄດ້ກໍ່ສ້າງພະນັກງານ ຜູ້ທີ່ມີພອນສະຫວັນ ດ້ານວັດທະນະທຳ ທັງພາກລັດ ແລະ ເອກະຊົນໃຫ້ມີຄວາມຍືນຍົງ ແລະ ຫຼາຍຂຶ້ນ, ໄປຄຽງຄູ່ກັບການປະຕິບັດນະໂຍບາຍ ຕໍ່ຜູ້ທີ່ມີຜົນງານຢ່າງສົມເຫດສົມຜົນ ແລະ ຖືກຕ້ອງຕາມຄວາມເປັນຈິງ.
6. ເອົາໃຈໃສໂຄສະນາ, ພັດທະນາ, ຄຸ້ມຄອງ ແຫຼ່ງທ່ອງທ່ຽວທາງດ້ານວັດທະນະທຳ, ປະຫວັດສາດ, ທຳມະຊາດ, ທ່ອງທ່ຽວກະສິກໍາ ແລະ ການທ່ອງທ່ຽວແບບຍືນຍົງປະຊາຊົນມີສ່ວນຮ່ວມ, ປະສານສົມທົບກັບພາກສ່ວນທີ່ກ່ຽວຂ້ອງທັງພາກລັດ ແລະ ບັນດາຫົວໜ່ວຍທຸລະກິດ ຈັດຕັ້ງປະຕິບັດແຜນຟື້ນຟູການທ່ອງທ່ຽວ, ຊຸກຍູ້ແນະນໍາບັນດາຫົວໜ່ວຍທຸລະກິດທ່ອງທ່ຽວ, ປັບປຸງສະຖານ ທີ່ທ່ອງທ່ຽວ ເລະ ການບໍລິການສະຖານທີ່ພັກແຮມ, ຮ້ານອາຫານໃຫ້ມີຄຸນນະພາບ, ສ້າງກິດຈະກຳ ແລະ ຜະລິດຕະພັນການທ່ອງທ່ຽວໃຫ້ມີຄວາມຫຼາກຫຼາຍ ຕິດພັນກັບການທ່ອງທ່ຽວວັດທະນະທຳຂອງບັນດາເຜົ່າ ແລະ ກະສິກຳ ເພື່ອສົ່ງເສີມການທ່ອງທ່ຽວ “ລາວທ່ຽວລາວ ຊົມໃຊ້ຜະລິດຕະພັນລາວ” ແລະ ຄຸ້ມຄອງບັນດາຫົວໜ່ວຍທຸລະກິດຕ່າງໆໃຫ້ເຂົ້າສູ່ລະບຽບການ.
