ແມນຢູ ວາງແຜນລ່າ 3 ເປົ້າຫມາຍ ດາວຍິງຄົນໃຫມ່

ແມນເຊສເຕີ ຢູໄນເຕັດ ທີມດັງແຫ່ງ ພຣີເມຍລີກ ອັງກິດ ຕົກເປັນຂ່າວວາງແຜນໄລ່ລ່າຕົວກອງຫນ້າຄົນໃຫມ່ມາຮ່ວມທີມ ໂດຍມີ 3 ຊື່ເປົ້າຫມາຍຫລ້າສຸດ ເຊ່ັນ : ເອີລິງ ເບຣົາ ຮາແລນ ກອງຫນ້າ ໂບຣຸສເຊຍ ດອດມຸນ, ແຮຣີ ເຄນ ດາວຍິງ ທັອດແນມ ຮັອດສະເປີ ແລະ ໂດມິນິກ ຄັລເວີດ ລູວິນ ດາວຍິງເອຟເວີຕັນ ມາຮ່ວມທີມ.

ສຳລັບແມນເຊສເຕີ ຢູໄນເຕັດ ຫາກໍປ່ອຍ ອອງໂຕນີ ມາກຊີຢາລ ອອກໄປໃຫ້ ເຊບີຢາ ຢືມຕົວຈົນຈົບລະດູການ ເຊິ່ງນັກເຕະບໍ່ປິດໂອກາດທີ່ຈະຍ້າຍທີມຢ່າງຖາວອນ ລວມເຖິງ ເມສັນ ກຣີນວູດ ສຸດຍອດກອງຫນ້າດາວຮຸ່ງພຸ່ງແຮງ ໃກ້ຫມົດອະນາຄົດກັບທີມ ເນື່ອງຈາກກໍ່ຄະດີທຳຮ້າຍຮ່າງກາຍແຟນສາວ.

ສ່ວນ 2 ກອງຫນ້າຕົວເກັ່ງເຊ່ັນ ຄຣິສຕຽນໂນ ໂຣນັລໂດ ແລະ ເອດິນສັນ ຄາວານີ ກໍເລີ່ມຫມົດປະສິດທິພາບລົງທຸກມື້ ໂດຍ ໂຣນັລໂດ ອາຍຸເຂົ້າໄປເຖິງ 37 ປີຫມາດໆ ສ່ວນ ຄາວານີ ອາຍຸ  35 ປີ ໃນວັນແຫ່ງຄວາມຮັກນີ້ ນັ້ນຈຶ່ງເຮັດໃຫ້ທີມຕ້ອງການຈອມຖະຫລ່ົມປະຕູຄົນໃຫມ່ເຂົ້າມາຍົກລະດັບໃນແດນຫນ້າໄລຍະລະດູການນີ້ ເພື່ອກັບມາໄລ່ລ່າແຊ໊ມອີກຄັ້ງ.