ໄນກີ ບໍ່ມີຄ່າຈີກສັນຍາໃຫ້ ກຣີນວູດ

ເດລີ ເມລ ສື່ຊື່ດັງຂອງອັງກິດລາຍງານວ່າ ເມສັນ ກຣີນວູດ ກອງຫນ້າດາວດັບຂອງ ແມນເຊສເຕີ ຢູໄນເຕັດ ທີມດັງພຣີເມຍລີກ ອັງກິດຈະບໍ່ໄດ້ຮັບເງິນຊົດເຊີຍຈາກ ໄນກີ ຜະລິດຕະພັນກິລາຊື່ດັງທີ່ປະກາດຍົກເລີກສັນຍາໃນການເປັນຜູ້ສະຫນັບສະຫນູນ ຫລັງຕົກເປັນຜູ້ຕ້ອງຫາໃນຄະດີດັງ.

ກ່ອນຫນ້ານີ້ ເມສັນ ກຣີນວູດ ຖືກຕຳຫລວດຈັບກຸມພ້ອມຂໍ້ຫາທຳຮ້າຍຮ່າງກາຍ, ຂົ່ມຂືນ, ລ່ວງລະເມີດທາງເພດ ແລະ ຂູ່ຂ້າ ແຮລຽດ ຣ໊ອບສັນ ອະດີດແຟນສາວ ເຖິງວ່າຫາກໍຈະໄດ້ຮັບການປະກັນຕົວລະຫວ່າງການສືບສວນເພີ່ມຕື່ມກໍຕາມ ແຕ່ເວລານີ້ ແມນຢູ ກໍໄດ້ລົງໂທດດ້ວຍການລົງສະຫນາມ ແລະ ຝຶກຊ້ອມຮ່ວມກັບທີມໂດຍບໍ່ມີກຳນົດ.

ເດລີ ເມລ ເປີດເຜີຍວ່າ ລາຍລະອຽດໃນສັນຍາຂອງ ໄນກີ້ ທີ່ມີຕໍ່ ກຣີນວູດ ລະບຸວ່າສາມາດຍຸດຄວາມສຳພັນທັງຫມົດໄດ້ໂດຍບໍ່ຕ້ອງຈ່າຍຄ່າຊົດເຊີຍໃດໆ ອັນເນື່ອງມາຈາກຄວາມເສຍຫາຍດ້ານຊື່ສຽງ ແລະ ການສູນມູນຄ່າທາງການຕະຫລາດ ເຊິ່ງດາວເຕະອາຍຸ 20 ປີ ກໍຈະຫມົດໂອກາດໃນການຕໍ່ສັນຍາຕາມກຳນົດເກ່ົາໃນປີຫນ້າ ສົ່ງຜົນໃຫ້ລາວຈະສູນເສຍລາຍໄດ້ໄປອີກຫລາຍລ້ານປອນ.

ທັງນີ້ ເງິນຈຳນວນມະຫາສານທີ່ ກຣີນວູດ ຈະຍັງໄດ້ຮັບຈາກ ໄນກີ ຄື ໂບນັສທີ່ມີການຄ້າງຊຳລະ ແຕ່ລາວອາດຕ້ອງຄືນລາຍໄດ້ບາງສ່ວນໃນປີນີ້ໃຫ້ກັບ ຜະລິດຕະພັນກິລາຊື່ດັງ ຫາກໄດ້ຮັບການຈ່າຍເງິນລ່ວງຫນ້າໄປແລ້ວ.

ສຳລັບລາຍໄດ້ແຫລ່ງດຽວຂອງ ກຣີນວູດ ໃນເວລານີ້ ຄື ຄ່າເມື່ອຍທີ່ໄດ້ຮັບຈາກ ແມນຢູ ຕາມສັນຍາອາທິດລະ 75,000 ປອນ ເຖິງຍັງຢູ່ໃນລະຫວ່າງການພັກງານບໍ່ມີກຳນົດກໍຕາມ ແຕ່ຫາກຖືກຕັດສິນວ່າຄວາມແທ້ ແລະ ໄດ້ຮັບໂທດເຂົ້າຄຸກ ແມນຢູ ກໍສາມາດຍົກເລີກສັນຍາ ແລະ ງົດຈ່າຍຄ່າຈ້າງໄດ້ທັນທີ ສ່ວນກໍລະນີທີ່ລອດພົ້ນຈາກຄວາມຜິດ ຫາກຈະຍົກເລີກສັນຍາກໍຕ້ອງມີການຕົກລົງກັນລະຫວ່າງສະໂມສອນກັບຕົວຜູ້ຫລິ້ນກ່ອນ.