ປູກໄມ້ ຕ້ອງໃສ່ໃຈບົວລະບັດຮັກສາ

ບົດຄວາມ: ລາວພັດທະນາ

ເຖິງວ່າວັນປູກຕົ້ນໄມ້ແຫ່ງຊາດທີ 1 ມິຖຸນາ ຍັງອີກດົນ, ແຕ່ເພື່ອອະນາຄົດອັນສົດໃສໃຫ້ແກ່ລູກຫລານທີ່ເກີດໃໝ່ໃຫຍ່ລຸນແລ້ວ ບໍ່ຕ້ອງລໍຖ້າມື້ຖ້າຍາມ ເຮັດໄດ້ທຸກມື້ທຸກວັນ. ເມື່ອເວົ້າເຖິງການປູກຕົ້ນໄມ້ນອກຈາກປູກເປັນສິນຄ້າ, ເປັນການປົກປັກຮັກສາສິ່ງແວດລ້ອມທີ່ພວກເຮົາຕ່າງກໍຮູ້ດີວ່າ ປ່າໄມ້ຄືຄືກົກຄືເຫງົ້າພະລັງ ຂອງລະບົບນິເວດທຳມະຊາດ, ມີບົດບາດສຳຄັນທີ່ສຸດຕໍ່ການພັດທະນາເສດຖະກິດ-ສັງຄົມແຫ່ງຊາດລວມທັງປ້ອງກັນການປ່ຽນແປງດິນຟ້າອາກາດອີກຕ່າງຫາກແລ້ວຍັງເປັນການປູກຝັງສາມັນສຳນຶກໃຫ້ອະນຸຊົນ, ເຍົາວະຊົນຮຸ່ນຫລັງ ຮັກ ແລະ ຜູກພັນກັບທຳມະຊາດ.

​ການປູກຕົ້ນໄມ້ບໍ່ວ່າຈະປູກເພື່ອເປັນຮົ່ມ, ປະດັບເອ້, ເພື່ອກິນໝາກ ຫລື ເພື່ອເປັນເສດຖະກິດບໍ່ຈຳເປັນ ຕ້ອງປູກສະເພາະໃນວັນປູກຕົ້ນໄມ້ແຫ່ງຊາດທີ 1 ມິຖຸນາເທົ່ານັ້ນ, ພວກເຮົາສາມາດປູກໄດ້ທຸກມື້ຂໍພຽງແຕ່ ບົວລະບັດຮັກສາໃຫ້ດີຄືກັບການລ້ຽງລູກ ທີ່ບໍ່ໃຫ້ຮີ້ນໄຕ່ ບໍ່ໃຫ້ໄຮຕອມ ເວົ້າລວມແລ້ວຄືການເອົາການເອົາງານນັ້ນເອງ ຈຶ່ງຈະເຮັດໃຫ້ຕົ້ນໄມ້ທີ່ປູກເຕີບໃຫຍ່ສວຍງາມ. ຂະນະທີ່ຜ່ານມາມີຫລາຍບ່ອນເຮັດໄດ້ດີ, ແຕ່ເມື່ອສຸມໃສ່ຍູ້ແຮງການປູກແລ້ວ ສິ່ງຈຳເປັນ ແລະ ຂາດບໍ່ໄດ້ທັງເປັນປັດໄຈສຳຄັນທີ່ສຸດເພື່ອໃຫ້ໄມ້ທີ່ປູກໄປແລ້ວນັ້ນ ລອດ ຄືການກະຕຸ້ນໃຈໃຫ້ເກີດຄວາມຮັບຜິດຊອບບົວລະບັດຮັກສາຫລັງປູກເພື່ອສາມາດຕີຖອຍພາບປູກໃສ່ແຕ່ຂຸມເກົ່າບໍ່ເວັ້ນແຕ່ລະປີ. ຢ້ອນໄປຊຸມປີຜ່ານມາຫລັງການປູກ ມັກໄດ້ຍິນຫາງສຽງຂອງສັງຄົມວ່າ: ປູກໄມ້ຍັງບໍ່ທັນມີປະສິດທິຜົນພໍເທົ່າໃດ. ຍ້ອນຫຍັງ?ຍ້ອນມີແຕ່ປູກ ແຕ່ບໍ່ທັນບົວລະບັດຮັກສາທີ່ດີປູກເປັນພຽງພິທີການ…ເຮັດແນວໃດມັນຈຶ່ງຈະສົມກັບການລົງທຶນຢ່າງມະຫານສານຂອງພັກ-ລັດຖະ ບານ.

ສປປ ລາວ ໄດ້ກຳນົດຄາດໝາຍສູ້ຊົນແຕ່ລະໄລຍະເພື່ອຍົກລະດັບການປົກຫຸ້ມຂອງປ່າໄມ້ໃນທົ່ວປະເທດ ຕາມທິດພັດທະນາແບບຍືນຍົງ ແລະ ການເຕີບໂຕສີຂຽວບໍ່ວ່າຈະເປັນປ່າສະຫງວນ, ປ່າປ້ອງກັນ, ປ່າຜະ ລິດ, ການຟື້ນຟູປ່າທຳມະຊາດ ແລະ ອື່ນໆ ໂດຍການສົ່ງເສີມທຸກພາກສ່ວນທົ່ວສັງຄົມຮ່ວມປູກຕາມທ່າ ແຮງ ແລະ ເງື່ອນໄຂຕົວຈິງ. ເປັນຫຍັງຈຶ່ງຕ້ອງຄຸ້ມຄອງ ແລະ ປົກປັກຮັກສາກໍເພື່ອໃຫ້ມັນເຕີບໃຫຍ່ກາຍ ເປັນປ່າໄມ້ທີ່ອຸດົມສົມບູນພ້ອມທັງສາມາດຕອບສະໜອງຄວາມຮຽກຮ້ອຕ້ອງການໄມ້ ແລະ ຜະລິດຕະພັນປ່າໄມ້ໄດ້ຢ່າງໝັ້ນຄົງທັງບໍ່ມີມື້ບົກແຫ້ງເປັນຈັກເທື່ອແລ້ວ. ເວົ້າແລ້ວຢໍ້າອີກ ປ່າໄມ້ມີບົດບາດສຳຄັນຕໍ່ການ ພັດທະນາເສດຖະກິດ-ສັງຄົມແຫ່ງຊາດ, ການຮັກສາດິນ, ແຫລ່ງນໍ້າ ແລະ ຊີວິດນານາພັນ ສ້າງໃຫ້ເກີດຄວາມອຸດົມສົມບູນ ແລະ ຍືນຍົງ.