ປີນີ້ ລາວຕັ້ງເປົ້າດຶງດູດນັກທ່ອງທ່ຽວພາກພື້ນ ແລະ ສາກົນເຂົ້າມາທ່ຽວໃຫ້ໄດ້ 1 ລ້ານກວ່າຄົນ

ທ່ານ ວັນສີ ກົວມົວ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວລາຍງານຕໍ່ກອງປະຊຸມວຽກງານ ຖວທ ທົ່ວປະເທດ ໃນວັນທີ 10 ກຸມພານີ້ ທີ່ນະຄອນຫລວງວຽງຈັນ ວ່າ:ປີ 2022, ລາວ

ເຮົາຈະສູ້ຊົນດຶງດູດນັກທ່ອງທ່ຽວເຂົ້າມາປະເທດໃຫ້ໄດ້ຫລາຍກວ່າ 1 ລ້ານເທື່ອຄົນ ເພື່ອສ້າງລາຍຮັບໃຫ້ໄດ້ຢ່າງໜ້ອຍ 271 ລ້ານກວ່າໂດລາສະຫະລັດ. ແຕ່ເຖິງຢ່າງໃດກໍຕ້ອງຮັບປະກັນມາດຕະການປ້ອງກັນ ໂຄວິດ-19 ໃຫ້ດີທີ່ສຸດ. ຂະນະດຽວກັນຈະເລັ່ງສົ່ງເສີມການທ່ອງທ່ຽວ

ພາຍໃນ ”ລາວທ່ຽວລາວ” ໃຫ້ບັນລຸຢ່າງຕໍ່າ1,9 ລ້ານ ເທື່ອຄົນ ແລະ ສ້າງເງິນໝູນວຽນໃຫ້ໄດ້ 153 ລ້ານກ່ວາໂດລາ, ບົນພື້ນຖານ ການປະສານສົມທົບກັບການສ້າງກິດຈະກຳຕ່າງໆລະຫວ່າງພາກລັດ ແລະ ພາກທຸລະກິດໃຫ້ມີປະສິດທິຜົນກວ່າເກົ່າ.