ລີເວີພູລ ພ້ອມຈ່າຍຄ່າຈີກສັນຍາຫວັງຄວ້າດາວຮຸ່ງບາເຊໂລນາ

ສື່ຊື່ດັງໃນສະເປນ ລາຍງານວ່າ ລີເວີພູລ ຍິນດີຈົກເງິນໃນກະເປົາເປັນຄ່າຈີກສັນຍາໃຫ້ກັບ ບາເຊໂລນາ ເພື່ອຄວ້າ ກາບີ ກອງກາງດາວຮຸ່ງມາຮ່ວມທີມ ໂດຍລີເວີພູລພ້ອມໃຫ້ຄ່າເມື່ອຍຊື້ໃຈຫລາຍກວ່າທີ່ໄດ້ຈາກບາເຊໂລນາເຖິງ 2 ເທົ່າ.

ລີເວີພູລສະໂມສອນຂວັນໃຈມະຫາຊົນແຫ່ງພຣີເມຍລີກ ອັງກິດ ກຽມຈ່າຍເງິນມະຫາສານເປັນຄ່າຈີກສັນຍາເພື່ອຫວັງຄວ້າ ກາບີ ກອງກາງດາວຮຸ່ງຄົນດັງຂອງ ບາເຊໂລນາ ຈາກການເປີດເຜີຍຂອງ ເອລ ນາຊີອອງນາລ ສື່ຊື່ດັງໃນປະເທດສະເປນ.

ນັກເຕະອາຍຸ 17 ປີ ມີສັນຍາປັດຈຸບັນຈົນເຖິງໄລຍະປີ 2023 ຫລື ປະມານ 18 ເດືອນເທົ່ານັ້ນ ແລະ ສະໂມສອນບາເຊໂລນາ ພະຍາຍາມຢ່າງເຕັມທີ່ເພື່ອກ່ອມ ກາບີ ຂະຫຍາຍສັນຍາສະບັບໃຫມ່ໃຫ້ໄດ້.

ຊາບີ ເອີນານເດສ ຜູ້ຈັດການທີມຄົນຫນຸ່ມໄຟແຮງພະຍາຍາມທີ່ຈະສ້າງ ບາເຊໂລນາ ຍຸກໃຫມ່ໂດຍມີ ກາບີ ເປັນແກນຫລັກ ແຕ່ດ້ວຍຜົນງານອັນດີເດັ່ນຂອງນັກເຕະເຮັດໃຫ້ບັນດາສະໂມສອນຍັກໃຫຍ່ໃນຢູຣບຢາກໄດ້ລາວໄປຮ່ວມທີມນຳ.

ຈາກການເປີດເຜີຍຂອງ ເອລ ນາຊີອອງນາລ ລາຍງານວ່າ ລີເວີພູລ ພ້ອມຍື່ນຂໍ້ສະເຫນີຄ່າເມື່ອຍຈຳນວນ 3 ລ້ານປອນ/ປີໃຫ້ກັບ ກາບີ ເຊິ່ງຫລາຍກວ່າ ບາເຊໂລນາ 2 ເທົ່າ ແລະ ຍິນດີທີ່ຈະຈ່າຍຄ່າຈີກສັນຍາ 42 ລ້ານປອນ ໃຫ້ບາເຊໂລນານຳອີກ.

ທັງນີ້ ກາບີ ສ້າງຜນງານດີມີຄຸນນະພາບກັບ ບາເຊໂລນາ ດ້ວຍການຍິງໄປແລ້ວ 2 ປະຕູ 3 ແອສຊິສ ຈາກການລົງສະຫນາມ 26 ເກມໃຫ້ກັບຕົ້ນສັງກັດໃນລະດູການນີ້.