ອັງກິດກຽມອອກກົດຄຸມເວັບໂປ້ ຕ້ອງຢືນຢັນອາຍຸກ່ອນເຂົ້ານຳໃຊ້ ກັນເດັກເຂົ້າເຖິງເນື້ອຫາບໍ່ເໝາະສົມ
ອັງກິດກຽມດັນຮ່າງກົດໝາຍເພື່ອຄວບຄຸມການເຂົ້າເຖິງເວັບໄຊລາມົກ ໂດຍຈະຕ້ອງມີຂະບວນການຢືນຢັນວ່າຜູ້ໃຊ້ມີອາຍຸ 18 ປີຂຶ້ນໄປ.
ວັນທີ 8 ກຸມພາ 2022, ສຳນັກຂ່າວບີບີຊີ (BBC) ລາຍງານວ່າ: ອັງກິດກຳລັງຊຸກຍູ້ຮ່າງກົດໝາຍດ້ານຄວາມປອດໄພອອນລາຍ (Online Safety Bill) ທີ່ຈະບັງຄັບໃຫ້ເວັບໄຊຮູບເງົາສຳລັບຜູ້ໃຫຍ່ ຕ້ອງມີການຢືນຢັນອາຍຸຂອງຜູ້ໃຊ້ກ່ອນເຂົ້າເຖິງເນື້ອຫາ ເປັນການເພີ່ມການປ້ອງກັນບໍ່ໃຫ້ເດັກເຂົ້າເຖິງເນື້ອຫາທີ່ບໍ່ເໝາະສົມ.
ໂດຍມາດຕະການທີ່ຈະນຳມາໃຊ້ນີ້ ຈະເປັນການກອງໃຫ້ຜູ້ທີ່ມີອາຍຸເກີນ 18 ປີສາມາດເຂົ້ານຳໃຊ້ໄດ້ເທົ່ານັ້ນ ເຊິ່ງອາດຈະໃຊ້ຮູບແບບຂອງການຢືນຢັນບັດເຄຣດິດ ຫລື ໃຊ້ບໍລິການຂອງບຸກຄົນທີສາມ (third-party service) ເພື່ອຄັດກອງດ້ວຍວິທີອື່ນໆ.
ຖ້າຜູ້ໃຫ້ບໍລິການຄົນໃດບໍ່ປະຕິບັດຕາມ ຈະມີໂທດປັບໄໝສູງສຸດເຖິງ 10% ຂອງລາຍຮັບທົ່ວໂລກ ຫລື ອາດມີການບລັອກບໍ່ໃຫ້ເຂົ້າໃຊ້ໃນອັງກິດໄດ້.
ຄາດວ່າຮ່າງກົດໝາຍດ້ານຄວາມປອດໄພອອນລາຍຈະເຂົ້າສູ່ສະພາໃນອີກບໍ່ເທົ່າໃດເດືອນຕໍ່ໜ້າ ຫລັງຈາກປີ 2019 ເຄີຍມີຄວາມພະຍາຍາມຈະຊຸກຍູ້ຮ່າງກົດໝາຍໃນລັກສະນະດຽວກັນເຂົ້າໄປ ແຕ່ບໍ່ສຳເລັດ.
ຜ່ານມາມີຜົນການສຶກສາຊີ້ວ່າ: ເຄິ່ງໜຶ່ງຂອງເຍົາວະຊົນອາຍຸ 11-13 ປີ ເຄີຍເບິ່ງໜັງໂປ້ໃນຊ່ວງໃດຊ່ວງໜຶ່ງ ເຊິ່ງຜູ້ຊ່ຽວຊານຊີ້ວ່າ ອາດສົ່ງຜົນໃຫ້ເດັກເກີດມຸມມອງທີ່ບໍ່ຖືກຕ້ອງກ່ຽວກັບເລື່ອງເຊັກ ແລະ ຄວາມຍິນຍອມ ແລະ ສ່ຽງຈະຕົກເປັນເຫຍື່ອໃນການລ່ວງລະເມີດໄດ້.
ເຖິງຢ່າງໃດກໍຕາມ, ພາຍໃຕ້ຂະບວນການຢືນຢັນອາຍຸນີ້ ອາດມີຄວາມສ່ຽງເພີ່ມຂຶ້ນມາເຊັ່ນກັນ ໂດຍທາງລັດຖະບານຊີ້ວ່າ: ຜູ້ໃຫ້ບໍລິການບໍ່ຄວນຈະປະມວນຜົນ ຫລື ເກັບຂໍ້ມູນທີ່ບໍ່ກ່ຽວຂ້ອງກັບການກວດສອບອາຍຸ ເພື່ອປ້ອງກັນບໍ່ໃຫ້ເກີດຄວາມສ່ຽງເລື່ອງຂອງຂໍ້ມູນສ່ວນຕົວ.
ແລະ ຍັງມີຂໍ້ກັງວົນວ່າ: ການເກັບຂໍ້ມູນຜູ້ໃຊ້ເວັບໂປ້ ອາດກາຍເປັນເປົ້າໝາຍໃຫຍ່ຂອງການແຮັກ ແລະ ຖືກແບັກເມລໄດ້.
ອ້າງອີງ:
https://www.bbc.com/news/technology-60293057
