ທ່ານ ປູຕິນ ເຜີຍ ການໄດ້ໂອ້ລົມກັບຜູ້ນຳຝຣັ່ງ ເຖິງວິກິດອູແກຣນມີປະໂຫຍດຫລາຍ ກຽມໂທຫາລືກັນອີກໃນມໍ່ໆນີ້
ວັນທີ 7 ກຸມພາ 2022, ທ່ານ ວະລາດິເມຍ ປູຕິນ ປະທານາທິບໍດີຂອງຣັດເຊຍ ເຜີຍຫລັງຈາກໄດ້ພົບປະ ແລະ ໂອ້ລົມກັບທ່ານ ເອັມມານູເອລ ມາຄຣົງ ປະທານາທິບໍດີຝຣັ່ງ ທີ່ເດີນທາງສູ່ນະຄອນຫລວງມົດສະກູ ເພື່ອເຈລະຈາກ່ຽວກັບວິກິດອູແກຣນທີ່ເພີ່ມຄວາມຮ້ອນໃຫ້ພາກພື້ນເອີຣົບໃນຫລາຍເດືອນຜ່ານມາ ໂດຍຜູ້ນຳຣັດເຊຍລະບຸວ່າ: ການໄດ້ໂອ້ລົມກັບຜູ້ນຳຝຣັ່ງຄັ້ງນີ້ມີປະໂຫຍດຫລາຍ ກຽມໂທຫາລືກັນອີກໃນມໍ່ໆນີ້.
ທ່ານ ປູຕິນ ລະບຸວ່າ: ການໂອ້ລົມກັນທີ່ເກີດຂຶ້ນພິຈາລະນາ ແລະ ຄຳນຶງເຖິງມຸມມອງດ້ານຄວາມໝັ້ນຄົງຂັ້ນພື້ນຖານ ໂດຍຜູ້ນຳທັງສອງປະເທດຈະຫາລືກັນອີກຫລັງຈາກຜູ້ນຳຝຣັ່ງສິ້ນສຸດການເດີນທາງຢ້ຽມຢາມນະຄອນຫລວງກຽບ ຂອງອູແກຣນ ເພື່ອພົບຜູ້ນຳຂອງປະເທດ ໃນວັນທີ 8 ກຸມພານີ້.
ນີ້ເປັນສິ່ງທີ່ສະທ້ອນໃຫ້ເຫັນວ່າ: ທັງຣັດເຊຍ ແລະ ຝຣັ່ງ ເຊິ່ງເປັນສະມາຊິກສຳຄັນຂອງ EU ແລະ NATO ຕ່າງຍັງໃຫ້ຄວາມສຳຄັນຕໍ່ການເຈລະຈາຢ່າງສັນຕິວິທີ ເພື່ອບັນເທົາຄວາມຮ້ອນແຮງຂອງວິກິດການທີ່ຫລາຍຝ່າຍກັງວົນວ່າອາດລຸກລາມກາຍເປັນສົງຄາມໄດ້ໃນທີ່ສຸດ.
ອີກທັງຫລາຍຝ່າຍຍັງເບິ່ງວ່າ: ການເດີນທາງຢ້ຽມຢາມຣັດເຊຍ ແລະ ອູແກຣນໃນຄັ້ງນີ້ ຈະຖືເປັນໂອກາດຄັ້ງສຳຄັນໃນການສະແດງຄວາມສາມາດ ແລະ ສ້າງຜົນງານຂອງປະທານາທິບໍດີ ມາຄຣົງ ກ່ອນການເລືອກຕັ້ງຄັ້ງສຳຄັນໃນເດືອນເມສາທີ່ຈະເຖິງ ເຊິ່ງມີຄວາມເປັນໄປໄດ້ສູງທີ່ທ່ານຈະປະກາດລົງຊີງຕຳແໜ່ງຜູ້ນຳຝຣັ່ງຕໍ່ອີກສະໄໝໃນປີນີ້.
ອ້າງອີງ:
- https://www.reuters.com/world/europe/putin-says-some-macrons-ideas-could-form-basis-move-forward-2022-02-07/
- https://edition.cnn.com/2022/02/07/europe/ukraine-russia-news-monday-intl/index.html
- https://www.france24.com/en/europe/20220208-putin-says-ready-for-compromise-with-west-after-talks-with-macron-on-ukraine
