ອົດສະຕຣາລີກຳນົດ 21 ກຸມພາ ເປີດຮັບນັກທ່ອງທ່ຽວຕ່າງປະເທດ ສັກວັກຊີນປ້ອງກັນໂຄວິດຄົບໂດສ

ວັນທີ 7 ກຸມພາ 2022, ອົດສະຕຣາລີກຽມເປີດຊາຍແດນລະຫວ່າງປະເທດຕ້ອນຮັບນັກທ່ອງທ່ຽວທີ່ສັກວັກຊີນປ້ອງກັນໂຄວິດຄົບໂດສພາຍໃນວັນທີ 21 ກຸມພານີ້ ເຊິ່ງຖືເປັນເວລາເກືອບສອງປີນັບແຕ່ພະຍາດລະບາດໃຫຍ່ເກີດຂຶ້ນ.

ໂດຍທ່ານ ສະກອດ ມໍຣິສັນ ນາຍົກລັດຖະມົນຕີອົດສະຕຣາລີ ປະກາດວ່າ: ນັກທ່ອງທ່ຽວຕ່າງປະເທດທີ່ສັກວັກຊີນປ້ອງກັນໂຄວິດ ແລະ ຖືວີຊາຖືກຕ້ອງ ຈະໄດ້ຮັບອະນຸຍາດເຂົ້າອົດສະຕຣາລີນັບແຕ່ວັນທີ 21 ກຸມພາເປັນຕົ້ນໄປ ໂດຍຄວາມຄືບໜ້ານີ້ຖືເປັນໜຶ່ງໃນການຫລຸດຜ່ອນມາດຕະການປິດຊາຍແດນຄັ້ງສຳຄັນທີ່ສຸດຂອງອົດສະຕຣາລີ ນັບແຕ່ບັງຄັບໃຊ້ໃນເດືອນມີນາ 2020.

ເຖິງຢ່າງໃດກໍດີ, ຜູ້ໂດຍສານຂາເຂົ້າຍັງຈຳເປັນຕ້ອງກັກຕົວຕາມກົດລະບຽບຂອງລັດ ຫລື ດິນແດນທີ່ພວກເຂົາເດີນທາງໄປເຖິງ.

ກ່ອນໜ້ານີ້, ອົດສະຕຣາລີໄດ້ຫລຸດຜ່ອນຂໍ້ຈຳກັດດ້ານຊາຍແດນສຳລັບນັກຮຽນນັກສຶກສາຕ່າງປະເທດ ແລະ ຜູ້ຖືວີຊາບາງປະເພດໃນເດືອນທັນວາປີຜ່ານມາ ສົ່ງຜົນໃຫ້ອຸດສາຫະກຳທ່ອງທ່ຽວຮຽກຮ້ອງການອະນຸຍາດໃຫ້ນັກທ່ອງທ່ຽວຕ່າງປະເທດເດີນທາງເຂົ້າປະເທດໄດ້.

ທັງນີ້, ອົດສະຕຣາລີລາຍງານການກວດພົບຜູ້ຕິດເຊື້ອໂຄວິດເພີ່ມ 20.000 ກວ່າຄົນ ແລະ ຜູ້ເສຍຊີວິດ 40 ກວ່າຄົນໃນວັນທີ 7 ກຸມພານີ້ ທັງຍັງເຫລືອຜູ້ຕິດເຊື້ອທີ່ປິ່ນປົວໃນໂຮງໝໍອີກ 4.147 ຄົນ ເຊິ່ງໃນຈຳນວນນີ້ຢູ່ພະແນກຜູ້ປ່ວຍໜັກ 286 ຄົນ.

ອ້າງອີງ:

ສຳນັກຂ່າວຊິນຮົວ