ເພື່ອນຜູ້ອ່ານທີ່ຮັກແພງທັງຫລາຍ, ບໍ່ຮູ້ວ່າດ້ວຍເຫດຜົນໃດ ຍ້ອນເຈົ້າໜ້າທີ່ຈະລາຈອນບໍ່ເອົາໃຈໃສ່ຢ່າງຈິງຈັງບໍ ? ຫລືວ່າ ຍ້ອນຂາດການສຶກສາອົບຮົມຂອງຄອບຄົວພໍ່ແມ່ ແລະ ລະບຽບການຈຳກັດຜູ້ປະກອບການຕົກແຕ່ງລົດຕໍ່ກັບການນຳໃຊ້ຕູ້ລຳໂພງໃນລົດແນວໃດໃຫ້ເໝາະສົມ ແລະ ກໍມີຫລາຍຄຳຖາມອື່ນໆຕັ້ງຂຶ້ນມາ ເພາະວ່າກໍເປັນເລື່ອງທີ່ແກ່ຍາວມາດົນແລ້ວ ສຳລັບໄວລຸ້ນຈຳນວນໜຶ່ງທີ່ມັກຕົກແຕ່ງລົດຂອງຕົນດ້ວຍເຄື່ອງສຽງຂະໜາດໃຫຍ່ສົ່ງສຽງດັງ ຢ່າງແຮງແລ້ວເປີດເພງດ້ວຍສຽງມະຫຶມາຂີ່ເລາະກວນເມືອງ ໂດຍສະເພາະແມ່ນໃນຍາມຄໍ່າຄືນ, ຖ້າໃຜມີເຮືອນຢູ່ແຄມຖະໜົນສາຍຫລັກຕ່າງໆກໍຈະໄດ້ສຳຜັດກັບຄວາມຮຸນແຮງຂອງສຽງດັ່ງກ່າວ, ຖ້າໃຜຜູ້ເປັນໂຣກຫົວໃຈວາຍແດ່ ກໍອາດຈະສະຫລົບໄປກັບມັນກໍເປັນໄດ້. ແຕ່ສິ່ງຜິດລະບຽບກົດໝາຍດັ່ງກ່າວພັດຍັງມີປາກົດໃຫ້ເຫັນ. ມີເພື່ອນຜູ້ໜຶ່ງເລົ່າສູ່ຟັງວ່າ: ເມື່ອບໍ່ດົນມານີ້ ລາວກຳລັງຂີ່ລົດຈັກຈອດຢູ່ໄຟແດງແຫ່ງໜຶ່ງແລ້ວມີລົດກະບະຂອງໄວລຸ້ນທີ່ໄດ້ຕົກແຕ່ງເຄື່ອງ ສຽງດັ່ງກ່າວເປີດເພງດັງຈົນເຈັບຫູ ແລະ ເຮັດໃຫ້ຜູ້ທຽວທາງຫລາຍຄົນລຳຄານໃຈ, ແຕ່ໃນຂະນະນັ້ນ ຢູ່ໃນປ້ອມຍາມແຫ່ງນັ້ນກໍມີເຈົ້າໜ້າທີ່ຈະລາຈອນປະຈຳການຢູ່ຕັ້ງ 3 ຄົນ ແຕ່ຕ່າງກໍເມີນເສີຍຕໍ່ການກະທໍາຜິດລະບຽບຈະລາຈອນດັ່ງກ່າວ, ຫຼາຍຄົນຕ່າງຫລຽວເບິ່ງເຈົ້າໜ້າທີ່ເພື່ອຢາກເຕືອນໃຫ້ມີການປະພຶດແນວໃດໜຶ່ງຕໍ່ຜູ້ຂັບຂີ່ລົດຄັນນັ້ນ, ແຕ່ໃນທີ່ສຸດກໍຜິດຫວັງ.
ສະພາບເປີດເພງດັງຮ້າຍແຮງດັ່ງກ່າວໃນປັດຈຸບັນມັກເກີດຂຶ້ນຫລາຍແມ່ນເຂດຖະໜົນດົງນາໂຊກ ແລະ ກໍຂໍໃຫ້ເຈົ້າໜ້າທີ່ ຫລື ພາກສ່ວນກ່ຽວຂ້ອງຕ່າງໆຄວນມີມາດຕະການແກ້ໄຂບັນຫານີ້ໃຫ້ໝົດໄປ ເພື່ອຄວາມເປັນລະບຽບຮຽບຮ້ອຍ ແລະ ຄວາມສະຫງົບສຸກຂອງບ້ານເມືອງ ໂດຍສະເພາະສົງການກໍຈະໝູນວຽນມາຮອດແລ້ວ ພວກເຮົາຍິ່ງຈະໄດ້ເພີ່ມສະຕິໃນການຮັກສາຄວາມສະຫງົບໃຫ້ມີຜົນ.
