ສາທາ ຊີ້ແຈງ ຢາໂມລາໂກເວຍ ເປັນຢາປິ່ນປົວຜູ້ຕິດເຊື້ອ
ທ່ານ ດຣ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ລາຍງານໃນວັນທີ 7 ກຸມພາ 2022 ວ່າ: ເຖິງວ່າປັດຈຸບັນນີ້ໂຕເລກລາຍງານຕິດເຊື້ອລາຍວັນໃນ ສປປລາວ ຫລຸດລົງເລື້ອຍໆ, ແຕ່ຍັງມີລາຍງານຜູ້ເສຍຊີວິດໃໝ່ແຕ່ລະວັນ ແລະ ຄົນທີ່ເສຍຊີວິດສ່ວນໃຫຍ່ແມ່ນຜູ້ທີ່ມີພະຍາດປະຈຳຕົວ, ຜູ້ບໍ່ໄດ້ສັກວັກຊີນຄົບໂດສ ແລະ ຜູ້ທີ່ມາຫາແພດໝໍຊັກຊ້າ ຈຶ່ງພາໃຫ້ເກີດການສູນເສຍບຸກຄົນອັນເປັນທີ່ຮັກໃນຄອບຄົວ. ສະນັ້ນຈຶ່ງຮຽກຮ້ອງທຸກຄົນໃນທົ່ວສັງຄົມໃຫ້ເອົາໃຈໃສ່ປ້ອງກັນຕົນເອງຢ່າງເຄັ່ງຄັດລວມທັງຜູ້ທີ່ປີ່ນປົວຕົນເອງຢູ່ເຮືອນ ກໍຂໍໃຫ້ເອົາໃຈໃສ່ຕິດຕາມອາການຕົນເອງ.
ແນວໃດກໍດີຜ່ານມາຍັງມີຫລາຍຄົນເຂົ້າໃຈຜິດວ່າ: ຢາໂມລາໂກເວຍ (Molacovir) ເປັນຢາປ້ອງກັນພະຍາດໂຄວິດ-19 ເຮັດໃຫ້ປະຊາຊົນຈຳນວນໜຶ່ງຊື້ຕາມຮ້ານຂາຍຢາມາກິນເພື່ອປ້ອງກັນ, ທ່ານ ດຣ ຣັດຕະນະໄຊ ຊີ້ແຈງວ່າ: ຢາດັ່ງກ່າວບໍ່ແມ່ນຢາປ້ອງກັນໄວຣັສ ໂດຍຂໍ້ບົ່ງໃຊ້ຂອງຢາດັ່ງກ່າວລະບຸ: ຜູ້ທີ່ຕິດເຊື້ອພະຍາດໂຄວິດ-19 ໃນໄລຍະເລີ່ມຕົ້ນສາມາດກິນໄດ້ໂດຍສະເພາະຜູ້ມີອາຍຸ 18 ປີຂຶ້ນໄປ, ແຕ່ຫ້າມນຳໃຊ້ຢານີ້ກັບແມ່ຍິງຖືພາ, ລ້ຽງລູກດ້ວຍນົມແມ່ ແລະ ເດັກນ້ອຍທີ່ມີອາຍຸຕ່ຳກ່ວາ 18 ປີ, ຜູ້ທີ່ຈະໃຊ້ຢານີ້ຕ້ອງໄດ້ຮັບການແນະນຳ ແລະ ຕິດຕາມຢ່າງໃກ້ຊິດຈາກແພດໝໍ.
