ປີ 2021 ລາວ ສົ່ງອອກສິນຄ້າເກີນດຸນ 1 ຕື້ໂດລາສະຫະລັດ
ສູນຂໍ້ມູນຂ່າວສານທາງດ້ານການຄ້າຂອງ ສປປ ລາວ ລາຍງານເມື່ອທ້າຍອາທິດຜ່ານມາວ່າ: ປີ 2021 ສາມາດບັນລຸມູນຄ່າການນໍາເຂົ້າ ແລະ ສົ່ງອອກ 13.000 ລ້ານໂດລາສະຫະລັດ ຍັງບໍ່ກວມເອົາມູນຄ່າການສົ່ງອອກໄຟຟ້າ. ໃນນີ້ ມູນຄ່າການສົ່ງອອກ 7.000 ລ້ານໂດລາສະຫະລັດ ແລະ ມູນຄ່າການນໍາເຂົ້າ 6.000 ລ້ານໂດລາສະຫະລັດ ຈາກນີ້ເຮັດໃຫ້ລາວເກີນດຸນການຄ້າ 1.000 ລ້ານໂດລາສະຫະລັດ.
ສິນຄ້າສົ່ງອອກຫລັກທີ່ມີມູນຄ່າສູງກວ່າໝູ່ ມີ ຄຳປະສົມ/ຄຳແທ່ງ, ເຈ້ຍ ແລະ ເຄື່ອງທີ່ເຮັດດ້ວຍເຈ້ຍ, ແຮ່ທອງ, ເຍື່ອໄມ້ ແລະ ເສດເຈ້ຍ, ຢາງພາລາ, ມັນຕົ້ນ, ແຮ່ເຫລັກ, ໝາກກ້ວຍ, ເຄື່ອງນຸ່ງຫົ່ມ, ເຄື່ອງໃຊ້ໄຟຟ້າ ແລະ ອຸປະກອນເຄື່ອງໃຊ້ໄຟຟ້າ, ຝຸ່ນ (ປຸຍ), ໂຄງຮ່າງ, ຊິ້ນສ່ວນກ້ອງບັນທຶກພາບ ແລະ ເກີບ ໂດຍໄດ້ສົ່ງອອກໄປ 5 ປະເທດຄື ຈີນ 2.221 ລ້ານໂດລາສະຫະລັດ, ໄທ 2.187 ລ້ານໂດລາສະຫະລັດ, ຫວຽດນາມ 1.220 ລ້ານໂດລາສະ ຫະລັດ, ອົດສະຕຣາລີ 348 ລ້ານໂດລາສະຫະລັດ ແລະ ສະວິດ 116 ລ້ານໂດລາສະຫະລັດ.
ສ່ວນໝວດສິນຄ້ານໍາເຂົ້າຫລັກທີ່ມີມູນຄ່າສູງກວ່າໝູ່ ມີພາຫະນະທາງບົກ (ນອກຈາກ ລົດຈັກ, ລົດໄຖ), ນ້ຳມັນກາຊວນ, ອຸປະກອນກົນຈັກ (ນອກຈາກເຄື່ອງກົນຈັກພາຫະນະ), ແກ້ວປະເສີດ ຫລື ເຄິ່ງປະເສີດ, ຊິ້ນສ່ວນອາໄຫລ່ລົດລວມທັງຢາງ, ແວ່ນ, ໂສ້…, ເຫລັກ, ເຄື່ອງທີ່ເຮັດດ້ວຍເຫລັກ, ເຫລັກກ້າ, ຜະລິດຕະພັນການຢາ, ເຄື່ອງໃຊ້ທີ່ເຮັດດ້ວຍປລາສະຕິກ, ເຄື່ອງໄຟຟ້າ ແລະ ອຸປະກອນໄຟຟ້າ, ສາຍໄຟຟ້າ/ເຄເບິນ, ນ້ຳມັນແອັດຊັງ, ແອັດຊັງພິເສດ, ກາກ ແລະ ສິ່ງເສດເຫລືອຈາກອຸດສາຫະກຳຜະລິດອາຫານ, ອຸປະກອນຖ່າຍພາບ, ໄມ້ ແລະ ເຄື່ອງໃຊ້ທີ່ເຮັດດ້ວຍໄມ້.
ສ່ວນຫລາຍນຳເຂົ້າຈາກ 5 ປະເທດ ຄື ໄທ 3.000 ລ້ານ ໂດລາສະຫະລັດ, ຈີນ 1.255 ລ້ານໂດລາສະຫະລັດ, ຫວຽດນາມ 499 ລ້ານໂດລາສະຫະ ລັດ, ສ ອາເມລິກາ 250 ລ້ານໂດລາສະຫະລັດ ແລະ ຍີ່ປຸ່ນ 148 ລ້ານໂດລາສະຫະລັດ.
