ຫວຽດນາມ ຊະນະ ໄຕ້ຫວັນ 2-1 ຄວ້າປີ້ບານໂລກຍິງຄັ້ງທຳອິດໃນປະຫວັດສາດ
ບານເຕະທີມຊາດຍິງຫວຽດນາມ ສ້າງປະຫວັດສາດ ຄວ້າປີ້ບານໂລກຮອບສຸດທ້າຍໄດ້ເປັນຄັ້ງທຳອິດ ຫລັງເອົາຊະນະ ທີມຊາດໄຕ້ຫວັນ 2-1 ໃນຮອບເພລອອຟ.
ການແຂ່ງຂັນບານເຕະຍິງ ຊີງແຊ໊ມເອເຊຍ 2022 ຮອບເພລອອຟ ບານເຕະຍິງທີມຊາດຫວຽດນາມ ລົງສະຫນາມພົບກັບ ບານເຕະຍິງທີມຊາດໄຕ້ຫວັນ ໂດຍເປັນຝ່າຍ ທີມຊາດຫວຽດນາມໄດ້ປະຕູຂຶ້ນນຳໄປກ່ອນ 1-0 ຈາກ ເຈືອກ ຖິ ກຽວ ນາທີທີ 7 ແລະ ຈົບເຄິ່ງເວລາທຳອິດດ້ວຍປະຕູນີ້.
ເຂົ້າສູ່ເຄິ່ງເວລາທີສອງ ນາທີທີ 50 ທີມຊາດໄຕ້ຫວັນຕາມຕີສະເຫມີເປັນ 1-1 ໄດ້ສຳເລັດຈາກ ຊູ ຢູ ຊວນ ແນວໃດກໍຕາມ ນາທີທີ 56 ທີມຊາດຫວຽດນາມ ໄດ້ປະຕູຂຶ້ນນຳເປັນ 2-1 ຈາກຜົນງານຂອງ ຫງວຽນ ຖິບິກທຸຍ.
ໄລຍະເວລາທີ່ເຫລືອບໍ່ມີປະຕູເພີ່ມ ຫມົດເວລາການແຂ່ງຂັນ ບານເຕະທີມຊາດຍິງຫວຽດນາມ ເອົາຊະນະ ບານເຕະທີມຊາດໄຕ້ຫວັນ 2-1 ເຮັດໃຫ້ຜ່ານເຂົ້າໄປຫລິ້ນໃນບານເຕະໂລກຍິງ 2023 ທີ່ອອສເຕຣເລຍ ແລະ ນິວຊີແລນ ເປັນເຈົ້າພາບ ເປັນຄັ້ງທຳອິດໄດ້ສຳເລັດ ເຊິ່ງເປັນໂຄຕ້າສຸດທ້າຍຕໍ່ຈາກ ສປ ຈີນ, ສ.ເກົາຫລີ, ຍີ່ປຸ່ນ ແລະ ຟີລິບປິນ.
