ວັກຊີນຕ້ານ “ໂອມິຄຣອນ” ອາດບໍ່ຈຳເປັນ ຫລັງອາເມລິກາທົດລອງສັກວັກຊີນໃຫ້ລີງ ພົບປະສິດທິພາບບໍ່ຕ່າງກັບວັກຊີນທີ່ມີຢູ່

ການວິໄຈອາເມລິກາ ຊີ້ອາດບໍ່ຈຳເປັນຕ້ອງພັດທະນາວັກຊີນປ້ອງກັນໂຄວິດຕ້ານສາຍພັນໂອມິຄຣອນໂດຍສະເພາະ ຫລັງວິໄຈກັບລີງພົບວັກຊີນທີ່ໃຊ້ຢູ່ມີປະສິດທິພາບບໍ່ຕ່າງກັນ.

ວັນທີ 5 ກຸມພາ 2022, ເວັບໄຊ DW ລາຍງານວ່າ: ນັກວິທະຍາສາດອາເມລິກາມີການວິໄຈກັບລີງ ໂດຍການໃຫ້ລີງທີ່ຜ່ານການສັກວັກຊີນປ້ອງກັນໂຄວິດ-19 ຂອງໂມເດິນາມາແລ້ວ 9 ເດືອນ ສັກວັກຊີນເຂັມກະຕຸ້ນ ແບ່ງອອກເປັນ 2 ກຸ່ມ, ກຸ່ມທຳອິດສັກວັກຊີນກະຕຸ້ນແບບປົກກະຕິຄືຄົນທົ່ວໄປສັກ, ສ່ວນອີກກຸ່ມສັກວັກຊີນປ້ອງກັນໂຄວິດທີ່ພັດທະນາເພື່ອຕໍ່ສູ້ກັບສາຍພັນໂອມິຄຣອນໂດຍສະເພາະ.

ຜົນການທົດລອງພົບວ່າ: ວັກຊີນເຂັມກະຕຸ້ນ ທັງສູດປົກກະຕິທີ່ໃຊ້ຢູ່ ແລະ ສູດທີ່ອອກແບບມາເພື່ອຕ້ານໄວຣັສໂຄວິດສາຍພັນໂອມິຄຣອນ ມີປະສິດທິພາບກະຕຸ້ນພູມຕ້ານທານໃນຮ່າງກາຍຂອງລີງໃຫ້ສູງຂຶ້ນເມື່ອພົບໄວຣັສໂຄວິດທຸກສາຍພັນ ໃນລະດັບທີ່ບໍ່ແຕກຕ່າງກັນ.

ແດນຽວ ດວດ ນັກວິໄຈປະຈຳສະຖາບັນພະຍາດຕິດເຊື້ອແຫ່ງຊາດອາເມລິກາ ເຊິ່ງເປັນຜູ້ນຳການວິໄຈຄັ້ງນີ້ສະຫລຸບວ່າ: ນີ້ເປັນຂ່າວດີຫລາຍ ເພາະມະນຸດອາດບໍ່ຈຳເປັນຕ້ອງພັດທະນາວັກຊີນໂຄວິດສູດໃໝ່ ເພື່ອຕ້ານສາຍພັນໂອມິຄຣອນໂດຍສະເພາະ ໂດຍທ່ານເຊື່ອວ່າວັກຊີນປ້ອງກັນໂຄວິດທີ່ມີຢູ່ໜ້າຈະມີປະສິດທິພາບສ້າງພູມຕ້ານທານກັນຂ້າມສາຍພັນໄດ້.

ຂະນະທີ່ສາສະດາຈານ ຈອນ ມົວ ຜູ້ຊ່ຽວຊານດ້ານພູມຕ້ານທານວິທະຍາຊີ້ວ່າ: ຂໍ້ໄດ້ປຽບຈາກການວິໄຈທີ່ສຶກສາຈາກລີງຄືການທີ່ນັກວິທະຍາສາດສາມາດເຮັດໃຫ້ມັນຕິດເຊື້ອໂຄວິດເພື່ອເບິ່ງປະຕິກິລິຍາຫລັງສັກວັກຊີນໄດ້. ເຖິງຢ່າງໃດກໍຕາມ, ການທົດລອງວັກຊີນປ້ອງກັນໂຄວິດຈຳເປັນຕ້ອງເບິ່ງປະສິດທິພາບຫລັງການນຳໃຊ້ໃນມະນຸດເປັນຫລັກ.

ອ້າງອີງ:

https://www.dw.com/…/covid-digest-monkey…/a-60669076

https://www.channelnewsasia.com/…/omicron-specific…