ສະພາຄວາມໝັ້ນຄົງສະຫະປະຊາຊາດປະຊຸມສຸກເສີນ ເຈລະຈາບັນຫາ ສປປ ເກົາຫລີ ຍິງລູກສອນໄຟ 7 ຄັ້ງໃນເດືອນຜ່ານມາ

ສະພາຄວາມໝັ້ນຄົງແຫ່ງສະຫະປະຊາຊາດ (United Nations Seurity Council: UNSC) ຈັດກອງປະຊຸມສຸກເສີນໃນວັນທີ 4 ກຸມພາ ເພື່ອຫາລືກໍລະນີ ສປປ ເກົາຫລີ ທົດລອງຍິງລູກສອນໄຟຢ່າງຕໍ່ເນື່ອງເຖິງ 7 ຄັ້ງ ໃນເດືອນມັງກອນຜ່ານມາ ເຊິ່ງຫລັງຫລ້າສຸດເກີດຂຶ້ນເມື່ອວັນທີ 30 ມັງກອນ.

ກອງປະຊຸມດັ່ງກ່າວ ເຊິ່ງເປັນກອງປະຊຸມແບບເປີດ ເກີດຂຶ້ນພາຍຫລັງການຮຽກຮ້ອງຈາກລັດຖະບານອາເມລິກາ ໂດຍອາເມລິກາ ແລະ 8 ປະເທດສະມາຊິກ ໄດ້ແກ່ ອັງກິດ, ຝຣັ່ງ, ໄອຣ໌ແລນ, ນໍເວນ, ເບຣຊິນ, ແອລເບເນຍ, ຍີ່ປຸ່ນ ແລະ ສະຫະລັດອາຣັບເອມິເຣດ ຮ່ວມລົງນາມໃນຖະແຫລງການພາຍຫລັງປະຊຸມ ຮຽກຮ້ອງໃຫ້ UNSC ປະນາມການທົດລອງຍິງລູກສອນໄຟຂອງ ສປປ ເກົາຫລີ ເຊິ່ງສົ່ງຜົນກະທົບບັນທອນຄວາມໝັ້ນຄົງໃນພາກພື້ນ.

ນາງ ລິນດາ ໂທມັສ-ກຣີນຟິລ ເອກອັກຄະລາຊະທູດອາເມລິກາປະຈຳສະຫະປະຊາຊາດ ຮຽກຮ້ອງໃຫ້ລັດຖະບານພຽງຢາງຢຸດການກະທຳທີ່ບັນທອນຄວາມໝັ້ນຄົງ ແລະ ກັບຄືນສູ່ການເຈລະຈາ, ພ້ອມທັງຊີ້ເຖິງຄວາມລົ້ມເຫລວໃນການດຳເນີນການທີ່ເປັນຮູບປະທຳຂອງ UNSC ເຊິ່ງເຮັດໃຫ້ ສປປ ເກົາຫລີ ກ້າຈະທ້າທາຍປະຊາຄົມໂລກຕໍ່ໄປ.

ສຳລັບລູກສອນໄຟທີ່ ສປປ ເກົາຫລີ ທົດລອງຍິງເມື່ອວັນທີ 30 ມັງກອນຜ່ານມາ ຄືລູກສອນໄຟແບບຖິ້ມຕົວ ໄລຍະກາງ “ຮວາຊອງ-12” ທີ່ມີໄລຍະການໂຈມຕີໄກເຖິງ 5.000 ແມັດ ໂດຍສາມາດຍິງໄປໄດ້ໄກເຖິງເກາະກວມ ທີ່ເປັນດິນແດນຂອງອາເມລິກາ ເຊິ່ງສ້າງຄວາມກັງວົນຕໍ່ອາເມລິກາ ແລະ ນາໆຊາດ.

ໂດຍຜ່ານມາ ອົງການສະຫະປະຊາຊາດມີມະຕິຫ້າມພຽງຢາງທົດລອງລູກສອນໄຟແບບຖິ້ມຕົວ ແລະ ອາວຸດນິວເຄຼຍທຸກຊະນິດ ແລະ ໄດ້ດຳເນີນມາດຕະການຂວ້ຳບາດຕອບໂຕ້ຢ່າງຕໍ່ເນື່ອງ.

ຂະນະທີ່ອາເມລິກາເບິ່ງວ່າ: ການເພີ່ມມາດຕະການຂວ້ຳບາດຕອບໂຕ້ການທົດລອງລູກສອນໄຟຂອງ ສປປ ເກົາຫລີ ນັ້ນມີຄວາມຈຳເປັນ ສວນທາງກັບທ່າທີຂອງຣັດເຊຍ ແລະ ຈີນທີ່ເບິ່ງວ່າ: ຄວນຜ່ອນຄາຍມາດຕະການຂວ້ຳບາດຕໍ່ ສປປ ເກົາຫລີ ເພື່ອບັນເທົາສະຖານະການເຄັ່ງຕຶງທີ່ເກີດຂຶ້ນ.

ອ້າງອີງ:

• https://www3.nhk.or.jp/nhkworld/en/news/20220205_N02/
• https://en.yna.co.kr/view/AEN20220205001300325?section=nk/nk