ເຮັດແທ້ທຳຈິງໄດ້ ມີປະສິດທິຜົນສູງ

ມີຫລາຍຄໍາຄິດຄໍາເຫັນຂອງຜູ້ອ່ານ ກໍຄືບັນດາຫາງສຽງສັງຄົມຕໍ່ຄໍາວ່າ ການເຮັດແທ້ ຫລື ການຢຸດຄໍາວ່າອ່ອນແທງ ແຂງຫລີກ ຊຶ່ງການຍົກເລື່ອງນີ້ຂຶ້ນມາ ບໍ່ມີເຈຕະນາຊໍ້າຕື່ມບັນຫາ, ພຽງຢາກສະທ້ອນບາງມູມມອງ ທີ່ພວກເຮົາຕ້ອງພ້ອມກັນປະຕິບັດນັ້ນຄື ລະບຽບກົດໝາຍບ້ານເມືອງ ເພາະແມ່ນພັນທະ ແລະ ໜ້າທີ່ຂອງພົນລະເມືອງລາວທຸກຄົນ. ຜູ້ໃດປະຕິບັດໄດ້ດີກໍຕ້ອງໄດ້ຮັບການຍ້ອງຍໍ, ຖ້າຜູ້ໃດລະເມີດກໍຕ້ອງຖືກ ລົງໂທດຕາມລະບຽບກົດໝາຍຈາກເບົາຫາໜັກ ບໍ່ອາດຫລີກເວັ້ນໄດ້.

ຜ່ານມາ, ທົ່ວສັງຄົມໄດ້ພ້ອມກັນເອົາໃຈໃສ່ປະຕິບັດຕາມລັດຖະທໍາມະນູນ, ຄໍາສັ່ງ, ລະບຽບກົດໝາຍກໍຄືບັນດານິຕິກໍາທີ່ລັດວາງອອກ ຊຶ່ງເປັນການເພີ່ມສະຕິຄວາມຕື່ນຕົວຕາມຂອບກົດໝາຍບັນຍັດເຮັດໃຫ້ສັງຄົມສະຫງົບປອດໄພ. ແນວໃດກໍດີບໍ່ອາດປາສະຈາກໄດ້ພຶດຕິກໍາລະເມີດລະບຽບກົດໝາຍ ທີ່ກໍ່ໃຫ້ເກີດບັນດາປາກົດການຫຍໍ້ທໍ້ໃນສັງຄົມ ທີ່ກະທົບຕໍ່ການພັດທະນາເສດຖະກິດ-ສັງຄົມ ແລະເຖິງວ່າພາກສ່ວນກ່ຽວຂ້ອງໄດ້ເອົາໃຈໃສ່ສະກັດກັ້ນ, ແຕ່ບັນຫາກໍຍັງເກີດຂຶ້ນຢູ່. ເມື່ອໃດລະເມີດ ຖ້າຈັບໄດ້ໄລ່ທັນກໍຖືກລົງໂທດເມື່ອ ນັ້ນ ຖືວ່າເປັນອຸທາຫອນສອນທຸກຄົນບໍ່ປະໝາດ ແລະ ໃຫ້ເປັນເຈົ້າການປະຕິບັດລະບຽບກົດໝາຍຢ່າງເຂັ້ມງວດ. ຂໍຍົກບາງຕົວຢ່າງຄືມີຫລາຍອົງການຈັດຕັ້ງລັດປະຕິບັດວິໄນລັດຖະກອນທີ່ກະທໍາຜິດລະບຽບກົດໝາຍ ຊຶ່ງການເຮັດໄດ້ແບບນີ້ສະທ້ອນໃຫ້ເຫັນເຖິງຄວາມເດັດຂາດເດັດດ່ຽວຂອງຜູ້ບັງຄັບໃຊ້ກົດໝາຍ ບໍ່ວ່າຈະເປັນພົນລະເມືອງທົ່ວໄປ ຫລື ພະນັກງານລັດຖະກອນ ກໍບໍ່ເວັ້ນ.

ການ “ເຮັດແທ້” ຕໍ່ຜູ້ລະເມີດລະບຽບກົດໝາຍຕາມສະຖານໜັກ-ເບົາຈະເຮັດໃຫ້ສັງຄົມເຮົາຕື່ນຕົວ, ບໍ່ປະໝາດ ຊຶ່ງສາມາດຢຸດເວົ້າວ່າ ເພິ່ນບໍ່ກ້າ. ຫລື ເພິ່ນບໍ່ເຮັດ…ບໍ່ແມ່ນບໍ່ກ້າ ຫລື ບໍ່ເຮັດ ເພາະຄວາມຈິງນັ້ນນີ້ຄືການເກັບກຳຫລັກຖານໃຫ້ພຽງພໍ ແລະ ແໜ້ນໜາຂອງຜູ້ມີສ່ວນຕິດຕາມກວດກາການປະຕິບັດລັດຖະທໍາມະນູນ, ກົດໝາຍ ແລະ ນິຕິກໍາຕ່າງໆ. ຫາງສຽງຈໍານວນໜຶ່ງເວົ້າວ່າ ເມື່ອປະຕິບັດລະບຽບວິໄນໃດໜຶ່ງ ຊຶ່ງເປັນການກະທໍາກໍ່ໃຫ້ເກີດຄວາມບໍ່ສະຫງົບໃນສັງຄົມ ແລະ ເປັນທີ່ສັງຄົມພວມສົນໃຈ, ພາກສ່ວນກ່ຽວ ຂ້ອງ ຄວນຕັ້ງໂຕະຖະແຫລງຂ່າວໃຫ້ສື່ມວນຊົນເຜີຍແຜ່ສູ່ສັງຄົມຮູ້ທົ່ວເຖິງເພື່ອສອນໃຈ ເຖິງວ່າຢູ່ໃນຂັ້ນຕອນເບື້ອງຕົ້ນຂອງຂະບວນການຍຸຕິທໍາ ແລະ ເມື່ອຖະແຫລງອອກມາ ແນ່ນອນ ຜູ້ຄິດຈະກໍ່ປາກົດການຫຍໍ້ທໍ້ ອາດຈະຢ້ານ “ການເຮັດແທ້” ຂອງເຈົ້າໜ້າທີ່ບໍ່ຫລາຍກໍໜ້ອຍ.

ບໍ່ວ່າສະພາບຈະຫຍຸ້ງຍາກທັງເວລານີ້ ຫລື ເວລາໃດກໍດີ, ພວກເຮົາຕ້ອງເປັນເຈົ້າການປະຕິບັດກົດໝາຍຢ່າງເຄັ່ງຄັດແທ້ ບໍ່ດັ່ງນັ້ນເພິ່ນຕ້ອງ “ເຮັດແທ້” ບໍ່ອໍ້ແອ້ກັບຜູ້ລະເມີດ. ຕ້ອງເປີດໃຈໃຫ້ກວ້າງນຳກັນວ່າສັງ ຄົມຈະຢູ່ໄດ້ແນວໃດເມື່ອບໍ່ມີລະບຽບ? ເຮືອນມີຂື່ມີແປດັ່ງດຽວກັບບ້ານເມືອງມີລັດຖະທໍາມະນູນ ແລະ ກົດ ໝາຍ ຄຸ້ມຄອງທົ່ວສັງຄົມ, ສັງຄົມສະຫງົບປອດໄພ, ພວກເຮົາຍູທ່າງພັດທະນາຊີວິດການເປັນຢູ່ໃຫ້ດີຂຶ້ນຊັກໄຊ້ຄືເປົ້າໝາຍການສ້າງລັດກ່ງກົດໝາຍ. ເຊົາເຖີດ ຜູ້ທີ່ຄິດລະເມີດລະບຽບກົດໝາຍທັງຜູ້ຄິດຈະສ້າງຂ່າວລືຂ່າວປອມກໍ່ກວນສັງຄົມໃຫ້ບໍ່ສະຫງົບ ຖ້າລະເມີດ ເພິ່ນຈະ “ເຮັດແທ້” ບໍ່ໄວ້ໜ້າໃຜ!