ກົມເຕັກໂນໂລຊີຂໍ້ມູນຂ່າວສານການເງິນ ສ້າງແຜນກໍານົດພະນັກງານນໍາພາ-ຄຸ້ມຄອງ

ວັນທີ 03 ກຸມພາ 2021 ທີ່ກົມສ່ວຍສາອາກອນ, ໄດ້ຈັດກອງປະຊຸມສ້າງແຜນກໍານົດພະນັກງານນໍາພາ-ຄຸ້ມຄອງຂອງກົມເຕັກໂນໂລຊີຂໍ້ມູນຂ່າວສານການເງິນ ກະຊວງການເງິນ, ໂດຍການເປັນປະທານຂອງທ່ານ ປອ ບຸນເຫຼືອ ສິນໄຊວໍຣະວົງ ຮອງລັດຖະມົນຕີກະຊວງການເງິນ, ມີທ່ານ ປອ ວິໄລທອງ ສຸດທະວິໄລ ຮັກສາການຫົວໜ້າກົມເຕັກໂນໂລຊີຂໍ້ມູນຂ່າວສານການເງິນ, ມີຮອງຫົວໜ້າກົມ, ຫົວໜ້າພະແນກ-ຮອງຫົວໜ້າພະແນກ, ພ້ອມດ້ວຍພະນັກງານຫຼັກແຫຼ່ງຂອງກົມເຕັກໂນໂລຊີຂໍ້ມູນຂ່າວສານການເງິນເຂົ້າຮ່ວມ.

ການສ້າງແຜນກໍານົດພະນັກງານແມ່ນການຄາດຄະເນເປົ້າໝາຍພະນັກງານ ທີ່ຈະຈັດວາງເຂົ້າໃນຕໍາແໜ່ງນໍາພາ-ຄຸ້ມຄອງແຕ່ລະຂັ້ນ, ແຕ່ລະຂະແໜງການ, ແນໃສ່ຮັບປະກັນລັກສະນະສືບທອດປ່ຽນແທນຕໍ່ເນື່ອງໃນສະເພາະໜ້າ ແລະ ຍາວນານ, ກະກຽມບຸກຄະລາກອນໃນລັກສະນະເປີດກວ້າງ, ເພື່ອໃຫ້ມີແຫຼ່ງເລືອກເຟັ້ນພະນັກງານນໍາພາ-ຄຸ້ມຄອງຕອບສະໜອງທາງດ້ານຈໍານວນ, ຄຸນນະພາບ, ໂຄງປະກອບບຸກຄະລາກອນໃຫ້ຄົບຊຸດຕາມຄວາມຮຽກຮ້ອງຕ້ອງການຂອງບັນດາຕໍາແໜ່ງນໍາພາ-ຄຸ້ມຄອງແຕ່ລະຂັ້ນ, ການສ້າງແຜນກໍານົດພະນັກງານເປັນວຽກງານ ໜຶ່ງທີ່ສໍາຄັນພື້ນຖານຂອງວຽກງານພະນັກງານ, ຮັບປະກັນການຫັນວຽກງານພະນັກງານ, ດໍາເນີນຕາມລະບຽບແບບ ແຜນ, ເພື່ອຕອບສະໜອງໜ້າທີ່ການເມືອງຂອງພັກ-ລັດໃນສະເພາະໜ້າ ແລະ ຍາວນານ, ເປັນການຫັນຍຸດທະສາດກ່ຽວກັບວຽກງານພະນັກງານເປັນອັນລະອຽດ, ສ້າງໂຄງການສັງລວມພື້ນຖານໃຫ້ແກ່ການສ້າງແຜນກໍ່ສ້າງ-ບໍາລຸງ, ຄາດຄະເນສັບຊ້ອນ ແລະ ຈັດວາງພະນັກງານຂອງແຕ່ລະກົມຢ່າງສົມເຫດສົມຜົນ.

ໂອກາດດັ່ງກ່າວ, ທ່ານ ປອ ບຸນເຫຼືອ ສິນໄຊວໍຣະວົງ ໄດ້ໃຫ້ກຽດໂອ້ລົມ ແລະ ມີຄໍາເຫັນໃຫ້ທິດຊີ້ນໍາໃນກອງປະຊຸມໃນການກໍານົດພະນັກງານນໍາພາ-ຄຸ້ມຄອງຂັ້ນຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກ ຂອງກົມທີ່ຕົນສັງກັດຢູ່, ຊຶ່ງເປັນສິ່ງທີ່ຈໍາເປັນໃນການກໍານົດພະນັກງານນໍາພາ-ຄຸ້ມຄອງ, ເພື່ອຮັບປະກັນໃຫ້ມີພະນັກ ງານຫຼັກແຫຼ່ງສືບຕໍ່ຊີ້ນໍາ-ນໍາພາວຽກງານ, ການທາບທາມສ້າງແຜນພະນັກງານນໍາພາຄຸ້ມຄອງເປັນວຽກປົກກະຕິຂອງລະບົບການຈັດຕັ້ງທີຕ້ອງໄດ້ມີການກໍານົດທຸກປີ ແລະ ໄດ້ມີການຕິດຕາມປະເມີນຄືນ ແລະ ໄດ້ນໍາເອົາໄປເປັນບ່ອນອີງໃນການຈັດວາງພະນັກງານເຂົ້າໃນຕໍາແໜ່ງງານທັງສາມາດກໍານົດເອົາພະນັກງານທີ່ມີຄວາມຮູ້ຄວາມສາມາດເໝາະສົມກັບໜ້າວຽກ.

ກົມເຕັກໂນໂລຊີຂໍ້ມູນຂ່າວສານການເງິນ ກະຊວງການເງິນ ເປັນກົມທີ່ສໍາຄັນໃນຍຸກສະໄໝທີ່ມີການປ່ຽນ ແປງໄວທາງດ້ານເຕັກໂນໂລຊີຂໍ້ມູນຂ່າວສານເປັນກົມທີ່ນໍາໜ້າໃນການຫັນເອົາການຄຸ້ມຄອງວຽກງານການເງິນ, ຖານລາຍຮັບ-ລາຍຈ່າຍ ແລະ ອື່ນໆເຂົ້າໃນລະບົບທີ່ທັນສະໄໝ. ສະນັ້ນ, ກໍານົດພະນັກງານນໍາພາ-ຄຸ້ມຄອງກໍ່ເພື່ອເປັນພື້ນຖານໃຫ້ຄະນະນໍາໄດ້ນໍາໄປຄົ້ນຄວ້າປັບປຸງຊັບຊ້ອນພະນັກງານໃຫ້ໄດ້ບຸກຄະລາກອນທີ່ດີເດັ່ນ ແລະ ມີຄວາມຮູ້ຄວາມສາມາດເຂົ້າໃນການຄຸ້ມຄອງການບໍລິຫານວຽກງານ.