ຂີ້ເຫຍື້ອ-ນໍ້າເປື້ອນ ຜົນຈາກການກະທຳຂອງພວກເຮົາ

ຍົກປະເດັນນໍ້າເປື້ອນ ທີ່ເປັນນໍ້າເຫລືອໃຊ້ ທັງຈາກເຮືອນຊານບ້ານຊ່ອງ, ໂຮງຈັກໂຮງງານ…ຊຶ່ງໂດຍພາບລວມແລ້ວລ້ວນແຕ່ກະທົບຕໍ່ສະພາບແວດລ້ອມອ້ອມຂ້າງ, ການດໍາລົງຊີວິດຂອງຄົນ ກໍຄືຊີວະນາໆພັນ ແລະ ເປັນສິ່ງແນ່ນອນ ຈຳເປັນຕ້ອງໄດ້ຮຽກຮ້ອງທຸກຄົນປະກອບສ່ວນປັກປັກຮັກສາສະພາບແວດລ້ອມໃຫ້ດີ ຄວບຄູ່ກັບການພັດທະນາ.

ຜ່ານມາ, ການຄຸ້ມຄອງ ແລະ ປົກປັກຮັກສາສະພາບແວດລ້ອມໃຫ້ດີນັ້ນໄດ້ຮັບການເອົາໃຈໃສ່ ແລະ ປະ ສົບຜົນສໍາເລັດເປັນຢ່າງດີ. ແນວໃດກໍດີ ຍັງມີສິ່ງທີ່ພວກເຮົາຕ້ອງໄດ້ສືບຕໍ່ ຕາມທິດພັດທະນາສີຂຽວ ແລະ ຍືນຍົງ ເນື່ອງຈາກບັນຫານໍ້າເປື້ອນ ແລະ ຂີ້ເຫຍື້ອ ລ້ວນແຕ່ແມ່ນຜົນຈາກການກະທໍາຂອງພວກເຮົາເອງ. ວ່າງແລ້ວນີ້, ບັນຫານໍ້າເປື້ອນຈາກໂຮງງານຂ້າສັດແຫ່ງໜຶ່ງຢູ່ເຂດເມືອງນາຊາຍທອງ ນະຄອນຫລວງວຽງຈັນ ກາຍເປັນບັນຫາສ້າງຄວາມເດືອດຮ້ອນໃຫ້ປະຊາຊົນເຂດໃກ້ຄຽງ ແລະ ບັນຫານີ້, ຜູ້ປະກອບການ ແລະ ພາກສ່ວນກ່ຽວຂ້ອງ ໄດ້ຂຸ້ນຂ້ຽວສ້າງລະບົບບໍາບັດນໍ້າເປື້ອນຕາມລະບຽບກົດໝາຍກໍານົດ. ຂະນະທີ່ທ້າຍເດືອນຜ່ານມາ, ໄຟໄໝ້ ສະໜາມຂີ້ເຫຍື້ອໃຫຍ່ ຫລັກ 32 ເມືອງໄຊທານີ ກໍໄດ້ສົ່ງຜົນກະທົບຕໍ່ການ ດໍາລົງຊີວິດຂອງຊາວບ້ານຊາວເມືອງຍ້ອນຄວັນລົງຕໍ່າເນື່ອງຈາກອາກາດເຢັນ. ເຖິງວ່າພາກສ່ວນລັດ ກ່ຽວ ຂ້ອງໄດ້ອອກມາຊີ້ແຈງໃຫ້ລາຍລະອຽດແລ້ວ, ແຕ່ບັນຫາທີ່ຕັ້ງຂຶ້ນຄືຈະເຮັດແນວໃດພວກເຮົາ ຈຶ່ງສາມາດແກ້ໄຂ ບັນຫາຂີ້ເຫຍື້ອ ແລະ ນໍ້າເປື້ອນໃຫ້ຍືນຍົງ? ຊຶ່ງຄວາມຈິງ ບໍ່ວ່າຈະເປັນປະເທດດ້ອຍພັດທະນາ ແລະ ພັດທະນາກ້າວໜ້າ ສີວິໄລທາງວັດຖຸ-ເຕັກໂນໂລຊີ ມັນບໍ່ງ່າຍປານໃດ ແລະ ດຽວນີ້ ປະເທດທີ່ຈະ ເລີນແລ້ວນັ້ນ ກໍ່ຍັງມີບັນຫານີ້ຢູ່ ບໍ່ວ່າຈະເປັນການແຍກຂີ້ເຫຍື້ອ, ການເອົາກັບຄືນມາໃຊ້…ກໍຍັງເປັນບັນ ຫາ, ບໍ່ທັນປະສົບຜົນສໍາເລັດພໍເທົ່າໃດ. ສະຫລຸບແລ້ວມັນຂຶ້ນຢູ່ນຳແຕ່ລະຄົນ ແຕ່ລະຄອບຄົວ ສຳນັກງານອົງການທັງພາກລັດ ເອກະຊົນ ເພາະຖ້າຈໍາກັດການຜະລິດຂີ້ເຫຍື້ອ ແລະ ພາກັນເອົາໃຈໃສ່ຢ່າງສະໝໍ່າສະເໝີ ການແຍກຂີ້ເຫຍື້ອກ່ອນຖິ້ມ ຈະຊ່ວຍໄດ້ຫລາຍ. ສ່ວນບັນຫານໍ້າເປື້ອນຈາກເຮືອນຊານ ແລະໂຮງ ຈັກໂຮງງານ ກໍເຊັ່ນດຽວກັນ ຖ້າເອົາໃຈໃສ່ແຕ່ຫົວທີ ເລື່ອງລະບົບບໍາບັດນໍ້າເປື້ອນທີ່ເປັນສ່ວນສໍາຄັນໜຶ່ງໃນໂຮງງານ ກໍຕ້ອງເຮັດມາແຕ່ຕົ້ນ ເຮັດເປັນລະບົບຄົບຊຸດ, ຜົນກະທົບຕໍ່ສະພາບແວດລ້ອມກໍໜ້ອຍ, .ແຕ່ພັດເປັນເລື່ອງເຈັບຫົວຂອງຜູ້ປະກອບການ ເພາະຕ້ອງໄດ້ເພີ່ມທຶນ. ສະໜາມຂີ້ເຫຍື້ອ ສົ່ງກິ່ນເມື່ອມີລົມ, ມີຄວັນເມື່ອໄຟໄໝ້ຈະເກີດຢຸ່ໃສ ສຽງຈົ່ມວ່າຈາກສັງຄົມກໍຕາມມາ. ທັງນີ້ ການສ້າງຂີ້ເຫຍື້ອສໍາລັບຢູ່ນະຄອນ ຫລວງວຽງຈັນແຕ່ລະມື້ມີຫລາຍຮ້ອຍໂຕນ, ແຕ່ຄວາມສາມາດເກັບໄປກໍາຈັດຢູ່ສະໜາມຂີ້ເຫຍື້ອ ບໍ່ໄດ້ໝົດເຊັ່ນດຽວກັນກັບບັນຫານໍ້າເປື້ອນ ຂອດນີ້ພວກເຮົາພາກັນລືມໄປເອງ.

ບັນຫາເກີດຈາກຂີ້ເຫຍື້ອ ແລະ ນໍ້າເປື້ອນ ເປັນສັນຍານເຕືອນສະຕິທຸກຄົນບໍ່ຄວນຖືເບົາ, ຄວນເອົາໃຈໃສ່ ຄຸ້ມຄອງ ແກ້ໄຂຄວບຄູ່ການພັດທະນາທຸກດ້ານ. ໂຕນີ້ລອງຄິດເບິ່ງວ່າ ຖ້າພາກັນຫລຸດຜ່ອນຂີ້ເຫຍື້ອຫລຸດ ຜ່ອນການສ້າງຜົນກະທົບແຕ່ຫົວທີ ກໍຈະສົ່ງຜົນກະທົບໜ້ອຍທີ່ສຸດ ແລະ ສຸດທ້າຍມັນກໍຂຶ້ນກັບພວກເຮົານີ້ລະ ເປີດໃຈໃຫ້ກວ້າງ ແລະ ສຳລວດເບິ່ງວ່າມື້ນີ້ເຮົາຖິ້ມຂີ້ເຫຍື້ອເສດເຫລືອໃຊ້ໜ້ອຍຫລາຍປານໃດ ແລະຖິ້ມຢູ່ໃສ?