ໄອໂອຊີ ຄ້ານແນວຄິດຈັດການແຂ່ງຂັນເຕະບານໂລກທຸກ 2 ປີ

ໂອໄອຊີ ຫນຶ່ງໃນອົງການດ້ານກິລາຊັ້ນນຳຂອງໂລກ ຢືນຢັນບໍ່ເຫັນດີກັບການປ່ຽນວົງຮອບຈັດການແຂ່ງຂັນບານໂລກເປັນທຸກໆ 2 ປີ ແລະ ກຽມຕັ້ງໂຕະກັບປະທານຟີຟາໃນໄວໆນີ້.

ສ້າງຄວາມປ່ັນປ່ວນໄປທຸກພາກສ່ວນ ເມື່ອສະຫະພັນບານເຕະນາໆຊາດ ຫລື FIFA  ອອກມາຮັບແນວຄິດການປ່ຽນແປງວົງຮອບຈັດການແຂ່ງຂັນບານໂລກຮອບສຸດທ້າຍ ຈາກທຸກ 4 ປີ ໃຫ້ເຫລືອພຽງ 2 ປີເທົ່ານັ້ນ ທ່າມກາງສຽງເຫັນຫີຂອງຊາດສະມາຊິກບາງສ່ວນຈາກທະວີບແອຟຣີກາ ແລະ ເອເຊຍ.

ແນວໃດກໍຕາມ ຍັງຄົງມີຫລາຍອົງກອນບານເຕະທີ່ອອກມາສະແດງຄວາມບໍ່ເຫັນດີກັບບັນຫານີ້ ເຖິງຂັ້ນທີ່ສະຫະພັນບານເຕະຢູຣົບ ແລະ ອາເມລິໃຕ້ ປະກາດຈະຂວ້ຳບາດເຕະບານໂລກໃນທັນທີ ຫາກຟີຟາຕັດສິນໃຈປ່ຽນແປງຮອບດັ່ງກ່າວ.

ຫລ້າສຸດຄະນະກຳມະການໂອລິມປິກສາກົນ ຫລື IOC ໃນຖານະອົງການທີ່ມີສ່ວນໄດ້ເສຍກັບແນວຄິດນີ້ ກໍອອກມາສະແດງຄວາມບໍ່ເຫັນດີເຊັ່ນດຽວກັນ ເນື່ງຈາກເບິ່ງວ່າ ອາດສົ່ງຜົນເສຍຕໍ່ປະຕິທິນການແຂ່ງຂັນຂອງວົງການກິລາໄປທົ່ວໂລກ.

‘‘ ເຮົາຕ້ອງມີການຫາລືຮ່ວມກັນລະຫວ່າງປະທານຟີຟາກັບສະມາຊິກຂອງໄອໂອຊີ ແຕ່ຕອນນີ້ກັບໍ່ມີໂອກາດສະນັ່ນແລ້ວ ເພາະປະທານຟີຟາ ຍົກເລີກການເດີນທາງມາຍັງປັກກິ່ງ ແລະ ເຮົາບໍ່ຄວນລົມກັນເລື່ອງນີ້ໃນວົງກວ້າງ ຂະນະທີ່ລາວບໍ່ໄດ້ຢູ່ນີ້ ’’ ໂທມັສ ບາກ ປະທານ ໄອໂອຊີ ກ່າວລະຫວ່າງການປະຊຸມຢູ່ຈີນ.

ຂະນະທີ່ ມຸສຕາຟາ ເບີຣາຟ ປະທານຄະນະກຳມະການໂອລິມປິກແຫ່ງຊາດແອຟຣິກາ ກ່າວວ່າ : ‘‘  ແຜນການນີ້ຈະສ້າງຄວາມເສຍຫາຍຢ່າງມະຫາສານ ແລະ ເຮັດໃຫ້ວົງການກິລາຕົກຢູ່ໃນອັນຕະລາຍ ໂດຍສະເພາະບານເຕະ ເຊິ່ງຈະເປັນສິ່ງທີ່ຍອມຮັບບໍ່ໄດ້ຢ່າງເດັດຂາດ ’’.

‘‘ ນີ້ຈະເປັນການສ້າງຄວາມແຕກແຍກລະຫວ່າງກິລາຂອງຜູ້ຊາຍ ແລະ ຜູ້ຍິງ ແລະຍັງຈະສ້າງຄວາມລົ້ມເຫລວໃນການພະຍາຍາມສ້າງຄວາມເທົ່າທຽມກັນ ສຳລັບກິລາໃນທຸກໆປະເພດ ’’.

ທັງນີ້ ຄາດວ່າ ການປ່ຽນວົງຮອບຈັດການແຂ່ງຂັນບານໂລກຮອບສຸດທ້າຍ ຈະສ້າງລາຍໄດ້ເພີ່ມໃຫ້ກັບຟີຟາບໍ່ຫນ້ອຍວ່າ 4,400 ລ້ານໂດລາສະຫະລັດໃນອະນາຄົດ.