ມອບ-ຮັບໜ້າທີ່ລັດຖະມົນຕີ ກະຊວງແຜນການ ແລະ ການລົງທຶນ ຜູ້ເກົ່າ ແລະ ຜູ້ໃໝ່

ໃນວັນທີ 4 ກຸມພາ 2022, ກະຊວງ ແຜນການ ແລະການລົງທຶນ ໄດ້ຈັດພິທີມອບ-ຮັບໜ້າທີ່ລະຫວ່າງ ທ່ານ ສອນໄຊ ສີພັນດອນ ກຳມະການກົມການເມືອງສູນກາງພັກ, ເລຂາຄະນະບໍລິຫານງານພັກ, ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ ຜູ້ເກົ່າ ແລະ ທ່ານ ຄຳເຈນ ວົງໂພສີ ກໍາມະການສູນກາງພັກ, ລັດຖະມົນຕີ ກະຊວງແຜນການ ແລະ ການລົງທຶນ ຜູ້ໃໝ່ ໂດຍການເປັນສັກຂີພິຍານຂອງທ່ານ ພັນຄຳ ວິພາວັນ ກໍາມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ, ລັດຖະມົນຕີ, ຮອງລັດຖະມົນຕີຂອງບັນດາກະຊວງ ແລະ ຮອງປະທານອົງການທຽບເທົ່າ.

ທ່ານ ສອນໄຊ ສີພັນດອນ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນ ຕີ ກະຊວງແຜນການ ແລະ ການລົງທຶນ ລາຍງານການນໍາພາ-ຊີ້ນຳວຽກງານໃນໄລຍະ 2 ປີກວ່າ ເຊິ່ງເປັນບາດລ້ຽວສຳຄັນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ແລະ ການສ້າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX (2021-2025) ພາຍໃຕ້ການຊີ້ນໍາຂອງກົມການເມືອງ, ລັດຖະບານ, ຄະນະພັກ, ຄະນະນຳ ແລະ ສະມາຊິກພັກ-ພະນັກງານຂະແໜງແຜນການ ແລະ ການລົງທຶນ ໄດ້ພ້ອມກັນຈັດຕັ້ງປະຕິບັດທຸກໜ້າທີ່ວຽກງານສຳຄັນ ແລະ ໃຫຍ່ຫຼວງທີ່ຂັ້ນເທິງມອບໝາຍໃຫ້ ເປັນຕົ້ນ ໄດ້ປັບປຸງກົງຈັກການຈັດຕັ້ງ ແລະ ພາລະບົດບາດຂອງກະຊວງ ແລະ ບັນດາກົມກອງໃຫ້ກະທັດຮັດ ແລະເຄື່ອນໄຫວມີປະສິດທິພາບ, ໄດ້ປັບປຸງກົນໄກ, ວິທີການ, ນິຕິກຳ ແລະເຄື່ອງ ມືຮັບໃຊ້ວຽກງານໃຫ້ຄົບຖ້ວນ ສອດຄ່ອງກັບເງື່ອນໄຂ ແລະສະພາບການໃນໄລຍະໃໝ່, ຄົ້ນຄວ້າວາລະແຫ່ງຊາດການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະບົດແນະນຳການຈັດຕັ້ງປະຕິບັດວາ ລະດັ່ງກ່າວ, ຄົ້ນຄວ້າຈັດສັນແຜນການລົງທຶນຂອງລັດໃຫ້ມີປະສິດທິຜົນຂຶ້ນ, ຄົ້ນຄວ້າແກ້ໄຂໜີ້ສິນໂຄງ ການລົງທຶນຂອງລັດຫຼາຍຮູບແບບ, ປະເມີນໂຄງການລົງທຶນຂອງລັດກ່ອນເອົາເຂົ້າແຜນເຮັດໃຫ້ສາມາດຕັດຮອນມູນຄ່າໂຄງການທີ່ບໍ່ຖືກຕ້ອງຕາມລະບຽບກົດໝາຍໄດ້ຈຳນວນຫຼາຍ, ດຶງດູດການລົງ ທຶນເອກະຊົນພາຍໃນ ແລະ ຕ່າງປະເທດໄດ້ຫຼາຍກວ່າ 9 ຕື້ໂດລາສະຫະລັດ ແລະ ຈັດຕັ້ງປະຕິບັດໂຄງການກໍ່ສ້າງພື້ນຖານໂຄງລ່າງຂະໜາດໃຫ່ຍເປັນຕົ້ນ ໂຄງການກໍ່ສ້າງທາງດ່ວນວຽງຈັນ-ວັງວຽງ, ໂຄງການກໍ່ສ້າງທາງລົດໄຟລາວ-ຈີນ, ໂຄງການກໍ່ສ້າງດ່ານສາກົນສິນຄ້າທ່າບົກທ່ານາແລ້ງ ນະຄອນຫຼວງວຽງຈັນ, ໂຄງການພັດທະນາເມືອງທັນສະໄໝ ແລະເປັນມິດຕໍ່ສິ່ງແວດລ້ອມ(ເຂດນາເຕີຍ) ແຂວງຫຼວງນໍ້າທາ ແລະແຂວງອຸ ດົມໄຊ, ໂຄງການມະຫານະທີສີທັນດອນ ແລະອື່ນໆ, ຂົນຂວາຍທຶນຊ່ວຍເຫຼືອທາງການເພື່ອການພັດທະ ນາ ແລະ ການຊ່ວຍເຫຼືອຈາກປະເທດເພື່ອນມິດຍຸດທະສາດ, ຈັດຕັ້ງປະຕິບັດຍຸດທະສາດການພັດທະນາລະບົບສະຖິຕິແຫ່ງຊາດແບບຍືນຍົງໂດຍການສ້າງລະບົບຖານຂໍ້ມູນ, ສຳຫຼວດເກັບກຳ, ສັງລວມ, ປຸງແຕ່ງວິໄຈ, ເຜີຍແຜ່ ແລະ ສະໜອງຂໍ້ມູນສະຖິຕິທາງການຕ່າງໆ.

ຂະນະທີ່ທ່ານ ຄໍາເຈນ ວົງໂພສີ ລັດຖະມົນ ຕີ ຜູ້ໃໝ່ ກ່າວວ່າ: ຈະສືບຕໍ່ເສີມຂະຫຍາຍຜົນສໍາເລັດທີ່ຍາດມາໄດ້ໃນໄລຍະຜ່ານມາ, ເພີ່ມທະວີຮັດແໜ້ນຄວາມສາມັກຄີພາຍໃນ, ປະຕິບັດວຽກຫຼັກການລວມສູນປະຊາທິ ປະໄຕ, ນຳພາເປັນໝູ່ຄະນະ, ແບ່ງງານໃຫ້ບຸກຄົນຮັບຜິດຊອບ ແລະ ປະຕິບັດຕາມການຈັດຕັ້ງຢ່າງເຂັ້ມງວດ, ປ້ອງກັນ ແລະ ສະກັດກັ້ນວິທີເຮັດວຽກແບບອາດຍາສິດ, ຈະພ້ອມກັບຄະນະນຳກະຊວງ ແລະ ພະນັກງານຫຼັກແຫຼ່ງປະຕິບັດສິດ,ໜ້າທີ່ ແລະ ພາລະບົດບາດການເປັນເສນາທິການທີ່ເຂັ້ມແຂງໃຫ້ແກ່ສູນກາງພັກ ແລະລັດຖະບານແນໃສ່ຕອບສະໜອງ ຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ເທື່ອລະກ້າວ.

ໃນໂອກາດອັນມີຄວາມໝາຍນີ້, ທ່ານ ພັນຄໍາ ວິພາວັນ ນາຍົກລັດຖະມົນຕີ ໄດ້ຍ້ອງຍໍຊົມເຊີຍຜົນງານທີ່ກະຊວງຍາດມາໄດ້ໃນໄລຍະຜ່ານມາ. ແນວໃດກໍດີ, ຄະນະນຳ ແລະ ພະນັກງານທັງໝົດ ຕ້ອງກໍາແໜ້ນພາລະບົດບາດໜ້າທີ່ຂອງກະຊວງແຜນການ ແລະ ການລົງທຶນ ທີ່ລະບຸໄວ້ໃນດຳລັດເລກທີ 636/ນຍ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກະຊວງແຜນການ ແລະ ການລົງທຶນ ເພື່ອເພີ່ມທະວີຄວາມຮັບຜິດຊອບການປະຕິບັດໜ້າທີ່ການເມືອງຂອງຕົນໃຫ້ສູງຂຶ້ນ, ສຸມໃສ່ແກ້ໄຂສະພາບຄວາມຫຍຸ້ງຍາກດ້ານເສດຖະກິດ ໂດຍສະເພາະແຜນພັດທະນາເສດຖະກິດ-ສັງຄົມຕ້ອງສາມາດກໍານົດທິດ, ຮູບແບບການພັດ ທະນາທີ່ຈະແຈ້ງ, ສອດຄ່ອງ, ຕົວຈິງ ແລະ ມີຈຸດສຸມ, ປັບປຸງກົນໄກການຄົ້ນຄວ້າ ແລະຄຸ້ມຄອງການລົງ ທຶນຂອງລັດ ແລະ ການແກ້ໄຂໜີ້ສິນໂຄງການລົງທຶນຂອງລັດໃຫ້ຄືບໜ້າໄວ, ຍູ້ແຮງການລົງທຶນເອກະຊົນພາຍໃນ ແລະ ຕ່າງປະເທດໃຫ້ເປັນກໍາລັງຕົ້ນຕໍຊຸກຍູ້ການເຕີບໂຕຂອງເສດຖະກິດ, ດຶງດູດການຊ່ວຍເຫຼືອ ທາງການເພື່ອການພັດທະນາທັງໃນຂອບຫຼາຍຝ່າຍ ແລະ ສອງຝ່າຍຢ່າງເປັນເຈົ້າການຫຼາຍຂຶ້ນແລະ ສ່ອງແສງຄວາມຕ້ອງການດ້ານການພັດທະນາຂອງປະເທດໃຫ້ຫຼາຍຂຶ້ນ, ປັບປຸງລະບົບຂໍ້ມູນສະຖິຕິໃຫ້ມີຄຸນນະ ພາບສູງຂຶ້ນ ແລະ ສາມາດເຂົ້າເຖິງໄດ້ຢ່າງສະດວກໂດຍການຜັນຂະຫຍາຍກົດໝາຍ ແລະ ຍຸດທະສາດ ທີ່ໄດ້ຮັບຮອງແລ້ວນັ້ນໃຫ້ເປັນຮູບປະທໍາ, ການຄົ້ນຄວ້າຕ້ອງສຸມໃສ່ຮັບໃຊ້ໂດຍກົງໃຫ້ແກ່ການຮ່າງ, ຈັດຕັ້ງປະຕິບັດ ແລະ ຕີລາຄາແຜນພັດທະນາ-ເສດຖະກິດສັງຄົມແຕ່ລະໄລຍະ, ເອົາໃຈໃສ່ແກ້ໄຂປາກົດການຫຍໍ້ ທໍ້ໃນກົງຈັກ ແລະ ພະນັກງານຂອງຂະແໜງການໃຫ້ຫຼຸດລົງໂດຍເອົາໃຈໃສ່ສຶກສາອົບຮົມພະນັກງານໃຫ້ມີແນວຄິດຫຼັກໝັ້ນຕໍ່ແນວທາງ, ກຳແໜ້ນນະໂຍບາຍຂອງພັກ, ກົດໝາຍຂອງລັດ, ນິຕິກໍາ-ລະບຽບການທີ່ກ່ຽວຂ້ອງໃຫ້ດີ, ຍົກສູງສະຕິຄວາມຮັບຜິດຊອບໜ້າທີ່ການເມືອງ, ສາມັກຄີເປັນຈິດໜຶ່ງໃຈດຽວ, ມີຈັນຍາບັນ ຮັກວິຊາຊີບ, ປະຕິບັດວິໄນແຜນການຢ່າງເຄັ່ງຄັດ ແລະ ຖືເອົາຜົນປະໂຫຍດຂອງປະເທດຊາດ-ປະ ຊາຊົນເປັນຫລັກ ໄປຄຽງຄູ່ກັບການປັບປຸງແບບແຜນວິທີເຮັດວຽກ ແລະ ແບບແຜນການນໍາພາ ຄຸ້ມຄອງໃຫ້ມີປະສິດທິຜົນສູງຂຶ້ນ.