ຕຳນານຄວາມເຊື່ອ ມື້ຂຶ້ນ 3 ຄໍ່າເດືອນ 3 ລາວ
February 4, 2022 - 10:06 AM
ມື້ນີ້ວັນສຸກ ວັນທີ 4 ກຸມພາ ພ.ສ 2564 (ຄ.ສ2022) ເປັນມື້ຂຶ້ນ 3 ຄ່ຳ ເດືອນ 3 ລາວ, ຕາມປະເພນີ ແລະ ຄວາມເຊື່ອຖືຂອງຄົນລາວເຮົາມາແຕ່ບູຮານ ນັບວ່າເປັນມື້ທີ່ມີຄວາມອີ່ມໜໍາສຳນານທີ່ສຸດ ເປັນມື້ໄຂປະຕູເລົ້າເຂົ້າ ໄຂປະຕູເງິນ ໄຂປະຕູຄຳ ເປີດປະຕູໂຊກລາບ ປະຕູແຫ່ງຄວາມອຸດົມຮັ່ງມີ ດັ່ງຄຳບູຮານທີ່ກ່າວເຖິງຄວາມມະຫັດສະຈັນ ໃນຕຳນານຄວາມເຊື່ອຂອງຊາວລາວວ່າເປັນມື້ທີ່ : “ກົບບໍ່ມີປາກ ນາກບໍ່ມີຮູທະວານ ໝາກຂາມປ້ອມສຸກຫວານ ແມ່ມານທ້ອງແວບ ຄົກເປັນໝາກ ສາກເປັນໃບ ຫົວສີໃຄເປັນດອກ ກະຮອກປົ່ງເຂົາ ຜັກກະເດົາເຊົາຂົມ” ຄວາມໝາຍຄື
- ກົບບໍ່ມີປາກ : ໝາຍເຖິງກົບບໍ່ໄດ້ກິນອາຫານກໍອີ່ມທິບເພາະມີເຍື່ອບາງໆສີຂາວປິດປາກຢູ່ ຫລື ອີກຄວາມໝາຍແມ່ນປິດສະໜາທໍາໃຫ້ຄົນເຮົາຮັກສາສິນ ຮັກສາກາຍ ວາຈາ ໃຈ ໃຫ້ດີງາມໃນມື້ນີ້.
- ນາກບໍ່ມີຮູທະວານ : ໝາຍເຖິງຄວາມອີ່ມໜໍາສຳລານ ອຸດົມສົມບູນ ຫລື ອີກຄວາມໝາຍແມ່ນໃຫ້ຄົນເຮົາຮູ້ຈັກອ່ອນນ້ອມຖ່ອມຕົນ ຮູ້ຈັກສຳລວມກາຍ ວາຈາ ໃຈ ເອົາໄວ້ ອ່ອນໂຍນແຕ່ບໍ່ອ່ອນແອ ຄົງຄວາມສະຖານະຂອງຄວາມເປັນລູກຫລານຜູ້ດີເອົາໄວ້.
- ໝາກຂາມປ້ອມສຸກຫວານ : ໝາຍເຖິງໝາກໄມ້ທີ່ມີລົດຝາດຈະກາຍມີລົດຫວານໄດ້ຢ່າງອັດສະຈັນປຽບດັ່ງຄົນເຮົາຖ້າມີສິນສະມາທິປັນຍາແລ້ວຈະສາມາດນຳພາຊີວິດເຮົາກ້າວໄປເຖິງສິ່ງທີ່ດີງາມໃນຊີວິດໄດ້ໃນອະນາຄົດ.
- ແມ່ມານທ້ອງແວບ : ໝາຍເຖິງໃຫ້ຄົນເຮົາຮັກສາບຸກຄະລິກ ວາດຊົງອັນສະຫງ່າງາມຂອງຕົນຢ່າງສະ ເໝີຕົ້ນສະເໝີປາຍ ທຸ່ນທ່ຽງ ແລະ ເຂົ້າໃຈແຈ້ງເຖິງສັດຈະທຳຂອງຊີວິດ ແລະ ວາງຕົນຢ່າງຖືກຕ້ອງຕາມກາລະເທສະໃນເວລາເຂົ້າສັງຄົມ.
- ຄົກເປັນໝາກ ສາກເປັນໃບ ຫົວສີໃຄເປັນດອກ : ໝາຍເຖິງຄຳສອນຂອງເຖົ້າແກ່ບູຮານໃຫ້ຄົນເຮົາຮູ້ ຈັກປະກອບອາຊີບອັນບໍລິສຸດ ດຸໝັ່ນຂະຫຍັນພຽນ ປະກອບວຽກງານໃດໃຫ້ເກີດດອກອອກຜົນສຳເລັດດີ ງາມ.
- ກະຮອກປົ່ງເຂົາ : ໝາຍເຖິງໃຫ້ຄົນເຮົາກຳຈັດຄວາມໂງ່ໂດຍການດຸໝັ່ນສຶກສາຫາຄວາມຮູ້ປະດັບຕົວ ແລະ ຮູ້ນຳໃຊ້ຄວາມຮູ້ຄວາມສາມາດສະຕິປັນຍາຂອງຕົນປະກອບສ່ວນເຂົ້າໃນການພັດທະນາ.
- ຜັກກະເດົາເຊົາຂົມ : ໝາຍເຖິງຄົນເຮົາຕ້ອງເຂົ້າໃຈສັດຈະທຳຂອງຊີວິດ ແລະ ຮູ້ວິທີທາງດັບໄຟກິເລດຕັນຫາຕ່າງໆໃນຊີວິດຄືຮູ້ຫົນທາງການພົ້ນທຸກຕາມຄຳສອນຂອງພະພຸດທະເຈົ້າຜູ້ຕັດສະຮູ້ຊອບໂດຍພະອົງເອງ.
