ນິວຊີແລນເຜີຍແຜນເປີດປະເທດ ຄາດນັກຮຽນ-ນັກທ່ອງທ່ຽວທີ່ຕ້ອງຂໍວີຊາ ເລີ່ມເດີນທາງເຂົ້າໄດ້ໄລຍະເດືອນຕຸລາ

ວັນທີ 3 ກຸມພາ 2022, ທາງການນິວຊີແລນເປີດເຜີຍແຜນເປີດປະເທດອີກ ຫລັງຈາກປິດຊາຍແດນປະເທດຮັບມືສະຖານະການການແພ່ລະບາດຂອງໂຄວິດນັບແຕ່ໄລຍະຕົ້ນໆ ສົ່ງຜົນໃຫ້ຈຳນວນຜູ້ຕິດເຊື້ອສະສົມຂອງນິວຊີແລນມີ 17.007 ຄົນ, ເສຍຊີວິດ 53 ຄົນ ເຊິ່ງຖືວ່າໜ້ອຍເມື່ອທຽບໃສ່ປະເທດອື່ນໆໃນປະຊາຄົມໂລກ.

ໂດຍແຜນການເປີດປະເທດຂອງນິວຊີແລນຈະແບ່ງເປັນ 5 ໄລຍະຄື:

• ໄລຍະທຳອິດ ຈະເປີດໂອກາດໃຫ້ພົນລະເມືອງນິວຊີແລນທີ່ອາໄສຢູ່ໃນປະເທດໃກ້ຄຽງ ຄືອົດສະຕຣາລີ ແລະ ເຂົ້າຮັບການສັກວັກຊີນປ້ອງກັນໂຄວິດຄົບໂດສແລ້ວ ສາມາດເດີນທາງເຂົ້າປະເທດໄດ້ເປັນກຸ່ມທຳອິດ ນັບແຕ່ວັນທີ 27 ກຸມພານີ້.
• ໄລຍະສອງ ຈະເປີດໂອກາດໃຫ້ພົນລະເມືອງນິວຊີແລນທີ່ອາໄສຢູ່ໃນປະເທດອື່ນໆ ແລະ ເຂົ້າຮັບການສັກວັກຊີນປ້ອງກັນໂຄວິດຄົບໂດສແລ້ວ ສາມາດເດີນທາງເຂົ້າປະເທດໄດ້ນັບແຕ່ວັນທີ 13 ມີນາເປັນຕົ້ນໄປ ເຊິ່ງອາດລວມເຖິງກຸ່ມແຮງງານຕ່າງປະເທດ ຫລື ແຮງງານມີຝີມື.
• ໄລຍະສາມ ຈະເປີດໂອກາດໃຫ້ນັກຮຽນ, ນັກສຶກສາຕ່າງປະເທດ 5.000 ກວ່າຄົນ ສາມາດເດີນທາງເຂົ້າປະເທດໄດ້ອີກ ນັບແຕ່ວັນທີ 12 ເມສາເປັນຕົ້ນໄປ.
• ໄລຍະສີ່ ພົນລະເມືອງອົດສະຕຣາລີ ແລະ ນັກເດີນທາງຈາກປະເທດທີ່ຟຣີວີຊາ ຄາດວ່າຈະໄດ້ຮັບອະນຸຍາດໃຫ້ເດີນທາງເຂົ້າປະເທດໄດ້ອີກບໍ່ເກີນຊ່ວງເດືອນກໍລະກົດ.
• ໄລຍະຫ້າ ນັກຮຽນ-ນັກທ່ອງທ່ຽວຈາກປະເທດທີ່ຕ້ອງຂໍວີຊາ ສາມາດເລີ່ມເດີນທາງເຂົ້າປະເທດໄດ້ຊ່ວງເດືອນຕຸລາເປັນຕົ້ນໄປ.

ຫລ້າສຸດ ນິວຊີແລນມີຜູ້ທີ່ອາຍຸແຕ່ 12 ປີຂຶ້ນໄປ ເຂົ້າຮັບວັກຊີນປ້ອງກັນໂຄວິດຄົບໂດສແລ້ວ 94% ຫລື ປະມານ 80% ຂອງພົນລະເມືອງນິວຊີແລນທົ່ວປະເທດ, ສ່ວນ 56% ຂອງພົນລະເມືອງເຂົ້າຮັບວັກຊີນເຂັມກະຕຸ້ນແລ້ວ.

ອ້າງອີງ:

• https://www.bbc.com/news/world-asia-60238867
• https://www.theguardian.com/world/2022/feb/03/jacinda-ardern-announces-new-zealand-border-will-open-in-stages-from-end-of-february
• https://edition.cnn.com/travel/article/new-zealand-borders-opening-intl-hnk/index.html