WHO ຢືນຢັນພົບໂອມິຄຣອນ BA.2 ແລ້ວຢ່າງໜ້ອຍ 57 ປະເທດທົ່ວໂລກ ເຜີຍຍັງບໍ່ມີຫລັກຖານຮຸນແຮງເພີ່ມຂຶ້ນ
ອົງການອະນາໄມໂລກເຜີຍໄດ້ຮັບການລາຍງານຜູ້ຕິດເຊື້ອໂອມິຄຣອນ ສາຍພັນຍ່ອຍ BA.2 ແລ້ວໃນຢ່າງໜ້ອຍ 57 ປະເທດທົ່ວໂລກ ຢືນຢັນເຖິງວ່າລະບາດໄວ ແຕ່ຕອນນີ້ຍັງບໍ່ພົບຂໍ້ບົ່ງຊີ້ວ່າເຮັດໃຫ້ເກີດອາການຮຸນແຮງກວ່າສາຍພັນດັ້ງເດີມ.
ວັນທີ 3 ກຸມພາ 2022, ສຳນັກຂ່າວຕ່າງປະເທດລາຍງານວ່າ: ອົງການອະນາໄມໂລກ (WHO) ຢືນຢັນພົບຜູ້ຕິດເຊື້ອຈາກໄວຣັສສາຍພັນຍ່ອຍ BA.2 ເຊິ່ງກາຍພັນຈາກເຊື້ອໄວຣັສໂອມິຄຣອນ ສາຍພັນຫລັກ BA.1 ແລ້ວໃນຢ່າງໜ້ອຍ 57 ປະເທດທົ່ວໂລກ.
WHO ເປີດເຜີຍໃນລາຍງານປະຈຳອາທິດວ່າ: ຈາກຂໍ້ມູນທີ່ຮວບຮວມໃນໄລຍະເດືອນຜ່ານມາ ພົບຜູ້ຕິດເຊື້ອໂຄວິດ-19 ຕິດເຊື້ອໄວຣັສໂອມິຄຣອນ ທຸກສາຍພັນທັງ BA.1, BA.1.1, BA.2 ແລະ BA.3 ກວມອັດຕາຫລາຍກວ່າ 93%.
ໂດຍສາຍພັນ BA.1 ແລະ BA.1.1 ເຊິ່ງເປັນສາຍພັນຍ່ອຍຕົ້ນໆຂອງໄວຣັສໂອມິຄຣອນ ຍັງມີອັດຕາຫລາຍກວ່າ 96% ຂອງລຳດັບໂອມິຄຣອນທັງໝົດ, ແຕ່ພົບການເພີ່ມຂຶ້ນຢ່າງຊັດເຈນໃນກໍລະນີທີ່ກ່ຽວຂ້ອງກັບ BA.2 ເຊິ່ງເປັນການກາຍພັນທີ່ແຕກຕ່າງຈາກສາຍພັນຍ່ອຍດັ້ງເດີມຫລາຍສ່ວນ ລວມທັງບໍລິເວນໂປຣຕີນໜາມທີ່ຈຸດເທິງພື້ນຜິວຂອງໄວຣັສ ແລະ ເປັນສຳຄັນໃນການເຂົ້າສູ່ຈຸລັງຂອງມະນຸດ.
“ປັດຈຸບັນໃນບາງປະເທດ ພົບອັດຕາການລະບາດຂອງໄວຣັສສາຍພັນຍ່ອຍ BA.2 ຫລາຍກວ່າເຄິ່ງໜຶ່ງຂອງຈຳນວນຜູ້ຕິດເຊື້ອໂອມິຄຣອນ” WHO ລະບຸໃນລາຍງານ.
ສ່ວນ ດຣ. ມາເຣຍ ແວນ ເຄີຄອບ ຫົວໜ້າຝ່າຍເຕັກນິກດ້ານໂຄວິດ-19 ຂອງອົງການອະນາໄມໂລກ ກ່າວວ່າ: ເຖິງວ່າຂໍ້ມູນເບື້ອງຕົ້ນທີ່ມີການຄົ້ນພົບໃນປັດຈຸບັນ ສະແດງໃຫ້ເຫັນວ່າໄວຣັສສາຍພັນຍ່ອຍ BA.2 ສາມາດແພ່ເຊື້ອໄດ້ຫລາຍກວ່າເກົ່າ, ແຕ່ຍັງບໍ່ພົບຂໍ້ບົ່ງຊີ້ວ່າ ໄວຣັສສາຍພັນລຸ້ນໃໝ່ທີ່ແຕກຍ່ອຍມາຈາກໂອມິຄຣອນສາຍພັນດັ້ງເດີມນີ້ ຈະເຮັດໃຫ້ເກີດການຕິດເຊື້ອຮຸນແຮງຂຶ້ນ.
ເຖິງຢ່າງໃດກໍຕາມ, ດຣ. ເຄີຄອບ ຍັງເນັ້ນວ່າ: ຂໍ້ມູນດັ່ງກ່າວເປັນພຽງຂໍ້ມູນເບື້ອງຕົ້ນເທົ່ານັ້ນ. ຂະນະທີ່ຂໍ້ມູນກ່ຽວກັບສາຍພັນຍ່ອຍ BA.2 ຍັງມີຢູ່ຈຳກັດຫລາຍ ແລະ ຈຳເປັນຕ້ອງມີການສຶກສາຄົ້ນຄວ້າເພີ່ມອີກຕໍ່ໄປ.
ອ້າງອີງ:
https://www.aljazeera.com/…/omicron-sub-variant-found…
https://www.forbes.com/…/stealth-omicron-sub…/…
https://www.straitstimes.com/…/omicron-sub-variant…
