ອາເມລິກາເຜີຍ ຈັດການຫົວໜ້າ ISIS ແລ້ວ ຢືນຢັນບໍ່ໄດ້ສັງຫານພົນລະເຮືອນໃນພື້ນທີ່ ແຕ່ເກີດຈາກອີກຝ່າຍລະເບີດຕົນເອງ
ໜ່ວຍຮົບພິເສດອາເມລິກາ ປະຕິບັດການຫວັງເດັດຫົວຜູ້ນຳ ISIS ສຸດທ້າຍລາວລະເບີດສັງຫານຕົນເອງ ແລະ ຄອບຄົວ.
ວັນທີ 3 ກຸມພາ 2022, ເວັບໄຊທຳນຽບຂາວອອກຖະແຫລງການຂອງປະທານາທິບໍດີ ໂຈ ໄບເດນ ທີ່ລະບຸວ່າ: ກອງທັບອາເມລິກາປະສົບຜົນສຳເລັດໃນປະຕິບັດການຕໍ່ຕ້ານການກໍ່ການຮ້າຍ ສົ່ງຜົນໃຫ້ ອາບູ ອິບຣາຮິມ ອັລ-ຮາເຊມີ ອັລ-ຄູໄຣຊີ ຫົວໜ້າກຸ່ມໄອຊິສ (ISIS) ເສຍຊີວິດ ແລະ ທະຫານອາເມລິກາທັງໝົດທີ່ເຂົ້າຮ່ວມປະຕິບັດການຄັ້ງນີ້ຕ່າງກັບມາໄດ້ຢ່າງປອດໄພ.
ຂະນະທີ່ສຳນັກຂ່າວ AP ເປີດເຜີຍວ່າ: ໜ່ວຍຮົບພິເສດອາເມລິກາໄດ້ໃຊ້ເຮລິບກອບແຕລົງຈອດໃນເມືອງອັດເມ ໃກ້ຊາຍແດນຕວກກີ ແລະ ເຂົ້າຈູ່ໂຈມເຮືອນຫລັງໜຶ່ງ ມີການຍິງປະທະກັນປະມານ 2 ຊົ່ວໂມງ ມີຜູ້ໄດ້ຍິນສຽງປືນ ແລະ ລະເບີດດັງຂຶ້ນຫລາຍຄັ້ງ.
ໂດຍພື້ນທີ່ດັ່ງກ່າວເປັນຈຸດທີ່ມີປະຊາກອນອາໄສຢູ່ໜາແໜ້ນ ໂດຍເກີດຈາກການທີ່ມີຜູ້ອົບພະຍົບໜີມາຈາກສົງຄາມກາງເມືອງໃນຊີເຣຍ.
ກ່ອນໜານີ້, ມີລາຍງານຈາກແຫລ່ງຂ່າວໃນທ້ອງຖິ່ນວ່າ: ປະຕິບັດການຄັ້ງນີ້ເຮັດໃຫ້ມີຜູ້ເສຍຊີວິດຢ່າງໜ້ອຍ 12 ຄົນ ໂດຍມີເດັກ 7 ຄົນ ແລະ ຜູ້ຍິງອີກ 3 ຄົນລວມຢູ່ນຳ.
ໂດຍເຈົ້າໜ້າທີ່ຂອງອາເມລິກາ ຢືນຢັນວ່າ: ລາຍງານຜູ້ເສຍຊີວິດດັ່ງກ່າວບໍ່ໄດ້ເປັນຜົນມາຈາກລູກປືນຂອງຝັ່ງອາເມລິກາ, ແຕ່ເກີດຈາກການຈູດລະເບີດຂອງ ອັລ-ຄູໄຣຊີ ເຮັດໃຫ້ລາວ ແລະ ຄອບຄົວເສຍຊີວິດ.
ຕາມລາຍງານຍັງລະບຸວ່າ: ໜຶ່ງໃນເຄລິບກອບແຕທີ່ໃຊ້ໃນພາລະກິດເກີດປະສົບບັນຫາດ້ານເຄື່ອງຈັກ ເຮັດໃຫ້ເຈົ້າໜ້າທີ່ຂອງອາເມລິກາຕັດສິນໃຈລະເບີດເຮລິບກອບແຕລຳດັ່ງກ່າວຖິ້ມ.
ການບຸກໂຈມຕີຄັ້ງນີ້ຖືເປັນປະຕິບັດການຄັ້ງໃຫຍ່ສຸດຂອງອາເມລິກາໃນຊີເຣຍ ນັບແຕ່ການສັງຫານ ອາບູ ບາກາຣ໌ ອັລ-ບັກດາດີ ອະດີດຜູ້ນຳກຸ່ມ ISIS ເມື່ອປີ 2019.
ອ້າງອີງ:
https://www.whitehouse.gov/…/statement-by-president…/
https://abcnews.go.com/…/biden-us-raid-syria…/story…
https://apnews.com/…/biden-says-us-raid-syria-killed…
