ຕຳຫລວດອາເຈນຕິນາບຸກກວາດລ້າງ ແຫລ່ງຜະລິດໂຄເຄນປົນເປື້ອນສານພິດ ຫລັງພົບຄົນເສບເສຍຊີວິດຢ່າງໜ້ອຍ 20 ຄົນ
ຕຳຫລວດອາເຈນຕິນານຳກຳລັງເຂົ້າກວາດລ້າງແຫລ່ງຜະລິດໂຄເຄນປົນເປື້ອນສານພິດນອກນະຄອນຫລວງບົວໂນສໄອເຣສ ຫລັງພົບຜູ້ເສຍຊີວິດຢ່າງໜ້ອຍ 20 ຄົນ ຕ້ອງເຂົ້າໂຮງໝໍອີກກວ່າເຄິ່ງຮ້ອຍ.
ວັນທີ 3 ກຸມພາ 2022, ສຳນັກຂ່າວຕ່າງປະເທດລາຍງານວ່າ: ຕຳຫລວດອາເຈນຕິນານຳກຳລັງບຸກເຂົ້າກວາດລ້າງຊຸມຊົນ “ປູເອຣ໌ຕາ 8” (Puerta 8) ໃນເຂດເຕສເດເຟບຣີໂຣ (The de Febrero) ຂອງເຂດຊານມາຣ໌ຕິນ (San Martin) ທາງຕອນເໜືອຂອງນະຄອນຫລວງບົວໂນສໄອເຣສ ແລະ ຈັບກຸມຜູ້ຕ້ອງສົງໄສປະມານ 12 ຄົນ ເຊິ່ງມີສ່ວນພົວພັນກັບກໍລະນີການລັກລອບຈຳໜ່າຍໂຄເຄນປົນເປື້ອນສານພິດ ພ້ອມຢຶດຂອງກາງເປັນຫໍ່ບັນຈຸໂຄເຄນຈຳນວນໜຶ່ງ ກ່ອນຈະສົ່ງໄປກວດຢູ່ຫ້ອງປະຕິບັດການໃນເມືອງລາພລາຕາ (La Plata).
ການເຄື່ອນໄຫວຄັ້ງນີ້ມີຂຶ້ນຫລັງຈາກທາງການອາເຈນຕິນາ ໄດ້ຮັບລາຍງານພົບຜູ້ເສຍຊີວິດ ເຊິ່ງເປັນສະມາຊິກໃນກຸ່ມດຽວກັນຈຳນວນ 8 ຄົນ ຫລັງຈາກຊື້ໂຄເຄນມາເສບຈາກຊຸມຊົນດັ່ງກ່າວ ເມື່ອວັນທີ 1 ກຸມພາ ກ່ອນຈຳນວນຜູ້ເສຍຊີວິດຈະເພີ່ມຂຶ້ນ ໂດຍໃນຕອນເຊົ້າຂອງວັນທີ 3 ກຸມພາ ກະຊວງສາທາລະນະສຸກເປີດເຜີຍວ່າ: ມີຜູ້ເສຍຊີວິດເພີ່ມຂຶ້ນເປັນຢ່າງໜ້ອຍ 20 ຄົນ ແລະ ອີກ 74 ຄົນ ກຳລັງປິ່ນປົວຢູ່ໂຮງໝໍ ໃນຈຳນວນນັ້ນ 18 ຄົນມີອາການໜັກ ຕ້ອງໃຊ້ເຄື່ອງຊ່ວຍຫາຍໃຈ.
ທັງນີ້ດ ເຈົ້າໜ້າທີ່ຕຳຫລວດສັນນິຖານວ່າ: ສາເຫດຂອງການເສຍຊີວິດເປັນເພາະມີການເຈືອປົນສານພິດໃນໂຄເຄນ ເຊິ່ງກຳລັງຢູ່ລະຫວ່າງການກວດສອບວ່າເປັນສານພິດຊະນິດໃດ. ເຖິງຢ່າງໃດກໍຕາມ, ຄາດວ່າສານພິດດັ່ງກ່າວຄືຢາລະງັບປະສາດ ຫລື ຢາລະງັບປວດລິດຮຸນແຮງ ທີ່ສົ່ງຜົນໃຫ້ຜູ້ເສບເກີດອາການຊັກ ແລະ ມີພາວະຫົວໃຈວາຍກະທັນຫັນ ຫລັງໄດ້ຮັບເຂົ້າສູ່ຮ່າງກາຍ.
ເຈົ້າໜ້າທີ່ຝ່າຍຕຸລາການເຂດຊານມາຣ໌ຕິນໄດ້ຕັ້ງຂໍ້ສັນນິຖານວ່າ: ເຫດການນີ້ເກີດຂຶ້ນເນື່ອງຈາກຄວາມຂັດແຍ່ງລະຫວ່າງແກ້ງຄ້າຢາເສບຕິດໃນພື້ນທີ່. ຂະນະທີ່ ມາຣ໌ເຊໂລ ລາປາຣ໌ໂກ ໄອຍະການເຂດຊານມາຣ໌ຕິນ ລະບຸວ່າ: ນີ້ເປັນພຽງການຄາດເດົາເບື້ອງຕົ້ນ ຍັງຕ້ອງລໍຖ້າການສອບສວນເພີ່ມອີກຕໍ່ໄປ.
ສ່ວນທ່ານ ເຊີຈິໂອ ແບຣ໌ນີ ຜູ້ອຳນວຍການໜ່ວຍງານຄວາມໝັ້ນຄົງແຂວງບົວໂນສໄອເຣສ ໄດ້ອອກມາເຕືອນໃຫ້ປະຊາຊົນອາດຊື້ໂຄເຄນມາຈາກພື້ນທີ່ດັ່ງກ່າວໃນໄລຍະ 24 ຊົ່ວໂມງຜ່ານມາ ຢ່າເອົາໂຄເຄນມາເສບ ແລະ ຢຸດເຊື້ອໂຄເຄນຈາກພື້ນທີ່ດັ່ງກ່າວ ເພື່ອຫລີກລ່ຽງອັນຕະລາຍທີ່ອາດຈະເກີດຂຶ້ນ.
ອ້າງອີງ:
https://www.abc.net.au/…/20-killed-74-sick-in…/100803392
https://www.nbcnews.com/…/20-killed-74-sickened…
https://www.aljazeera.com/…/tainted-cocaine-kills-and…
https://www.bbc.com/news/world-latin-america-60235154
