ແມ່ນແທ້ບໍ່ ວ່າຜູ້ຕິດເຊື້ອໂຄວິດ-19 ໃນລາວຫຼຸດລົງ?

ໂດຍ: ລູກເມືອງພວນ

ນັບແຕ່ກາງເດືອນ ມັງກອນເປັນຕົ້ນມາ, ເຫັນວ່າຜູ້ຕິດເຊື້ອໂຄວິດ-19 ໃນລາວຫຼຸດລົງຢ່າງຕໍ່ເນື່ອງ ເຮັດໃຫ້ຫຼາຍຄົນດີໃຈທີ່ພະຍາດນີ້ຈະຄ່ອຍໆໝົດໄປ. ຂະນະທີ່ດີໃຈນັ້ນພັດພາກັນຫຼົງລືມ ແລະ ຂາດສະຕິໂດຍບໍ່ປະຕິບັດມາດຕະການປ້ອງກັນຕາມສາທາລະນະສຸກ ແລະ ຄະນະສະເພາະກິດວາງອອກ ຊຶ່ງເຫັນວ່າທຸກການເຄື່ອນໄຫວຂອງຄົນໃນສັງຄົມເກືອບວ່າຈະກັບຄືນມາເປັນປົກກະຕິແລ້ວ, ບໍ່ສົນໃຈໃສ່ຜ້າອັດປາກ-ດັງ, ບໍ່ໃຊ້ເຈວ ຫຼື ນໍ້າຢາລ້າງມື, ມີການພົບປະສ້າງສັນ, ງານດອງ, ການໂຮມຕົວຂອງກຸ່ມຄົນໃນສັງຄົມເລີ່ມຂຶ້ນຢ່າງບໍ່ຢ້ານກົວຕໍ່ການຕິດເຊື້ອໄວຣັດໂຄວິດ-19 ແຕ່ຢ່າງໃດ, ການຈັບມືຖືແຂນ ກອດຈູບກັນຕາມປົກກະ ຕິນັ້ນ ໄດ້ກັບຄືນມາສູ່ຄວາມປົກກະຕິ ໂດຍບໍ່ຢ້ານກົວການຕິດເຊື້ອແຕ່ຢ່າງໃດ ຊຶ່ງພຶດຕິກຳດັ່ງກ່າວມີຄວາມສ່ຽງຕໍ່ການແພ່ລະບາດຂອງພະຍາດອີກເທື່ອໃໝ່.
ແມ່ນແທ້ບໍ່ວ່າ ການຕິດເຊື້ອໂຄວິດ-19 ໃນລາວຫຼຸດລົງ? ບັນຫານີ້ ພວກເຮົາມາເບິ່ງຄວາມຈິງນຳກັນ ວ່າມັນເປັນແນວໃດກັນແທ້. ດັ່ງພວກເຮົາຮູ້ນຳກັນວ່າ ນັບແຕ່ກາງປີ 2021 ຫາທ້າຍປີ ຜູ້ຕິດເຊື້ອໂຄວິດໃນລາວພຸ່ງສູງຂຶ້ນຢ່າງຕໍ່ເນື່ອງ, ແຕ່ລະວັນມີຜູ້ຕິດເຊື້ອນັບຫົວພັນຂຶ້ນເມືອຈົນເຮັດໃຫ້ສະຖານທີ່ຈຳກັດບໍລິເວນ, ໂຮງໝໍແຫ່ງຕ່າງໆ ບໍ່ສາມາດຮັບເອົາຄົນເຈັບໄດ້ອີກ, ລັດຖະບານຈຶ່ງຮຽກຮ້ອງໃຫ້ຈຳກັດບໍລິເວນປິ່ນປົວຢູ່ໃນຄອບຄົວເອົາເອງ ບົນມາດຖານຂອງສາທາລະນະສຸກວາງອອກ. ນອກນີ້, ລັດຖະບານຍັງອະນຸຍາດໃຫ້ປະຊາຊົນທົ່ວໄປສາມາດຊື້ເຄື່ອງກວດຫາເຊື້ອແບບໄວ ແລະ ປິ່ນປົວໂດຍຕົນເອງຢູ່ເຮືອນໄດ້. ພ້ອມດຽວກັນກໍຜະລິດຢາເມັດ ໂມລາໂກເວຍ ປົວໂຄວິດ-19 ອອກມາເພື່ອຮັບໃຊ້ສັງຄົມຢ່າງທົ່ວເຖິງ ເພື່ອຫຼຸດຜ່ອນການແອອັດຢູ່ສະຖານທີ່ຈຳກັດບໍລິເວນ ແລະ ບັນດາໂຮງໝໍແຫ່ງຕ່າງໆລົງເພື່ອຮອງຮັບເອົາແຕ່ຜູ້ມີອາການໜັກໜ່ວງ ແລະ ວິກິດທີ່ສຸດເທົ່ານັ້ນ.
ຈາກນະໂຍບາຍດັ່ງກ່າວຂອງລັດຖະບານ, ປະຊາຊົນຈຶ່ງຫັນມາກວດພະຍາດເອົາເອງ ແລະ ປິ່ນປົວໂດຍຕົນເອງນັບມື້ຫຼາຍຂຶ້ນ, ແຕ່ບໍ່ໄດ້ລາຍງານຢ່າງເປັນທາງການໃຫ້ຄະນະສະເພາະກິດຮັບຊາບ ເຮັດໃຫ້ຈຳ ນວນຜູ້ຕິດເຊື້ອບໍ່ໄດ້ເຊື່ອມໂຍງເຂົ້າກັບລະບົບເວບໄຊຂອງຄະນະສະເພາະກິດ ຈຶ່ງເຮັດໃຫ້ຈຳນວນຜູ້ຕິດ ເຊື້ອຕາມການຖະແຫຼງການແຕ່ລະວັນຂອງຄະນະສະເພາະກິດຫຼຸດລົງຢ່າງຕໍ່ເນື່ອງແຕ່ທ້າຍເດືອນມັງກອນເປັນຕົ້ນມາ ເຮັດໃຫ້ສັງຄົມທົ່ວໄປເຊື່ອວ່າ ຜູ້ຕິດເຊື້ອໂຄວິດ-19 ໃນລາວຫຼຸດລົງຢ່າງຈະແຈ້ງ ແຕ່ຄວາມເປັນຈິງແລ້ວບໍ່ແມ່ນແນວນັ້ນ ກົງກັນຂ້າມຜູ້ຕິດເຊື້ອໃນລາວນັບມື້ເພີ່ມຂຶ້ນແຕ່ລະວັນ.

ດັ່ງນັ້ນ, ຈຶ່ງຮຽກຮ້ອງທຸກຄົນໃນສັງຄົມຈົ່ງສືບຕໍ່ເອົາໃຈໃສ່ປ້ອງກັນຕົນເອງໃຫ້ເຂັ້ມງວດຕາມມາດຕະການທີ່ສາທາລະນະສຸກກໍຄືຄະນະສະເພາະກິດວາງອອກຢ່າງເຂັ້ມງວດ ຢ່າຫຼົງສະຕິ, ລະເມີວ່າການຕິດເຊື້ອໂຄວິດຫຼຸດລົງ ຢ່າງຈະແຈ້ງ ຊຶ່ງເປັນສັນຍານເຕືອນວ່າ ໂຄວິດ-19 ໃກ້ຈະໝົດໄປຈາກປະເທດລາວແລ້ວ ມັນບໍ່ແມ່ນຄວາມຈິງ, ຢ່າຟ້າວດີໃຈວ່າພະຍາດຈະໝົດໄປ, ຈົ່ງໃຫ້ລະມັດລະວັງ ແລະ ປ້ອງກັນໂຕເອງຢ່າງມີສະຕິ ກາດຢ່າໄດ້ຕົກ, ຖ້າໝົດສະຕິຍາມໃດ ຈະມີຄວາມສ່ຽງຕໍ່ການແພ່ລະບາດອີກຮອບໃໝ່ໃນລາວໃຫຍ່ກວ່າເກົ່າກໍເປັນໄດ້ ເພາະໄວຣັດສາຍພັນ ໂອມິຄອນ ແພ່ລະບາດໄວກວ່າທຸກໆ ສາຍພັນທີ່ພວດລະບາດຢູ່ໃນປັດຈຸບັນ.